၁ - ​စဲ​အ့ၣ်​ဒီး ​သး​အ​တၢ်​ဆိ​က​မိၣ်​ယိာ်

​ဒ်​ပ​မ့ၢ်​ပှ​ဟီၣ်​ခိၣ်​ဖိ​တ​ဂၤ​အ​သိး ​ပ​အိၣ်​ဒီး​ပ​တၢ်​ဆိ​က​မိၣ်​ထီ​ဘိ​န့ၣ်​လီၤ. ​ပ​တၢ်​ဆိ​က​မိၣ်​တ​ဖၣ်​အံၤ ​မ့ၢ်​ပ​ဆိ​က​မိၣ်​မှံ​ဆိ​က​မိၣ်​ထံ​တ​ဖၣ် ​က​အိၣ်​ဝဲ​အ​က​လုာ်​က​လုာ် ​တုၤ​လၢ​ပ​တိၢ်​ထံ​အီၤ​တ​ချုး​ခဲ​လၢာ်​ဘၣ်​န့ၣ်​လီၤ. ​ခိၣ်​ဃၢၤ​န့​ဆၢၣ်​တ​ဖၣ် ​တၢ်​မဲ​တၢ်​မါ, ​တၢ်​မူ​တၢ်​သါ, ​ဂာ်​သ​လီ​ဂံၢ်​သ​ဟီၣ် ​တ​ဖၣ် ​အိၣ်​ဝး​တ​ရံး​ပှၤ​အါ​အါ​ဂီၢ်​ဂီၢ်​ဘၣ်​ဆၣ် ​အ​ဝဲ​သ့ၣ်​တ​ဖၣ် ​အ​တၢ်​ဟူး​တၢ်​ဂဲၤ ​တၢ်​ဖံး​တၢ်​မၤ ​တၢ်​ဘၣ်​ထွဲ​ဒွံး​ဒွါ​လိာ်​သး ​ပ​သ့ၣ်​ညါ​ထွဲ​အီၤ​တ​သ့​ခဲ​လၢာ်​ဘၣ်. ​မ့ၢ်​လၢ​ပ​တ​နၢ်​ပၢၢ်​အ​တၢ်​ဟူး​တၢ်​ဂဲၤ​ဘၣ်​အ​ဃိ​န့ၣ်​လီၤ. ​ဖဲ​ပ​နီၢ်​ဆံး​အ​ခါ​ပ​တၢ်​သံ​ကွၢ်​အိၣ်​ဝဲ​အါ​မး ​ဘၣ်​ဆၣ်​မိၢ်​ပၢ်​ဖံ​ဖု​တ​ဖၣ်​စံး​ဆၢ​န့ၢ်​ပှၤ ​တ​သ့​ခဲ​လၢာ်​ဘၣ်. ​မ့ၢ်​လၢ​အ​ဝဲ​သ့ၣ်​တ​ဖၣ်​စ့ၢ်​ကီး ​တ​သ့ၣ်​ညါ​တၢ်​စံး​ဆၢ​ဘၣ်​အ​ဃိ​န့ၣ်​လီၤ. ​ဖဲ​ပ​မ့ၢ်​သံ​ကွၢ် “​မိၢ်​ဂံၢ်​သၣ်​တ​ဖၣ်​လဲၤ​ဟံး​န့ၢ်​တၢ်​ဟဲ​ဖဲ​လဲၣ်”​အ​ခါ​မ​တၤ​တ​ဂၤ​လၢ​က​စံး​ဆၢ​န့ၢ်​ပှၤ​တၢ်​သံ​ကွၢ်​အံၤ​လဲၣ်. ​ဒ်​န့ၢ်​အ​သိး​တၢ်​သံ​ကွၢ်​တ​ဖၣ်​ပ​သံ​ကွၢ်​အီၤ​သ့​ဝဲ ​အ​က​လုာ်​က​လုာ်​ဘၣ်​ဆၣ် ​ပ​က​စံး​ဆၢ​အ​ဝဲ​သ့ၣ်​တ​ဖၣ်​သ​တူၢ်​က​လာ်​အ​ဂီၢ် ​က​မ့ၢ်​တၢ်​ကီ​လၢ​ပ​ဂီၢ်​န့ၣ်​လီၤ. 

​စဲ​အ့ၣ်​တၢ်​ကူၣ်​သ့​အံၤ​ဟဲ​ကဲ​ထီၣ်​သး​ခီ​ဖျိ​တၢ်​သံ​ကွၢ်​သံ​ဒိး​တ​ဖၣ်​အ​ဃိ​န့ၣ်​ပ​စံး​အီၤ​သ့​ဝဲ​န့ၣ်​လီၤ. 

​ပှၤ​ဟီၣ်​ခိၣ်​ဖိ​တ​ဖၣ်​သံ​ကွၢ်​တၢ်​သံ​ကွၢ်​အံၤ ​မ့ၢ်​လၢ​ခိၣ်​ဃၢၤ​န့​ဆၢၣ်​အ​တၢ်​ဟူး​တၢ်​ဂဲၤ ​လၢ​လီၤ​က​မၢ​က​မၣ်​ဘၣ်​အ​ဝဲ​သ့ၣ်​တ​ဖၣ်​အံၤ ​ဒ်​သိး​က​သ့ၣ်​ညါ​ဝဲ​အ​ဂ့ၢ်​အ​ခၢး​အ​ခီၣ်​ထံး​ခိၣ်​ဘိ ​ဒ်​လဲၣ်​အ​ဂီၢ် ​န့ၣ်​လီၤ. ​ပ​မ့ၢ်​က့ၤ​ကွၢ်​က့ၤ​စဲ​အ့ၣ်​အ​တၢ်​စံၣ်​စိၤ​တဲ​စိၤ​တ​ဖၣ်​အံၤ​န့ၣ် ​ဟဲ​ခီ​ဖျိ​အ​သး​လၢ ​ပှၤ​အံၤ​ကၠံး(​နါ​ပ​စ​အ)​ဖိ​တ​ဖၣ်​အိၣ်​ဝံၤ ​တုၤ​ဃီၤ​ဆူ​ပှၤ​ဂ​ရံး​စ်(​Greek)​ဖိ​တ​ဖၣ်​အိၣ်​န့ၣ်​လီၤ. ​အ​ဝဲ​သ့ၣ်​တ​ဖၣ်​ဖြဲး​ဝဲ​လၢ​တၢ်​ဂံၢ်​တၢ်​ဒွး, ​က​သံၣ်​က​သီ​ဃုာ်​ဒီး ​တၢ်​သ့ၣ်​ညါ​နၢ်​ပၢၢ်​လၢ​မူ​ဖျၢၣ်​ပီ​ညါ(astronomy)​စ့ၢ်​ကီး​န့ၣ်​လီၤ. ​ပှၤ​ဆိ​က​မိၣ်​တၢ်​ဖိ​ဒိး ​စဲ​အ့ၣ်​ဖိ​တ​နီၤ​အ​မံၤ​ဒိၣ်​လၢ​ဂ​ရံး​စ် ​တ​ဖၣ်​လၢ​အ​မ့ၢ်​စိၤ​ခ​ရ့​တံ(​Socrate),​ပ​လ့ၤ​တိၣ်(Plato), ​ပဲၤ​သၣ်​ဂိ​ရး​စ်(​Pythaoras) ​ဒီး​အၤ​ရံး​စ​တိၤ​တၢၣ်(Aristotle)​သ့ၣ်​တ​ဖၣ် ​မ့ၢ်​ပှၤ​သ့ၣ်​တ​ဖၣ်​လၢ ​သူၣ်​လီၤ​တၢ်​ဆိ​က​မိၣ်​အ​ဒိၣ်​အ​ယိာ် ​လၢ​စဲ​အ့ၣ်​တၢ်​ဃု​သ့ၣ်​ညါ​တ​ဖၣ်​အ​ဂီၢ်​န့ၣ်​လီၤ. ​အ​ဝဲ​သ့ၣ်​တ​ဖၣ်​အ​တၢ်​ဂုာ်​ကျဲး​စၢး​လၢ​စဲ​အ့ၣ်​ပီ​ညါ​အ​ဂီၢ်, ​တၢ်​ဂံၢ်​တၢ်​ဒွး​အ​ဂီၢ်, ​တၢ်​ဆိ​က​မိၣ်​ပီ​ညါ​အ​ဂီၢ်​ဃုာ်​ဒီး ​မူ​ဖျၢၣ်​ပီ​ညါ​အ​ဂီၢ် ​လၢ​အ​ဒုး​အိၣ်​ထီၣ် ​ကီၢ်​မုၢ်​နုာ်​စဲ​အ့ၣ်​တၢ်​လဲၤ​ထီၣ်​လဲၤ​ထီၣ်​အ​က​ပၤ​ပၤ ​အ​ဂီၢ်​န့ၣ်​လီၤ. ​ပှၤ​စဲ​အ့ၣ်​ဖိ​တ​ဖၣ်​အ​တၢ်​သူၣ်​ဆူၣ်​သး​ဆူၣ်​ခီ​ဖျိ ​န့​ဆၢၣ်​အ​တၢ်​ဖံး​တၢ်​မၤ​အ​တၢ်​ဟူး​တၢ်​ဂဲၤ​တ​ဖၣ် ​ထုး​န့ၢ်​အ​ဝဲ​သ့ၣ်​အ​သး​ဒိၣ်​ဒိၣ်​မုၢ်​မုၢ်​ဒီး​မၤ​သူၣ်​ပိၢ်​သး​ဝး​ဝဲ​အ​ဝဲ​သ့ၣ်​တ​ဖၣ် ​အ​တၢ်​ဆိ​မိၣ်​အ​ဃိ ​အ​ဝဲ​သ့ၣ်​တ​ဖၣ်​သး​ဆူၣ်​လၢ​က​ဃု​သ့ၣ်​ညါ​န့​ဆၢၣ်​တၢ်​ဆံး​ဆၢ​တ​ဖၣ်​အံၤ​န့ၣ်​လီၤ. 

​ဒ်​သိး​ပ​က​မ့ၢ်​ပှၤ​တ​ဂၤ​လၢ ​အ​အိၣ်​ဒီး ​စဲ​အ့ၣ်​သး​တၢ်​ဆိ​မိၣ်​အ​ဂီၢ် ​ပ​က​ဘၣ်​အိၣ်​ဒီး​တၢ်​သူၣ်​ဒူ​သး​ဒူ ​လၢ​အ​မ့ၢ်​တၢ်​ဃု​သ့ၣ်​ညါ​တၢ်, ​တၢ်​သး​စွံ​က​တုၤ​လၢ ​တၢ်​အဲၣ်​ဒိး​ဃု​နၢ်​ပၢၢ်​တၢ်, ​တၢ်​ဃု​ထံၣ်​တၢ်​လၢ​အ​သီ, ​တၢ်​မၤ​ကွၢ်​တၢ်​ဒီး ​တၢ်​တ့​ထီၣ်​ဘှီ​ထီၣ်​တၢ် ​လၢ​အ​သီ​အ​က​လုာ်​က​လုာ်​န့ၣ်​လီၤ. ​တၢ်​သ့ၣ်​တ​ဖၣ်​အံၤ ​တ​မ့ၢ်​တၢ်​လၢ​အ​မၤ​က​မၣ်​တၢ်​နီ​တ​မံၤ​ဘၣ်. ​ပ​သူ​အီၤ​ကၢၤ​အီၤ​မ့ၢ်​သ့, ​က​မ့ၢ်​ဝဲ​တၢ်​လၢ​က​မၤ​စၢၤ​ဝဲ​ပ​နီၢ်​က​စၢၢ်​မ့ၢ်​ဂ့ၤ, ​ပ​ခိၣ်​ပ​ဃၢၤ​မ့ၢ်​ဂ့ၤ​အ​ဂီၢ်​န့ၣ်​လီၤ. ​ပ​သံ​ကွၢ်​တၢ်​ဒီး​ပ​လီ​ကီ​သ့ၣ်​ညါ​တၢ်​စံး​ဆၢ​တ​ဖၣ်​အံၤ​စ့ၢ်​ကီး ​တ​မ့ၢ်​တၢ်​မၤ​က​မၣ်​တၢ်​နီ​တ​မံၤ​စ့ၢ်​ကီး​ဘၣ်. ​တၢ်​သံ​ကွၢ်​တၢ်​အံၤ ​မ့ၢ်​ဝဲ​တၢ်​လၢ​က​ဒုး​နၢ်​ပၢၢ်​အါ​ထီၣ်​ပှၤ​တၢ် ​လၢ​ပ​တ​သ့ၣ်​ညါ​ဘၣ်​တ​ဖၣ်​န့ၣ်​လီၤ. ​တၢ်​သံ​ကွၢ်​တၢ်​အ​ဒိ ​တ​နီၤ​လၢ​အ​မ့ၢ်, “​မုၢ်​နၤ​ဒီး​မုၢ်​ဆါ​ဟဲ​ကဲ​ထီၣ်​အ​သး​သ့​လၢ​ကျဲ​ဒ်​လဲၣ်”, “​ဟီၣ်​ခိၣ်​ဟူး​ဟဲ​ကဲ​ထီၣ်​သး​အံၤ​မ့ၢ်​လၢ​မ​နုၤ​ဃိ​လဲၣ်”, “​တၢ်​ယူၢ်​မုၢ်​တၢ်​ယူၢ်​လါ​တ​ဖၣ်​ကဲ​ထီၣ်​သး​ဒ်​လဲၣ်”, “​မူ​ခိၣ်​စူၤ​သ့​လၢ​ကျဲ​ဒ်​လဲၣ်”, “​တၢ်​ဖိ​တၢ်​လံၤ​တ​ဖၣ်​တၢ်​မဲ​တၢ်​မါ​တ​ဖၣ်​ဒိၣ်​ထီၣ်​သ့​ဒ်​လဲၣ်”, “​မုၢ်​န့ၣ်​ထုး​ထီၣ်​တၢ်​က​ပီၤ​ဒီး​တၢ်​ကိၢ်​သ့​ဒ်​လဲၣ်”. ​တၢ်​သံ​ကွၢ်​တ​ဖၣ်​ပ​သံ​ကွၢ်​အီၤ​တ​လၢာ်​ဘၣ်. ​ဒ်​န့ၢ်​အ​သိး​တၢ်​စံး​ဆၢ​စ့ၢ်​ကီး​အိၣ်​က​သ့​ဧါ.

၂ - ​စဲး​ဖီ​က​ဟၣ်​အ​က​လုာ်​က​လုာ် ​ဒီး​လီ​ပီး​လီ​လၢ​ပ​ခိၣ်​ပ​ဃၢၤ​တ​ဖၣ်

​ဆၢ​က​တီၢ်​ခ့​ခါ​ခဲ​အံၤ​ပ​ခိၣ်​ပ​ဃၢၤ​တ​ဖၣ်​အိၣ်​ပှဲၤ​ဝဲ​ဒီး ​စဲး​ဖီ​က​ဟၣ် ​ဃုာ်​ဒီး​တၢ်​ပီး​တၢ်​လီ​လၢ ​အ​သူ​လီ​သ​ဟီၣ်​တ​ဖၣ်​စ့ၢ်​ကီး​န့ၣ်​လီၤ. ​စဲး​တ​ဖၣ်​မ့ၢ်​ဝဲ, ​က​ဘီ​ယူၤ​စဲး, ​က​ဘီ​စဲး, ​က​ဘီ​ထံ​စဲး, ​လ့ၣ်​မ့ၣ်​အူ​စဲး, ​သိ​လ့ၣ်​စဲး, ​မီၤ​တီၤ​တုၤ​စဲး, ​ချံ​စဲး, ​လီ​မ့ၣ်​အူ​စဲး​ဒီး ​စဲး​ဖီ​က​ဟၣ် ​လၢ​အ​ဂုာ်​အ​ဂၤ​အ​က​လုာ်​က​လုာ်​တ​ဖၣ် ​အိၣ်​ဝဲ​အါ​အါ​ဂီၢ်​ဂီၢ်​န့ၣ်​လီၤ. ​စဲး​တ​ဖၣ်​အံၤ​အ​တၢ်​ဖံး​တၢ်​မၤ​ဒီး ​အ​တၢ်​ကဲ​ဘျုး​လၢ​ပှၤ​ဟီၣ်​ခိၣ်​ဖိ​အ​ဂီၢ်​အိၣ်​အါ​မး​အ​ဃိ ​တၢ်​မ့ၢ်​တ​သူ​အ​ဝဲ​သ့ၣ်​ဘၣ်​ဒီး ​တၢ်​လဲၤ​ထီၣ်​လဲၤ​ထီ​စ့ၢ်​ကီး ​ဟဲ​အိၣ်​ထီၣ်​သး​တ​သ့​ဘၣ်​န့ၣ်​လီၤ,​စဲး​အ​က​လုာ်​တ​ဖၣ်​အ​ကျါ​တ​နီၤ ​ဘၣ်​တၢ်​ဒုး​ဟူး​ဒုး​ဂဲၤ​အီၤ​လၢ ​ပှၤ​ဟီၣ်​ခိၣ်​ဖိ​အ​ဂံၢ်​အ​ဘါ, ​ထံ​တ​မၢၢ်, ​တၢ်​ဂံၢ်​တၢ်​ဘါ​လၢ​အ​မ့ၢ်​ထံ​ချီ​သ​ဝံ, ​သိ​ဒွဲၣ်, ​သိ​သ​ဝံ​ဒီး​လီ​သ​ဟီၣ်​စ့ၢ်​ကီး​န့ၣ်​လီၤ.

​တၢ်​သ့ၣ်​ညါ​နၢ်​ပၢၢ် ​လၢ​ဘၣ်​ဃး​စဲး​ဖီ​က​ဟၣ်​အ​ဂ့ၢ်​အ​ကျိၤ​တ​ဖၣ်​အံၤ ​ဟဲ​ခီ​ဖျိ​သး​လၢ​ပှၤ​ဟီၣ်​ခိၣ်​ဖိ​အ​တၢ်​ဃု​သ့ၣ်​ညါ​ဝဲ ​ထး​ဂ့ၢ်​ထး​ကျိၤ​အ​က​လုာ်​က​လုာ်​ဒီး ​ဂံၢ်​သ​ဟီၣ်​လၢ​အ​မ့ၢ်​အဲ​န​ကၠံၤ(​န​ည​န​မါ​ပ)​တ​ဖၣ်​လၢ​ဟ့ၣ်​ဝဲ​ထး​တ​ဖၣ်​အံၤ​တၢ်​ဂံၢ်​တၢ်​ဘါ​ဒ်​သိး​က​ဟူး​က​ဂဲၤ​ဝဲ​က​သ့​အ​ဂီၢ်​န့ၣ်​လီၤ. ​စဲး​လၢ​ပ​ထံၣ်​အီၤ​လၢ​ပ​ခိၣ်​ပ​ဃၢၤ​သ့ၣ်​တ​ဖၣ်​အံၤ ​ဆီ​တ​လဲ​တ့ၢ်​လံ​အ​က့ၢ်​အ​ဂီၤ ​တ​ဆီ​ဘၣ်​တ​ဆီ​လံ​န့ၣ်​လီၤ. ​အ​ဒိ, ​လ့ၣ်​မ့ၣ်​အူ​စဲး​လၢ​ညါ​တ​က​သုၣ် ​သူ​ဝဲ​ထံ​ချီ​သ​ဝံ​လၢ​အ​ဆူၣ်​ဒ်​သိး​က​ဆီၣ်​တ​ရံး​ဝဲ ​အ​ပၣ်​ရံး​ဒီး​လဲၤ​တၢ်​က​သ့​အ​ဂီၢ်​န့ၣ်​လီၤ.​ဆၢ​က​တီၢ်​ခဲ​အံၤ ​လ့ၣ်​မ့ၣ်​အူ​စဲး​တ​ဖၣ်​သူ​ဝဲ​သိ​ဒွဲၣ်​ဒီး ​လီ​သ​ဟီၣ်​လၢ​က​ဆီၣ်​ရံး​ဝဲ​စဲး​က​ဟၣ်​အံၤ​န့ၣ်​လီၤ. ​စဲး​အ​တၢ်​ဆီ​တ​လဲ​သး​တ​ဖၣ်​အံၤ​က​အိၣ်​ဒံး​ဝဲ​ဆူ​ညါ​အ​ဃိ ​ပ​က​ဘၣ်​ပာ်​သူၣ်​ပာ်​သး​အီၤ​န့ၣ်​တ​က့ၢ်. 

​စဲး​အ​ဆံး​လၢ​ပ​ခိၣ်​ပ​ဃၢၤ​တ​ဖၣ် ​သူ​ဝဲ​လီ​သ​ဟီၣ်​တ​ဖၣ်​လၢ​အ​မ့ၢ် ​လီ​ပီး​လီ​တ​ဖၣ်​စ့ၢ်​ကီး​အိၣ်​ဝဲ​အါ​အါ​ဂီၢ်​ဂီၢ်​န့ၣ်​လီၤ. ​လီ​ပီး​လီ​တ​နီၤ​ကျါ​မ့ၢ်​ဝဲ,​လီ​တဲ​စိ, ​လီ​သၣ်, ​နၢ်​ရံၣ်, ​ခိၣ်​ဖၠူ​ထၢၣ်, ​တၢ်​ဒိ​တၢ်​ဂီၤ​ဒၢ, ​တၢ်​ဂီၤ​မူ​ဒၢ ​ဃုာ်​ဒီး​လီ​ဆှိ​သ့ၣ်​တ​ဖၣ်​အ​က​လုာ်​က​လုာ်​န့ၣ်​လီၤ. ​အ​ဝဲ​သ့ၣ်​တ​ဖၣ်​မၤ​တၢ်​ဒ်​လဲၣ်​ဒီး ​ဟဲ​ကဲ​ထီၣ်​သး​ဒ်​လဲၣ်​န့ၣ် ​ပ​နၢ်​ပၢၢ်​အီၤ​က​သ့​အ​ဂီၢ် ​ပ​က​ဘၣ်​မၤ​လိ​စဲ​အ့ၣ်​ပီ​ညါ ​လၢ​ဘၣ်​ဃး​ဒီး​တၢ်​သ့ၣ်​တ​ဖၣ်​အံၤ​န့ၣ်​လီၤ.

​လီ​ပီး​လီ​တ​ဖၣ်​အံၤ​စ့ၢ်​ကီး ​ဆီ​တ​လဲ​တ့ၢ်​လံ​အ​က့ၢ်​အ​ဂီၤ​န့ၣ်​လီၤ. ​အ​ဒိ, ​တၢ်​ဂီၤ​မူ​ဒၢ ​လၢ​ပ​ကွၢ်​လၢ​ပ​နီၢ်​ဆံး​ခါ​တ​ဖၣ် ​အိၣ်​ဝဲ​ဒီး ​အ​က့ၢ်​အ​ဂီၤ​လၢ​အ​မဲာ်​လဲၢ်​အ​ခံ​ကျူ​န့ၣ်​လီၤ. ​အ​တ​ယၢၢ်​စ့ၢ်​ကီး​ဃၢ​ဝဲ​န့ၣ်​လီၤ. ​ဘၣ်​ဆၣ်​ခ့​ခါ​ခဲ​အံၤ​တၢ်​ဂီၤ​မူ​ဒၢ​တ​ဖၣ် ​ဆံး​လီၤ​ဒီး​ဖှံ​လီၤ​ဝဲ​လံ​န့ၣ်​လီၤ, ​ဒ်​န့ၢ်​အ​သိး ​လီ​တဲ​စိ​လၢ​ညါ ​ပ​ကွၢ်​လိာ်​ပ​သး​ဒ်​တၢ်​ဂီၤ​မူ​တ​သ့​ဘၣ်. ​ဘၣ်​ဆၣ်​ခဲ​အံၤ ​ပ​နၢ်​ဟူ​လိာ်​သး​က​လုၢ်​တ​ကး​ဘၣ် ​မဲာ်​သ​ကိး​မဲာ်​စ့ၢ်​ကီး ​ပ​အိၣ်​သ​ကိး​လိာ်​သး​သ့​ဝဲ ​န့ၣ်​လီၤ. ​ပ​မ့ၢ်​ကွၢ်​က့ၤ​တၢ်​ဆီ​တ​လဲ​တ​ဖၣ်​အံၤ ​မ့ၢ်​လၢ​ပှၤ​ဟီၣ်​ခိၣ်​ဖိ​တ​ဖၣ်​ဃု​ထံၣ်​အ​နီၢ်​က​စၢ် ​အ​တၢ်​လီၤ​တူာ်​လီၤ​ကာ်​ဝံၤ ​ဘှီ​ဂ့ၤ​က့ၤ​ဝဲ​ဒီး ​မၤ​ဂ့ၤ​ထီၣ်​က့ၤ​အ​တၢ်​ဃု​ထံၣ်​တ့ၢ်​ဃာ်​ဝဲ​တ​ဖၣ် ​ဆူ​ညါ​ကွ့ၢ်​ကွ့ၢ်​န့ၣ်​လီၤ. 

​လီ​သ​ဟီၣ်​န့ၣ် ​ဘၣ်​တၢ်​သူ​အီၤ ​အါ​အါ​ဂီၢ်​ဂီၢ်​လၢ​ဟီၣ်​ခိၣ်​အံၤ​န့ၣ်​လီၤ. ​ဘၣ်​ဆၣ်​ပ​ဆိ​က​မိၣ်​တ​ဘျီ​ဘျီ​ဧါ​လၢ​လီ​သ​ဟီၣ်​အံၤ​ဟဲ​ကဲ​ထီၣ်​သး​သ့​ဒ်​လဲၣ်. ​လီ​သၣ်​ဒီး​လီ​ဆှိ​တ​ဖၣ်​အံၤ ​ထုး​ထီၣ်​ဝဲ​တၢ်​က​ပီၤ​သ့​ဒ်​လဲၣ်. ​စဲး​လၢ​သူ​ဝဲ​လီ​သ​ဟီၣ်​တ​ဖၣ်​အံၤ ​ကဲ​ထီၣ်​အ​သး​သ့​လၢ​ကျဲ​ဒ်​လဲၣ်. ​တၢ်​သံ​ကွၢ်​တ​ဖၣ်​အံၤ​ဒ်​သိး​ပ​စံး​ဆၢ​အီၤ​က​သ့​အ​ဂီၢ်​ပ​က​ဘၣ်​နၢ်​ပၢၢ်​စဲ​အ့ၣ်​ပီ​ညါ ​လၢ​က​ဒုး​နၢ်​ပၢၢ်​ၡဲ​ပြး​ပှၤ​တၢ်​က​ပီၤ​ဒီး​လီ​သ​ဟီၣ်​အ​တၢ်​ဘၣ်​ထွဲ​လိာ်​သး ​ဃုာ်​ဒီး​လီ​သ​ဟီၣ်​ဒီး ​စဲး​က​ဟၣ်​အ​တၢ်​ဘၣ်​ထွဲ​လိာ်​သး​အ​ဂ့ၢ်​ခီၣ်​ထံး​သ့ၣ်​တ​ဖၣ် ​န့ၣ်​လီၤ.

၃ - ​ကွၢ်​ဃီၤ​ဆူ​ခါ​ဆူ​ညါ

​ပှၤ​ဟီၣ်​ခိၣ်​ဖိ​တ​ဖၣ် ​လၢ​ဒိၣ်​စိ​လၢ​ဟီၣ်​ခိၣ်​အ​မဲာ်​ညါ​တ​ဖၣ် ​မ့ၢ်​ဝဲ​ပှၤ​လၢ​ကူၣ်​ဘၣ်​ကူၣ်​သ့​တ​ဖၣ်​န့ၣ်​လီၤ. ​လၢ​တၢ်​န့ၢ်​အ​ဃိ​ပ​က​ထီ​ဒါ​ဟီၣ်​ခိၣ်​တၢ်​လဲၤ​ထီၣ်​လဲၤ​ထီ​ဒီး ​တၢ်​ဆီ​တ​လဲ​တ​ဖၣ်​အံၤ ​တ​မ့ၢ်​တၢ်​ညီ​လၢ​နၤ​ယၤ​အ​ဂီၢ်​ဘၣ်. ​တ​မ့ၢ်​တၢ်​အ​ဘၣ်​စ့ၢ်​ကီး​ဘၣ်. ​ကျဲ​အိၣ်​ဝဲ​တ​ဘိ​လၢ​ပ​က​ဘၣ်​လူၤ​ပိာ်​ထွဲၣ်​တၢ်​ကူၣ်​သ့​တ​ဖၣ်​အံၤ​အ​ခံ ​ဒီး​လဲၤ​လၢ​ညါ​န့ၣ်​လီၤ. ​တၢ်​လဲၤ​ထီၣ်​လဲၤ​ထီ​အိၣ်​ဝဲ​အ​က​ပၤ​ပၤ​အ​ကျါ ​စဲး​ဖီ​က​ဟၣ်​သ​နၢၣ်,​က​သံၣ်​က​သီ​သ​နၢၣ်, ​တၢ်​တ့​တၢ်​ဘှီ​သ​နၢၢၣ်, ​စဲ​အ့ၣ်​ပီ​ညါ​သ​နၢၣ်​ဒီး ​မူ​ဖျၢၣ်​တၢ်​ဃု​သ့ၣ်​ညါ​သ​နၢၣ် ​အ​က​လုာ်​က​လုာ် ​အိၣ်​ဝဲ​အါ​အါ​ဂီၢ်​ဂီၢ်​န့ၣ်​လီၤ. ​ဒ်​ပ​ထံၣ်​ဘၣ်​အ​သိး, ​ပှၤ​စဲ​အ့ၣ်​ဖိ​တ​ဖၣ် ​တ့​ထီၣ်​ဝဲ​တၢ်​လီၤ​ဆီ​လီၤ​လး​တ​ဖၣ် ​တ​နီၤ​အ​ကျါ​လၢ​အ​မ့ၢ်​ဆ့​ကၤ​ယူၤ,​ရီး​ကဲး, ​သိ​လ့ၣ်​ယူၤ, ​တ​ရိ(​စိး​က​ပ့ၤ​ဖိ- ​က​ဟၣ်​ယူၤ​လၢ​က​လံၤ​ကျါ​လၢ ​ပှၤ​တ​အိၣ်​နီ​အီၤ​လၢ​အ​ပူၤ​ဘၣ်), ​ပှၤ​က​ညီ​ရိ​ဘီး,​တၢ်​ဖိ​ဃၣ်​ရိ​ဘီး​အ​က​လုာ်​က​လုာ် ​ဃုာ်​ဒီး​ကျိ​ချံ​ပှၤ​သၣ် ​လၢ​အ​ကူၣ်​အၢ​ကူၣ်​သီ​တၢ်​တ​ဖၣ်​စ့ၢ်​ကီး​န့ၣ်​လီၤ. ​ထဲၣ်​က​နီ​လီၤ​ကၠံၢ်(T​echnology)​သ့ၣ်​တ​ဖၣ်​အံၤ ​ဘၣ်​တၢ်​ပၢ​ဆှၢ​ရဲၣ်​ကျဲၤ​အီၤ ​လၢ​ခိၣ်​ဖၠူ​ထၢၣ်​အ​ခိၣ်​နူၣ်​န့ၣ်​လီၤ.

​ဒ်​တၢ်​လဲၤ​ထီၣ်​လဲၤ​ထီ​ဒီး ​တၢ်​ဆီ​တ​လဲ​အိၣ်​အ​သိး, ​တၢ်​ဖံၤ​တၢ်​မၤ​လၢ​ပှၤ​ဟီၣ်​ခိၣ်​ဖိ ​ဆိ​မိၣ်​လၢ​က​မၤ​ဘျုး​အီၤ​တ​ဖၣ် ​တ​ဘျီ​တ​ခီၣ်​မၤ​ဘၣ်​ဒိ​က့ၤ​ဟီၣ်​ခိၣ်​သ့​ဝဲ​စ့ၢ်​ကီး​န့ၣ်​လီၤ. ​အ​ဒိ, ​စဲး​ဖီ​က​ဟၣ်​လၢ​သူ​ဝဲ​သိ​ဒွဲၣ်​တ​ဖၣ် ​ထုး​ထီၣ်​ဝဲ​က​လံ​လၢ​အ​ဘၣ်​အၢ​တ​ဖၣ်​ဒီး ​မၤ​ဘၣ်​ဒိ​ဝဲ​ဟီၣ်​ခိၣ်​ဖျၢၣ်​အ​တၢ်​အိၣ်​ဆူၣ်​အိၣ်​ချ့ ​တ​ကး​ဘၣ်​ဃုာ်​ဒီး ​တၢ်​သး​သ​မူ​လၢ​ခိၣ်​ဃၢၤ​န့​ဆၢၣ်​အ​ပူၤ​စ့ၢ်​ကီး​န့ၣ်​လီၤ. ​ဘၣ်​ဆၣ်​ပှၤ​ဟီၣ်​ခိၣ်​ဖိ​တ​ဖၣ်​အ​တၢ်​ပြၢ​လိာ်​အ​သး ​လၢ​တၢ်​စိ​တၢ်​က​မီၤ​အံၤ ​ပ​တုာ်​အ​သး​တ​န့ၢ်​ညီ​ညီ​ဘၣ်​အ​ဃိ​တၢ်​လဲၤ​ထီၣ်​လဲၤ​ထီ​ဒီး​တၢ်​ဘၣ်​ဒိ​ဘၣ်​ထံး​လၢ​ပှၤ​ဟီၣ်​ခိၣ်​ဖိ​ဂီၢ်​မ့ၢ်​ဂ့ၤ, ​ခိၣ်​ဃၢ​န့​ဆၢၣ်​ဂီၢ်​မ့ၢ်​ဂ့ၤ ​မ့ၢ်​ဝဲ​တၢ်​ခံ​ခါ​လၢ​က​ဘၣ်​အိၣ်​သ​ဃဲၤ​လိာ်​အ​သး​ထီ​ဘိ​န့ၣ် ​ပ​စံး​အီၤ​သ့​ဝဲ​န့ၣ်​လီၤ. 

​ပှၤ​ဟီၣ်​ခိၣ်​ဖိ​တ​ဖၣ်​အ​တၢ်​သ့​တၢ်​ဘၣ်​တ​ဖၣ်​အံၤ ​အ​ပ​တီၢ်​ထီ​ထီၣ်​ကွ့ၢ်​ကွ့ၢ်​န့ၣ်​လီၤ. ​အ​ဝဲ​သ့ၣ်​တ​ဖၣ်​ဟံး​န့ၢ်​န့​ဆၢၣ်​ခိၣ်​ဃၢၤ​တ​ဖၣ် ​အ​တၢ်​ဂံၢ်​တၢ်​ဘါ​ဝံၤ ​ဆီ​တ​လဲ​က့ၤ​ဝဲ​အ​က့ၢ်​အ​ဂီၤ ​ဆူ​လီ​သ​ဟီၣ်​ဝံၤ​သူ​ဝဲ ​လၢ​အ​တၢ်​ကဲ​ဘျုး​ဂီၢ်​န့ၣ်​လီၤ. ​အ​ဒိ, ​စိၤ​လၤ​လၢ​အ​ဒိး​န့ၢ်​မုၢ်​တၢ်​က​ပီၤ​ဝံၤ ​ဆီ​တ​လဲ​က့ၤ​ဝဲ​ဆူ​လီ​သ​ဟီၣ်​အံၤ ​မ့ၢ်​တၢ်​လီၤ​က​မၢ​က​မၣ်​တ​ခါ​လၢ ​ပှၤ​ဟီၣ်​ခိၣ်​ဖိ​အ​တၢ်​သ့​တၢ်​ဘၣ်​အ​ကျါ​တ​ခါ​န့ၣ်​လီၤ,

​ဒ်​ပ​ထံၣ်​ဘၣ်​တ့ၢ်​လံ​အ​သိး ​ဟီၣ်​ခိၣ်​ဖိ​အ​တၢ်​ကူၣ်​သ့​ကူၣ်​ဘၣ်​တ​ဖၣ်​အံၤ ​တ​ပ​တုာ်​အ​သး​ဖဲ​အံၤ​ဘၣ်,​က​အိၣ်​ဒံး​ဆူ​ညါ​န့ၣ်​လီၤ. ​ပ​ခိၣ်​ပ​ဃၢၤ​တ​ဖၣ်​အိၣ်​ပှဲၤ​ဝဲ​ဒီး ​ထဲၣ်​က​နီ​လီၤ​ကၠံၢ် ​လၢ​သူ​ဝဲ​နီၢ်​ဂံၢ်​နီၢ်​ဒွး​တ​ဖၣ်​အံၤ ​လုာ်​ဘၢ​ကွံာ်​ပှၤ​က​ယီ​က​ယီ​လံ​န့ၣ်​လီၤ. ​ကျိၣ်​စ့​တ​ဖၣ်​လၢ​အိၣ်​ဒီး​အ​မိၢ်​ပှၢ်​တ​ဖၣ်​အံၤ ​မုၢ်​တ​နံၤ​ဘၣ်​သ့ၣ်​သ့ၣ်​က​လီၤ​မၢ်​ကွံာ်​ဝဲ​န့ၣ်​လီၤ. ​ဆူ​ညါ​ပ​က​ဘၣ်​သူ​ဝဲ​ထဲ ​နီၢ်​ဂံၢ်​လၢ​အိၣ်​ဖျါ​သး​လၢ​လီ​တဲ​စိ​ပူၤ​မ့ၢ်​ဂ့ၤ​ခိၣ်​ဖၠူ​ထၢၣ်​ပူၤ​မ့ၢ်​ဂ့ၤ ​လၢ​တၢ်​ဆါ​တၢ်​ပှ့ၤ​ဂီၢ်​န့ၣ်​လီၤ. ​တ​ယံာ်​လၢ​ဘၣ်​ခါ​ဆူ​ညါ​ပ​ခိၣ်​ပ​ဃၢၤ​တ​ဖၣ်​က​အိၣ်​ပှဲၤ​ဝဲ​ဒီး ​ရိ​ဘီး​အ​က​လုာ်​က​လုာ်​တ​ဖၣ်​အံၤ​ပ​ဃ့ၢ်​ပူၤ​ဖျဲး​သး​တ​သ့​ဘၣ်​န့ၢ်​ပ​ကြၢး​ပာ်​သူၣ်​ပာ်​သူၣ်​ပာ်​သး​န့ၣ်​လီၤ.

​လၢ​ကီၢ်​သူ​လ့ၤ​အ​ဂီၤ ​ပ​ဝဲ​က​ညီ​ဖိ​စၢၤ​သွဲၣ်​သီ ​လၢ​အိၣ်​ဒီး​ဆၢ​ဂ့ၢ်​က​တီၢ်​ဘၣ်​တ​ဖၣ် ​မ်​ပ​စိာ်​မဲာ်​စိာ်​နါ ​မၤ​လိ​ကူၣ်​သ့ ​ပာ်​ဖှိၣ်​ထီၣ်​ပ​သး​လၢ ​ကီၢ်​သူ​လ့ၤ​အ​ဂီၢ်​တ​က့ၢ်​န့ၣ်​မ့ၢ်​ပ​တၢ်​ကွဲ​မုာ်​ ​​ဆူ ​စဲ​အ့ၣ်​ပီ​ညါ​လၢကီၢ်​သူ​လ့ၤ​ဂီၢ်

န့ၣ်​လီၤ.