​နံၣ်​ခံ​က​ယၤ​တၢ်​လဲၤ​ခီ​ဖျိ​ဒီး ​

ဆူ​ညါ​တ​စိၤ​တၢ်​မုၢ်​လၢ်​ကွၢ်​စိ

​ဒိ​က​နၣ်​ကွဲၤ​ဒၢ​က​လုၢ် ​မ့​တ​မ့ၢ် ​ဖး​လၢ​လံာ် ​ဘၣ်​ထွဲ ​က​ညီ​အ​တၢ်​လဲၤ​ခီ​ဖျိ​ဒီး ​ပ​တၢ်​မုၢ်​လၢ်​ကွၢ်​စိ​ဆူ​ညါ​လၢ​ကီၢ်​သူ​လ့ၤ​အ​ဂီၢ်    Print Friendly PDF 

အ​ကူာ်(၁)​ နံၣ်​ခံ​က​ယၤ​တၢ်​လဲၤ​ခီ​ဖျိ  PART  1

ဒိ​က​နၣ်​ ​ကွဲၤ​ဒၢ​က​လုၢ် ​အ​ကူာ်(၁) Listen to  podcast in Karen(Sqaw) - Part 1 [29:11 min]

​အ​ကူာ်(၂)  ကီၢ်​သူ​လ့ၤ​အ​တၢ်​မုၢ်​လၢ်​ကွၢ်​စိ  Part 2

ဒိ​က​နၣ်​ ​ကွဲၤ​ဒၢ​က​လုၢ် ​အ​ကူာ်(၂) Listen to  podcast in Karen(Sqaw) - Part 2  [25:52 min]

​​အ​ကူာ်(၃) ​အ့​ၡၢၣ်​မုၢ်​ထီၣ်​ဘီၣ်​သိၣ်​ဒီး ​ဆူ​ညါ​တ​စိၤ​တၢ်​သ့​တၢ်​ဘၣ်  Part 3

ဒိ​က​နၣ်​ ​ကွဲၤ​ဒၢ​က​လုၢ် ​အ​ကူာ်(၃) Listen to  podcast in Karen(Sqaw) - Part 3  [20:31 min]

​လံာ်​ဆီ​ရဲၣ်​တ​ဘ့ၣ်​အံၤ​အ​ပူၤ ​ယ​က​တဲ​ဘၣ်​ယ​ပှၤ​က​လုာ်​လၢ​ ယ​တၢ်​ဆိ​က​မိၣ်​ဘၣ်​ထွဲ နံၣ်​ခံကယၤ​ က​ညီ​ဖိ​အ​တၢ်​လဲၤ​ခီ​ဖျိ ​ဒီး​ခါ​ဆူ​ညါ ​အ​နံၣ်​ယဲၢ်​ဆံ​ အ​တၢ်​မုၢ်​လၢ်​ကွၢ်​စိ​န့ၣ်​လီၤ. 

​တၢ်​အၢၣ်​လီၤ​ထွဲ - ​တၢ်​ကွဲး​တ​ယုၢ်​အံၤ ​မ့ၢ်​ပှၤ​တ​ဂၤ​အ​တၢ်​ထံၣ်​အ​တၢ်​ဆိ​က​မိၣ် ​ဘၣ်​ဆၣ် ​ပှၤ​အါ​ဂၤ​ဟ့ၣ်​ကူၣ်​ဘှီ​ဘၣ်​မၤ​လိၤ​စၢၤ​အ​ဃိ ​ယ​အၢၣ်​လီၤ​စံး​ဘျုး​ဘၣ်​ပှၤ​ကိး​ဂၤ​လၢ ​အ​တၢ်မၤ​သ​ကိး​​န့ၣ်​လီၤ.

​​ပ​ကွၢ်​က​ဒါ​က့ၤ ​နံၣ်​ခံ​က​ယၤ​လၢ​လဲၤ​ပူၤ​ကွံာ်, ​ပ​ပှၤ​က​လုာ်​အ​တၢ်​လဲၤ​ထီၣ်​လဲၤ​ထီ​န့ၣ် ​ဟဲ​ဒီး​အ​သ​မူ​အ​သ​ကိး ​အ​သိး​န့ၣ် ​က​လုာ်​တၢ်​လီၤ​တ​သြူး​စ့ၢ်​ကီး ​ဟဲ​ပိာ်​လိာ်​အ​ခံ​ဒီး ​ဒ့ၣ်​ဒီး​ဖိ​န့ၣ်​လီၤ. 


​တၢ်​ဂ့ၤ​ဟဲ​ဒီး​အ​သ​ကိး, ​တၢ်​အၢ​ဟဲ​ဒီး​အ​သ​ကိး​လီၤ. 


​​ပှၤ​က​လုာ်​တ​ဖၣ်​လၢ​ဟီၣ်​ခိၣ်​ချၢ ​သူၣ်​လီၤ​ဆီ​လီၤ​အ​သး​န့ၢ် ​လဲၤ​ထီၣ်​လဲၤ​ထီ ​မဲာ်​ဘျ့​နါ​ဆှီ​ဒီး ​လဲၤ​တ​လၢ​ကွံာ်​ပှၤ, ​ဘၣ်​ဆၣ် ​ယ​ထံၣ်​ဘၣ်​လၢ ​ဟီၣ်​ခိၣ်​အ​မဲာ်​ဖံး​ခိၣ်​န့ၣ် ​ပှၤ​က​လုာ်​တ​ဖၣ်​န့ၣ် ​တ​ဖၠဲး​လီၤ​ဆီ​န့ၢ်​က​ညီ​ဖိ​ဘၣ်.​တၢ်​လၢ​အ​လီၤ​ဆီ​န့ၣ်​က​အိၣ်​ဒၣ် ​တၢ်​ဂုာ်​ကျဲး​စၢး​ဒီး ​တၢ်​ရိၣ်​ဖှိၣ်​က​ရၢ​က​ရိ​လိာ်​သး​န့ၣ်​လီၤ. ​ခါ​ဆူ​ညါ​အ​ဂီၢ် ​ပ​က​ကွၢ်​စိ​ဆိ​က​မိၣ်​သ​ကိး ​တၢ်​လၢ​ပ​ကြၢး​မုၢ်​လၢ်​မံ​မိၢ်​တိ​ဖျိ​ဂုာ်​ကျဲး​စၢး ​သူၣ်​လီၤ​ဆီ​လီၤ​ပ​သး​ဒ်​လဲၣ်​အ​ဂ့ၢ်​န့ၣ်​လီၤ. ​တ​ချုး​ပ​စံး​သ​ကိး​တၢ်​လၢ​ခါ​ဆူ​ညါ​အ​ဂ့ၢ်​န့ၣ် ​ပ​က​ကွၢ်​က​ဒါ​က့ၤ​တၢ်​လဲၤ​ပူၤ​ကွံာ် ​တ​ဆံး​တ​က့ၢ်​ဒီး​ပဲာ်​ထံ​နီၤ​ဖး​က့ၤ ​ပ​တၢ်​အိၣ်​သး​ခဲ​အံၤ.


၁၈၂၄-၂၀၂၄, ​တၢ်​ဆီ​တ​လဲ​ဒိၣ်​ဒိၣ်​မုၢ်​မုၢ်​လၢ ​က​ညီ​က​လုာ်​ထံၣ်​ဘၣ်​န့ၣ် ​အိၣ်​လံ​အ​နံၣ်​ခံ​က​ယၤ(၂၀၀)​လံ. ​ဖဲ ၁၈၂၄ ​ကိၤ​လၤ​ဝါ​ပှၤ​မၤ​လဲၢ်​အီၣ်​ကီၢ် ​စး​ထီၣ်​ဒုး​လိာ်​အ​သး​ဒီး ​ကီၢ်​ပံၤ​ယီၤ​စီၤ​ပၤ ​အ​ခီၣ်​ထံး​တၢ​တ​ဘျီ​ဝံၤ​ဒီး ​တၢ်​ဆီ​တ​လဲ​လၢ​က​ညီ​က​လုာ်​ထံၣ်​ဘၣ်​န့ၣ် ​တ​မ့ၢ်​ဒ်​သိး​ဖံ​ဖု​လၢ​ပျၢၤ​ထံၣ်​ဘၣ်​လၢၤ​ဘၣ်. ​တၢ်​ဆီ​တ​လဲ​လၢ​အ​အိး​သ​ပှၢ်​ကွံာ် ​ကီၢ်​ပံၤ​ယီၤ​ဒီ​တ​ဘ့ၣ်​န့ၣ် ​အိး​သ​လၣ်​ထီၣ်​စ့ၢ်​ကီး ​က​ညီ​က​လုာ်​န့ၣ်​လီၤ. ​တၢ်​လဲၤ​ခီ​ဖျိ​အ​နံၣ်​ခံ​က​ယၤ​အံၤ ​တၢ်​သ့ၣ်​ညါ​အီၤ​ဒ်​အ​ခီၣ်​ထံး​တ​ပ​တီၢ် ​က​ညီ​က​လုာ်​အ​တၢ်​လဲၤ​ထီၣ်​လဲၤ​ထီ ​ဒီး ​အ​ပူၤ​ကွံာ် ၇၅​နံၣ်​န့ၣ် ​မ့ၢ်​က​ညီ​တၢ်​ကိၢ်​တၢ်​ဂီၤ​တၢ်​ဂာ်​သွံၣ်​ဂာ်​စီၤ ​တၢ်​အီၣ်​မဲာ်​ထံ​မဲ​နိ ​တၢ်​သး​အုး​သး​ကး ​တၢ်​သူၣ်​ဆံး​သး​ဆံး ​တၢ်​မဲာ်​ဖ့​နါ​ဖ့​န့ၣ်​လီၤ. ​ပ​မ့ၢ်​ဒွး​က​ညီ​က​လုာ်​အ​ကွၢ်​ဆၢၣ်​မဲာ် ​စး​ထီၣ်​လၢ၁၉၄၂​ဖဲ ​ပှၤ​ယ​ပၣ်​ဖိ​ဟဲ​နုာ်​လီၤ ​ဆူ​ကီၢ်​ပံၤ​ယီၤ​ပူၤ​ဃုာ်​ဒီး​ဘံၣ်​အၣ်​အ့ၣ်​ဒီး ​မၤ​ဒၢၣ်​က​ညီ​ဒူ​သ​ဝီ ​စး​ထီၣ်​လၢ ​မုၢ်​ထီၣ်​ဖၣ်​ပူၣ် ​တုၤ​မုၢ်​နုာ်​ထံ​ထၣ်​စွ့​န့ၣ် ​စု​က​ဝဲၤ​တၢ်​ကိၢ်​တၢ်​ဂီၤ​အံၤ ၇၅​နံၣ် ​တ​ကး​လၢၤ​ဘၣ်. ​အိၣ်​လံ​လွံၢ်​စိၤ​ယဲၢ်​စိၤ​လံ​န့ၣ်​လီၤ. 


​စး​ထီၣ်​ဖဲ ​ကိၤ​လၤ​ဝါ ​မၤ​န့ၢ်​ပၢ ​ကီၢ်​ပံၤ​ယီၤ​လာ်​ခီ​လံၤ​လံၤ ​ပှၤ​က​လုာ်​လၢ ​တ​တူၢ်​လိာ်​ကိၤ​လၤ​ဝါ​တၢ်​ပၢ​တ​ဖၣ် ​မၤ​ဒၢၣ်​မၤ​ဆါ​က​ညီ​ဒူ​သ​ဝီ, ​ဒွဲၣ်​အူ​က​ညီ​ဘု​ဖီ​လၢ​န့ၣ်​လံၤ​လံၤ​လံ​အ​ဃိ​ဒီး ​စု​က​ဝဲၤ ​တၢ်​ဘၣ်​ဂံာ်​ဂုာ်​န့ၣ် ​စး​ထီၣ်​အ​သး ​လၢ​န့ၣ်​လံၤ​လံၤ​လံ​န့ၣ်​လီၤ. 


​နံၣ်​လၢ​အ​က​ယၤ​လံ ​ဘၣ်​ဆၣ်​ပ​တၢ်​ကွၢ်​ဆၢၣ်​မဲာ် ​တ​ဝံၤ​ဒံး​ဘၣ်. ​ပ​တ​လီၤ​မၢ်​စ့ၢ်​ကီး​ဒံး​ဘၣ်​ဒီး ​ပ​တုၤ​လီၤ​ဆူ​လၢ​ကျဲ​ဖး​ဒ့​လံ. ​ပ​ဝံၢ်​ထီၣ်​ပ​ခိၣ် ​ပ​ကွၢ်​စိ​ဃီၤ​တၢ်​ယံၤ​ယံၤ ​ပှဲၤ​ဒီး​တၢ်​မုၢ်​လၢ်​ဒံး ​လၢ ​နံၣ်၂၀၂၄ ​က​မ့ၢ်​နံၣ်​လီၤ​ဆီ​လၢ ​တၢ်​ဆီ​တ​လဲ​အ​တြဲၤ​အိး​ထီၣ်​အ​သး​လၢ​ကီၢ်​သူ​လ့ၤ​အ​တၢ်​မံ​မိၢ် ​က​ဘၣ်​လၢ​ပှဲၤ​ထီၣ်​အ​ဂီၢ်​န့ၣ်​လီၤ. 


၁၈၂၆ ​နံၣ် ​ကိၤ​လၤ​ဝါ ​အံး​စ်​အ့​ဒံ​ယၤ​ခီ​ပ​နံာ် (East India Company)​မၤ​န့ၢ်​ပၢ​ရ​ခၢၣ်​ကီၢ်​ဒီး ​တ​နီ​သ​ရံၣ်​ကီၢ်​စး​ထီၣ်​လၢ​ဃိၣ်​လိာ် ​အ​လာ်​ခီ​ဝံၤ​န့ၣ် ​အ​မဲ​ရ​ကၤ ​မံး​ၡၢၣ်​န​ရံၣ်​တ​ဖၣ် ​ဟူး​ဂဲၤ​အါ​ထီၣ်​လၢ​တၢ်​သး​ခု​က​စီၣ်​တၢ်​မၤ ​လၢ​ကီၢ်​ပံၤ​ယီၤ​လာ်​ခီ​ဒီး, ​ဒ်​သိး​က​ညီ​ဖိ​က​သ့​ကွဲး​သး​ဖး​က့ၤ​အ​ကျိာ်​အ​ဂီၢ် ​ဒုး​အိၣ်​ထီၣ်​ဝဲ​က​ညီ​လံာ်​မဲာ်​ဖျၢၣ် (၁၈၃၀)​လၢ ​တၢ်​သူ​အီၤ​တုၤ​မုၢ်​မ​ဆါ​တ​နံၤ​အံၤ ​ဒ်​တၢ်​ကွဲး​တ​ယုၢ်​အံၤ​အ​ပူၤ ​လံာ်​မဲာ်​ဖျၢၣ်​တ​ဖၣ်​အ​သိး​န့ၣ်​လီၤ. ​မံး​ၡၢၣ်​န​ရံၣ်​တ​ဖၣ် ​သူၣ်​ထီၣ်​တီၤ​ကၠိ​တ​ဖၣ်​ဒီး ​က​ညီ​ဖိ​စး​ထီၣ်​မၤ​န့ၢ်​ဘၣ် ​ကူၣ်​သ့​ပီ​ညါ​လၢ​ကီၢ်​မုၢ်​နုာ် ​ဃုာ်​ဒီး ​ကီၢ်​မုၢ်​နုာ်​အ​တၢ်​စူၢ်​တၢ်​နာ်, ​အ​တၢ်​ဆိ​က​မိၣ်​ပီ​ညါ ​ဃုာ်​ဒီး​အ​တၢ်​သ​ကဲာ်​ပ​ဝး​တ​ဖၣ်​န့ၣ်​လီၤ. 

​တ​ချုး​စု​က​ဝဲၤ​တၢ်​ပၢၢ်​ဆၢ​အိၣ်​ထီၣ်​ဒံး​ဘၣ် ၇၅​နံၣ်(၁၈၇၄​နံၣ် ​ဆၢ​က​တီၢ်), ​ဖဲ​အ​ပူၤ​ကွံာ်​အ​နံၣ် ၁၅၀​န့ၣ် ​က​ညီ​က​လုာ်​ထံၣ်​ဘၣ် ​က​လုာ်​အ​တၢ်​လဲၤ​ထီၣ်​လဲၤ​ထီ ​အ​ဒိၣ်​က​တၢၢ် ​လၢ​ကျဲ​သၢ​ဘိ​န့ၣ်​လီၤ. 


​တၢ​တ​မံၤ​န့ၣ် ​တၢ်​ဖံး​အီၣ်​မၤ​အီၣ် ​တၢ်​အီၣ်​ကုး​အီ​ပှဲၤ​အ​တၢ်​လဲၤ​ထီၣ်​လဲၤ​ထီ (progress in economic prosperity). ​ခံ​မံၤ​တ​မံၤ​န့ၣ် ​ပီ​ညါ​ကူၣ်​သ့​တၢ်​လဲၤ​ထီၣ်​လဲၤ​ထီ​ဃုာ်​ဒီး ​တၢ်​နုာ်​လီၤ​မၤ​တၢ်​လၢ ​ပ​ဒိၣ်​ဝဲၤ​ကျိၤ​ဝဲၤ​ဒ့ ​တၢ်​ပၢ​တၢ်​ပြး​အ​ပူၤ (progress in education and civil services), ​ဒီး ​သၢ​မံၤ​တ​မံၤ​န့ၣ် ​တၢ်​ပိၢ်​ထီၣ်​ဖး​ထီၣ်​လၢ​က​လုာ်​ထံ​ရူၢ်​ကီၢ်​သဲး (​progress in political awakening)​တ​ဖၣ် ​န့ၣ်​လီၤ.


​မုၢ်​ကျိၤ​ဝဲၤ​ကွာ် ​တၢ်​ဒိၣ်​ထီၣ်​ပှၢ်​ထီၣ်


​ဖဲ ၁၈၆၉​နံၣ် ​စူး​အဲး​က​ဘီ​ထံ​ကျိၤ(Suez Canal)​တၢ်​အိး​ထီၣ်​အီၤ​ဝံၤ​အ​ခါ​န့ၣ် ​ဟီၣ်​ခိၣ်​တၢ်​ကူ​လဲၢ်​မၤ​ကၤ​လၢ ​အ့​ၡၢၣ်​ကီၢ်​မုၢ်​ထီၣ် ​ဆူ​ယူ​ရ​ပၤ​ကီၢ်​ဒိၣ်  ​က​ဘီ​ထံ​တၢ်​လဲၤ​တၢ်​က့ၤ ​ဖုၣ်​လီၤ​အ​မံၤ​လာ်​ယဲၢ်​က​ထိ​ဘျဲၣ် ​ဒီး​တၢ်​ဆၢ​က​တီၢ်​စှၤ​လီၤ​ကွံာ်​ဝဲ ​သၢ​လါ​လွံၢ်​လါ ​ခီ​ဖျိ​လၢ ​က​ဘီ​တ​ဖၣ်​တ​လိၣ် ​လဲၤ​ခီ​ဝး​တ​ရံး ​အၣ်​ဖ​ရံၣ်​ကး​ကီၢ်​ဒိၣ်​လၢၤ​ဘၣ် ​အ​ဃိ​န့ၣ်​လီၤ. ​ဖဲ​န့ၣ် ​ကီၢ်​ပံၤ​ယီၤ​အ​ပူၤ ​ဘု​ဟု​တ​ဖၣ်​အ​ပှ့ၤ​ဂ့ၤ​ထီၣ် ​ဒီး ​က​ညီ​ဖိ​လၢ ​ထံ​ထၣ်​စွ့​တ​ဖၣ်​အိၣ်​ဒီး ​ဟီၣ်​ခိၣ်​က​ပံာ်, ​မ့ၢ်​စံာ်​ပှဲၤ​က​စၢ်​တ​ဖၣ်​အ​ဃိ ​ကဲ​ဒိၣ်​ကဲ​ထီ​အီၣ်​အိၣ်​အီ​အိၣ်​ထီၣ်​ဝဲ ​ချ့​သ​ဒံး​န့ၣ်​လီၤ. 


​တ​ချုး​ဖဲ ​စူ​အဲး​က​ဘီ​ထံ​ကျိၤ​အိး​ထီၣ်​ဒံး​ဘၣ် ​နံၣ်၁၈၅၂​န့ၣ် ​အဲ​က​လံး​ပှၤ​မၤ​လဲၢ်​အီၣ်​ကီၢ်​ဒုး​လိာ်​အ​သး​ဒီး ​ပ​ယီၤ​အ​စီၤ​ပၤ ​ခံ​ဘျီ​တ​တ​ဘျီ​ဝံၤ​ဒီး​ဟံး​န့ၢ်​ပၢ​ကီၢ်​ပံၤ​ယီၤ​လာ်​ခီ​အ​ခါ​န့ၣ်​ပၢ​ဝဲ​လၢ ​တၢ်​ဒိၣ်​ကျိၣ်​စ့​က​စၢ်​သ​နူ (​capitalism)​ဒီး​ဟ့ၣ်​ဝဲ​တၢ်​သ​ဘျ့​လၢ ​ပှၤ​က​ဖံး​အီၣ်​မၤ​အီၣ်​တၢ်​အ​ဃိ ​ပှၤ​လၢ​ကီၢ်​ပံၤ​ယီၤ​ထး​ခီ ​ဟဲ​လီၤ​ဃု​ဖံး​ဃု​မၤ​တၢ် ​ဆူ​ဝ့ၢ်​တ​ကူၣ်​ဒီး ​ထံ​ထၣ်​စွ့​အါ​ထီၣ်​န့ၣ်​လီၤ. ​အ​ဂၤ​တ​မံၤ​န့ၣ် ​ပှၤ​က​လုာ်​လၢ​ကီၢ်​ပံၤ​ယီၤ​ထး​ခီ​တ​ဖၣ် ​က​ပူၤ​ဖျဲး​ဒီး ​ပ​ယီၤ​စီၤ​ပၤ​အ​တၢ်​မၤ​နၢၤ​အီၣ်​ဃီၢ်​အ​ဂီၢ် ​ဟဲ​လီၤ​ဃု​ဖံး​ဃု​မၤ​တၢ် ​ဆူ​အဲ​က​လံး​အ​တၢ်​ပၢ​အ​ပူၤ​န့ၣ်​လီၤ.

​အဲ​က​လံး​တၢ်​ပၢ​အ​ဖီ​လာ် ​ကီၢ်​ပံၤ​ယီၤ​ဘု​ဟု​ဟး​ထီၣ်​အါ ​ဒီး​တုၤ​ဖဲ ၁၉၂၀​နံၣ်​န့ၣ် ​ကီၢ်​ပံၤ​ယီၤ​န့ၣ် ​တၢ်​ကိး​အီၤ​လၢ “​ဟီၣ်​ခိၣ်​မ့ၤ​သ​ပၢၤ” ​မ့ၢ်​လၢ​အ​ကဲ ​ထံ​ကီၢ်​တ​ဘ့ၣ်​လၢ ​ဘု​ဟု​ဟး​ထီၣ်​အါ​က​တၢၢ်​လၢ​ဟီၣ်​ခိၣ်​ချၢ​အ​ဃိ​န့ၣ်​လီၤ. ​အ​က​လီၤ​ဂာ်​ဒ ်​ဆၢ​က​တီၢ်​ခဲ​အံၤ ​ကီၢ်​ကၠီၣ်​တဲၣ် ​မ့ၢ်​ထံ​ကီၢ်​တ​ဘ့ၣ်​လၢ ​အ​ဆှၢ​ဆါ​ဟု​သး​ဆူ​ဟီၣ်​ခိၣ်​ဒီ​တ​ဘ့ၣ်​အ​သိး ​န့ၣ်​လီၤ. 


​ယူ​ရ​ပၤ​ကီၢ်​ဒိၣ်​အ​ပူၤ ​ပှၤ​သး​လီ​အီၣ်​ဘၣ်​ကီၢ်​ပံၤ​ယီၤ​ဟု​သး​အ​ဃိ ​ဘု​ဟု​အ​ပှ့ၤ​ဂ့ၤ​ဒီး ​ပှၤ​မၤ​တၢ်​ဖိ​လၢ ​ကီၤ​လၤ​သူ​ကီၢ် ​ဒီး​ကီၢ်​ပံၤ​ယီၤ​ထး​ခီ​တ​ဖၣ် ​ဟဲ​လီၤ​မၤ​တၢ်​ဆူ ​ကီၢ်​ပံၤ​ယီၤ​လာ်​ခီ ​လၢ​က​ညီ​အ​စံာ်​အ​ကျိး​တ​ဖၣ်​အ​ပူၤ​ဒီး ​က​ညီ​ဖိ​လၢ​ထံ​ထၣ်​စွ့​တ​ဖၣ်​ကဲ​ဒိၣ်​ထီၣ်, ​ဒီး​အိၣ်​မူ​ကွၢ်​လိ ​ကီၢ်​မုၢ်​နုာ်, ​လူၤ​ထီၣ်​ခူ​ဖိ​ဝ့ၢ်​ဖိ ​အ​လု​အ​လၢ် ​တုၤ​ဒၣ်​လဲာ်​လၢ ​ကွၢ်​အံၤ​ကွၢ်​ဆံး​က့ၤ​က​ညီ​ဖိ​လၢ ​ဒူ​သ​ဝီ​လၢ​က​စၢၢ်​ကျါ, ​က​ညီ​ဖိ ​လၢ​တၢ်​ပၢၤ​ခိၣ်​တ​ဖၣ် ​ကဲ​ထီၣ်​ပှၤ​ခ​ရံာ်​ဖိ​ဒီး ​ကွၢ်​တ​လီၤ​က့ၤ ​မိၢ်​လုၢ်​ပၢ်​လၢ်​အ​တၢ်​စူၣ်​တၢ်​နာ်​ဒီး ​က​ညီ​ဖိ​အ​တၢ်​အိၣ်​မူ ​အ​တၢ်​ဆဲး​တၢ်​လၤ​ထူ​လံၤ ​လၢ​အ​မ့ၢ် ​တၢ်​အီၣ်​ဃဲၤ​အီၣ်​ဘှး, ​တၢ်​လုၢ်​တၢ်​ပာ်, ​တၢ်​ဒုၣ်​တၢ်​ထု, ​တၢ်​ပာ်​ကဲ​သ့ၣ်​ခိၣ်​မုၢ်​ဃါ ​ခိၣ်​ဃၢၤ​န့​ဆၢၣ်,​တၢ်​ပီှၢ်​ကျိၣ်​အူ​ကွဲၤ, ​ဒီး ​တၢ်​အိၣ်​မူ​လၢ ​ပှၤ​က​လုာ်​မုာ်​လၤ​သး​ဖှံ​တ့ၢ် ​လၢ​နံၣ်​လၢ​အ​က​ထိ​တ​ဖၣ်​န့ၣ် ​တၢ်​တ​ပာ်​ကဲ​က့ၤ​အီၤ​လၢၤ​ဘၣ်. ​တၢ်​ထံၣ်​တၢ်​ဆိ​က​မိၣ် ​ဒ်​သိး​အံၤ​တ​ဖၣ်​တုၤ​ဖိ​စိၤ​လံၤ​စိၤ​န့ၣ်​ပိာ်​ထွဲ​အ​ခံ​ဒံး​န့ၣ်​လီၤ.


Sir San C. Poe 


General Smith Dun 

Source: goodreads.com



Brigadier General Saw Kyar Doe  




Saw Ba Oo Gyi

​တၢ်​လဲၤ​ထီၣ်​လဲၤ​ထီ​လၢ ​ပီ​ညါ​ကူၣ်​သ့​ဒီး ​ပ​ဒိၣ်​ဝဲၤ​ကျိၤ


​ကိၤ​လၤ​ဝါ​မံး​ၡၢၣ်​န​ရံၣ်​တ​ဖၣ်​ထံၣ်​ဝဲ ​က​ညီ​ဖိ​တ​ဖၣ်​ဒ်​အ​မ့ၢ် ​ပှၤ​လီၤ​မံၤ, ​အိၣ်​မူ​ထိၣ်​ဝံၤ​အိၣ်​လီၤ​ဆီ​မံၤ ​အ​ဃိ ​ဟဲ​စိာ်​နုာ်​လီၤ​တၢ်​သး​ခု​က​စီၣ် ​ဒီး​သူၣ်​ထီၣ်​ကၠိ​သူၣ်​ထီၣ်​ကီၣ် ​လၢ ​က​အုၣ်​က့ၤ​ခီၣ်​က့ၤ ​က​ညီ​ဖိ​တ​ဖၣ်​လၢ ​တၢ်​ခံး​တၢ်​နၤ ​တၢ်​မဲာ်​ဖ့​နါ​ဖ့​အ​ပူၤ​န့ၣ်​လီၤ. 


​မံး​ၡၢၣ်​န​ရံၣ်​ပှၤ​စိာ်​တၢ်​သး​ခု​က​စီၣ်​တ​ဖၣ် ​သူၣ်​ထီၣ်​မံး​ၡၢၣ်​န​ရံၣ်​ကၠိ​တ​ဖၣ် ​လၢ​ထံ​ထၣ်​စွ့, ​တုၤ​လၢ​က​လံၤ​စိး​မုၢ်​ထီၣ်​တီ​အူ ​လၢၢ်​ဒိၣ်​ဆီ​ထံး ​က​စၢၢ်​ဂံၢ်​ထံး​အ​ဃိ​ဒီး ​က​ညီ​က​လုာ် ​လၢ​လာ်​လၢ​ထး ​န့ၢ်​ဘၣ်​ကီၢ်​မုၢ်​နုာ်​အ​တၢ်​ကူၣ်​ဘၣ်​ကူၣ်​သ့​ဒီး ​လဲၤ​မၤ​လိ​ဘၣ်​တၢ်​ဆူ ​ယူၤ​ရ​ပၤ​အ​မဲ​ရ​ကၤ ​ဒီး​မ့ၢ်​ပှၤ ​န့ၢ်​ဘၣ်​တၢ်​ခွဲး​တၢ်​ယာ်​အ​ဆိ​က​တၢၢ် ​လၢ​ကီၢ်​ပံၤ​ယီၤ​က​လုာ်​တ​ဖၣ်​အ​ကျါ​န့ၣ်​လီၤ. 


​မံး​ၡၣ်​န​ရံၣ်​အ​တၢ်​ဘျး​စဲ​အ​ဃိ ​ပှၤ​လၢ​အ​လဲၤ​မၤ​လိ​တၢ်​အ​ဆိ​က​တၢၢ် ​ဆူ​ကီၢ်​မုၢ်​နုာ် ​မ့ၢ်​က​ညီ​တၢ်​သၣ်​ဆိ​ထံၣ်​သၣ်​ပၠၣ်(Theodore Thanbyah)​လၢ​အ​ဖျိ​ထီၣ်​ကၠိ​လၢ ​ရီး​ခၠဲး​စ​ထၢၣ်​ဖၠၣ်​စိ​မိၤ(University of Rochester, New York - Class of 1871 ),​ဒီး​လၢ​ခံ​တ​စိၤ ​ပိာ်​ထီၣ်​အ​ခံ​န့ၣ် ​စၣ်​စံၣ်​ဖိ (Sir San Crombine Poe)​လၢ ​အ​ဖျိ​ထီၣ်​က​သံၣ်​သ​ရၣ်​ခီ​လ့ၣ်​ကၠိ​လၢ ​အဲၣ်​လ​ဘၣ်​နံၣ် (Albany Medical College, New York - Class of 1893)​ဒီး​မ့ၢ်​က​ညီ​အ​ဆိ​က​တၢၢ်​လၢ ​နုာ်​လီၤ​မၤ​တၢ်​လၢ ​ကီၢ်​ပံၤ​ယီၤ​အဲ​က​လံး​ဘျီၣ်​ဒိၣ် ​ဒီး​ကွဲး​လံာ်​ကွဲး​လဲၢ်(Burma and the Karens)​တိ​ဖျိ​တၢ်​လၢ ​က​ညီ​ဖိ​က​အိၣ်​ဘၣ်​ဒီး​အ​ထံ​အ​ကီၢ် ​က​လုာ်​အ​တၢ်​သ​ဘျ့​အိၣ်​ဒီး​အ​သူး​အ​သ့ၣ် ​က​အိၣ်​ဘၣ်​လိာ်​ဖိး​မံ ​ဒီး​က​လုာ်​တ​ဖၣ်​အ​ဂီၢ် ​န့ၣ်​လီၤ. 


၁၉၂၀ ​ကၠၢး​ဒ်​စၢၣ်​ခီ​လ့ၣ်​ကၠိ(Judson College) ​လၢ​အ​ပာ်​ဖှိၣ်​က့ၤ​အ​သး​ဒီး ​အဲ​က​လံး​ပ​ဒိၣ်​ဖၠၣ်​စိ​မိၤ​ဒီး ​ကဲ​ထီၣ်​က့ၤ​ဝ့ၢ်​တ​ကူၣ်​ဖၠၣ်​စိ​မိၤ​န့ၣ် ​အ​စး​ထီၣ်​အ​သး​လၢ ​ခ​ရံာ်​ဖိ​ခီ​လ့ၣ်​ကၠိ (​Christian College) ​လၢ​မံး​ၡၢၣ်​န​ရံၣ်​တ​ဖၣ် ​ဒုး​အိၣ်​ထီၣ်​ဝဲ​ဒီး​အ​ခီၣ်​ထံး​န့ၣ် ​ပှၤ​ကၠိ​တ​ဖၣ်​အိၣ်​ဒၣ်​က​ညီ​ဖိ​တ​ဖၣ်​န့ၣ်​လီၤ. ​ခီ​လ့ၣ်​ကၠိ​အ​ဝဲ​အံၤ ​တၢ်​သူၣ်​လီၤ​န့ၣ် ​တၢ်​ကွၢ်​ဒိ​အီၤ​ဒ် ​ခ့​ပ​ရ့း​ဖၠၣ်​စိ​မိၤ (Cambridge University, UK)​လၢ ​ကီၢ်​အဲ​က​လံး​အ​ပူၤ​အ​သိး​န့ၣ်​လီၤ. ​အ​လီၤ​ဂာ်​ဒ်​သိး ​ဖဲ​ပ​စိၤ​ခဲ​အံၤ ​စ့​က​ဖီ​က​လုာ်​ဖၠၣ်​စိ​မိၤ (National University of Singapore) ​သူၣ်​လီၤ​ဘျး​စဲ​လိာ်​အ​သး ​ဒီး ​န့.T​လၢ​အ​အိၣ်​လၢ​အ​မဲ​ရ​ကၤ​ကီၢ်​စဲၣ်​မဲး​ခ်​စၢ်​ခၠူး​စဲး (​Massachusetts Institute of Technology - MIT )​လၢ​အ​ဖျိး​စိ​လၢ ​စဲး​ဖီ​က​ဟၣ်​ပီ​ညါ​ထဲး​က​နီ​လီၢ်​ကၠံၢ် ​အ​သိး​န့ၣ်​လီၤ. 


​မံး​ၡၢၣ်​န​ရံၣ်​ကၠိ​တ​ဖၣ် ​ဒုး​အိၣ်​ဖျဲၣ်​ထီၣ်​က​ညီ​စၢၤ​သွဲၣ်​တ​ဖၣ်​လၢ ​အ​ပာ်​ဒိၣ်​တၢ်​ကူၣ်​ဘၣ်​ကူၣ်​သ့ ​ဒီး​တုၤ​လၢ​ကိၤ​လၤ​ဝါ​က့ၤ​ဝံၤ ​က​ညီ​စု​က​ဝဲၤ​တၢ်​ပၢၢ်​ဆၢ ​တၢ်​သ​ဘံၣ်​ဘုၣ်​အ​ဆၢ​က​တီၢ်​ဒီး ​ပ​ယီၤ​မီၤ​စိ​ရိၤ​ကး​တံာ်​ကွံာ်​မံး​ၡၢၣ်​န​ရံၣ်​ကၠိ​တ​ဖၣ်​ဒၣ်​လဲာ်, ​က​ညီ​ဖိ​တ​ဖၣ်​ပာ်​ဒိၣ်​ပီ​ညါ​ကူၣ်​သ့, ​တုၤ​ဖိ​စိၤ​လံၤ​စိၤ ​ဖဲ​ပ​စိၤ​ဒၣ်​လဲာ် ​မိၢ်​ပၢ်​တ​ဖၣ် ​ဆှၢ​ဖိ​ဆှၢ​လံၤ​လၢ​ကၠိ​​, ​က​ညီ​ဖိ​လၢ​လာ်​လၢ​ထး ​က​ရဲၣ်​က​ရီၣ် ​ဃု​ကျဲ​ဒီး​ဒုး​အိၣ်​ထီၣ်​ကၠိ​တ​ဖၣ် ​န့ၣ်​လီၤ. 


​ပီ​ညါ​တၢ်​ကူၣ်​ဘၣ်​ကူၣ်​သ့​လဲၤ​ထီၣ်​အ​သိး ​က​ညီ​ဖိ​တ​ဖၣ် ​ကဲ​ထီၣ်​ကၠိ​သ​ရၣ်​သ​ရၣ်​မုၣ်, ​က​သံၣ်​သ​ရၣ်, ​ဝဲၤ​ကျိၤ​ဝဲ​ဒ့​ပ​ဒိၣ်​ပှၤ​မၤ​တၢ်​ဖိ​တ​ဖၣ်​န့ၣ်​လီၤ. ​တုၤ​လီၤ​လၢ​စိၤ​လၢ ​ကိၤ​လၤ​ဝါ​က့ၤ​ပူၤ​ဝံၤ ​အ​ပူၤ​ကွံာ်​တ​စိၤ​ဒၣ်​လဲာ်​န့ၣ် ​လၢ​ဝ့ၢ်​တ​ကူၣ်​တၢ်​ဆါ​ဟံၣ်​ဖး​ဒိၣ်, ​ဝ့ၢ်​တီ​အူ​တၢ်​ဆါ​ဟံၣ်​တ​ဖၣ်​အ​ပူၤ ​ပှၤ​ကွၢ်​ပှၢ်​ဆါ​က​သံၣ်​သ​ရၣ်,​သ​ရၣ်​မုၣ်​တ​ဖၣ် ​အိၣ်​ထဲ​က​ညီ​ဖိ​န့ၣ်​လီၤ. ​က​ညီ​ဖိ​အ​တၢ်​ပာ်​သး, ​သး​လၢ​အ​အဲၣ်​ဒိး​မၤ​ဂ့ၤ​မၤ​ဘျုး​ပှၤ​ဂၤ​န့ၣ် ​ဒုး​အိၣ်​ထီၣ် ​ပှၤ​မၤ​တၢ်​ဖိ​လၢ ​အ​ဟ့ၣ်​လီၤ​အ​သး​လၢ​ပှၤ​အါ​ဂၤ​အ​ဂီၢ်, ​ထံ​ဖိ​ကီၢ်​ဖိ​ကီၢ်​ဖိ​အ​ဂီၢ် ​န့ၣ်​လီၤ. 


​သုး​လီၢ်​လၤ​စိ​က​မီၤ​တ​ပၤ​စ့ၢ်​ကီး ​က​ညီ​က​လုာ် ​န့ၢ်​ဘၣ် ​လီၢ်​လၤ​ခွဲး​ယာ်​အါ​က​တၢၢ် ​ဒ်​အ​မ့ၢ်​ပှၤ​လၢ​အ​သး​တီ, ​အ​သး​ဒူ, ​ပာ်​ကဲ​တၢ်​သိၣ်​တၢ်​သီ, ​ပာ်​ကဲ​တၢ်​က​လုၢ်​အ​ဃိ​န့ၣ်​လီၤ. ​ဖဲ ၁၈၉၀​နံၣ်​န့ၣ် ​လၢ​အဲ​က​လံး​အ​သုး​ပူၤ ​ကီၢ်​ပံၤ​ယီၤ​ဖိ​တ​ဖၣ်​အ​ကျါ(၇၅)​မျး​က​ယၤ​န့ၣ်​မ့ၢ်​ဒၣ်​က​ညီ​က​လုာ် ​န့ၣ်​လီၤ. ​မ့​မ့ၢ် ​ပ​ယီၤ​က​လုာ်​န့ၣ် ​အ​နီၣ်​ဂံၢ်​အါ​ဘၣ်​ဆၣ် ​မ့ၢ်​ပှၤ​လၢ​အိၣ်​ပှိၤ​တ့ၢ်​အ​စီၤ​ပၤ​ဒီး ​ထီ​ဒါ​အဲ​က​လံး​အ​တၢ်​ပၢ​အ​ဃိ ​တၢ်​တ​ဒုး​ပျဲ​ကဲ​အီၤ​လၢ​ပ​ဒိၣ်​အ​သုး​ဘၣ်. ဟီၣ်​ခိၣ်​တၢ်​ဒုး​ဖး​ဒိၣ် ​တၢ​တ​ဘျီ​အ​ဆၢ​က​တီၢ် ​ဖဲ ၁၉၁၄ ​နံၣ်​အ​ခါ ​တၢ်​ပျဲ​နုာ်​လီၤ ​ပ​ယီၤ​က​လုာ်​ဆူ​ပ​ဒိၣ်​သုး​အ​ပူၤ, ​ဘၣ်​ဆၣ် ​ဖဲ ၁၉၂၅ ​နံၣ်​န့ၣ် ​တၢ်​ပာ်​ပ​တုာ်​က့ၤ​အီၤ​န့ၣ်​လီၤ. 


​ဒီး​တုၤ​လၢ ​အဲ​က​လံး​က့ၤ ​ဒီး​ဟ့ၣ်​တ့ၢ်​ကီၢ်​ပံၤ​ယီၤ​လၢ ​ပ​ယီၤ​ဖိ​အ​စု​ပူၤ​ဒၣ်​လဲာ် ​လၢ​ကီၢ်​ပံၤ​ယီၤ ​ထံ​ကီၢ်​သုး​မုၢ်​ဒိၣ်​အ​ပူၤ ​လီၢ်​လၤ​ထီ​တ​ဖၣ် ​မ့ၢ်​ဒၣ်​ထဲ​က​ညီ​ဖိ​တ​ဖၣ်​န့ၣ်​လီၤ. ​ကီၢ်​ပံၤ​ယီၤ​သုး​ရိၣ်​မဲ​ခိၣ်​ကျၢၢ်​အ​ဆိ​က​တၢၢ်​စီၤ​စ​မံး​ဒိ (General Smith Dun)​န့ၣ်​မ့ၢ်​က​ညီ, ​လၢ​ထံ​သုး​က​လံၤ​သုး​အ​ပူၤ ​လီၤ​လၤ​ထီ​တ​ဖၣ်​စ့ၢ်​ကီး​မ့ၢ်​က​ညီ​ဖိ​န့ၣ်​လီၤ. ​က​လံၤ​သုး​လီၢ်​လၤ​ထီ​က​တၢၢ် ​စီၤ​ကၠၣ်​ဒိ ​န့ၣ်​မ့ၢ်​စ့ၢ်​ကီး ​က​ညီ​က​လုာ်​န့ၣ်​လီၤ. ​ကိၤ​လၤ​ဝါ​န့ၣ်​ကူၣ်​တၢ်​ထီ​ဘိ ​ဒီး ​က​ဒွး​ဝဲ​လၢ ​အ​မ့ၢ်​ဟ့ၣ်​တ့ၢ်​ထံ​ကီၢ်​လၢ ​ပ​ယီၤ​ဖိ​အ​စု​ပူၤ​ဒၣ်​လဲာ် ​က​ညီ​ဖိ​ကွၢ်​ကျဲၤ​က​ဘၣ်​က​စီ​ဒီ​လီၤ. ​ဘၣ်​ဆၣ်​က​ညီ​ဖိ​အ​တၢ်​ပာ်​သူၣ်​ပာ်​သး​န့ၣ် ​အဲၣ်​ဒိး​ပာ်​ဖျါ​အ​သး​ဒ် ​အ​မ့ၢ်​ပှၤ​သူၣ်​ဂ့ၢ်​သး​ဝါ​ဒီး​တ​ဘျီ​ဘျီ​တၢ်​အိၣ်​သး​အ​ဖီ​ခိၣ် ​ထိၣ်​အီ​ပီ​အ​သး​အိၣ်​ဝဲ​စ့ၢ်​ကီး​န့ၣ်​လီၤ. 


​အ​ဂၤ​တ​မံၤ​န့ၣ် ​ဖျါ​လၢ ​က​ညီ​ဖိ​တ​ဖၣ်​ဆိ​က​မိၣ်​ဝဲ ​မံး​ၡၢၣ်​န​ရံၣ်​လၢ​အ​သူၣ်​ထီၣ်​ကၠိ​ဒီး ​ဝါ​ဖံး​လၢ​အ​ဂဲၤ​ထံ​ရူၢ်​ကီၢ်​သဲး ​ပှၤ​မၤ​လဲၢ်​အီၣ်​ကီၢ်​တ​ဖၣ်​န့ၣ်​မ့ၢ်​ကိၤ​လၤ​ဝါ​တ​ဖု​ဃီ​အ​သိး​လီၤ. ​ဟီၣ်​ခိၣ်​ထံ​ရူၢ်​ကီၢ်​သဲး​တၢ်​ဆီ​တ​လဲ​ဒီး ​ကီၢ်​အဲ​က​လံး​အ​ပူၤ​ထံ​ရူၢ်​ကီၢ်​သဲး​တၢ်​ဆိ​က​မိၣ်​ဆီ​တ​လဲ​အ​သး​ဒီး ​ဒီး​လ့ၢ်​ဘၢၣ်​ပၣ်​တံၣ် (Labor Party)​နၢၤ​တၢ်​ဖး(၁၉၄၅)​ဒီး ​ပၢ​က့ၤ​တၢ်​ဖဲ​တၢ်​ဒုး​ဖး​ဒိၣ်​ခံ​ဘျီ​တ​ဘျီ​ဝံၤ​န့ၣ်​လီၤ. ​ဖဲ​စီၤ​ဘး​အူ​ကၠံ​ဒီး ​ခၢၣ်​စး​တ​နီၤ​လၢ ​လဲၤ​စံး​က​တိၤ​က​ညီ​ကီၢ်​အ​ဂ့ၢ်​အ​ခါ​န့ၣ်​ဝံး​စ​တၢၣ်​ခၠၢး​ခၠ့ၣ်(Winston Churchill)​မ့ၢ်​န့ၢ်​ပၢ​ဘၣ်​ဒံး​ကီၢ်​အဲ​က​လံး​န့ၣ်  ​က​ညီ​ဖိ​တ​ဖၣ်​ဘၣ်​သ့ၣ်​သ့ၣ်​က​န့ၢ်​ဘၣ် ​တၢ်​ဆီၣ်​ထွဲ​အါ​တ​က့ၢ်​လီၤ. ​ကိ​တိာ်​ခိၣ်​ကျၢၢ်​ခၠၢး​ခၠ့ၣ်​ဖီၣ်​ဝဲ ​အီၣ်​ဆါ​အ​ခိၣ်​နုာ်​ဘၣ်​ဒီး ​တ​မ့ၢ်​က​ဟ့ၣ်​လီၤ​ကြီ ​ကီၢ်​ပံၤ​ယီၤ ​ဒီ​တ​ဘ့ၣ် ​ဆူ​ပ​ယီၤ​ဖိ​အ​စု​ပူၤ​စ့ၢ်​ဘၣ်. ​ဘၣ်​ဆၣ် ​မ့​မ့ၢ်​ကိ​တိာ်​ခိၣ်​ကျၢၢ်​အ​သီ ​က​လံ​မဲၣ်​ကျၢၢ်​အဲး​တ​လံၣ်(​Clement Attlee)​န့ၣ် ​တ​သ့ၣ်​ညါ ​က​ညီ​ဖိ​တၢ်​မၤ​သ​ကိး​ဃုာ်​တၢ်​ဒီး ​အဲ​က​လံး​သုး​ဘၣ်​ဒီး ​အ​သး​တ​စၢၢ်​ဆၢ​စ့ၢ်​ကီး ​က​ညီ​ဖိ​ဘၣ်, ​ဒီး​ဖဲ​အီၣ်​ဆါ​လဲၤ​ဃ့​ထံ​သ​ဘျ့​ကီၢ်​သ​ဘျ့​အ​ခါ​န့ၣ် ​ဟ့ၣ်​လီၤ​ညီ​ဝဲ​ဒၣ်​လီၤ. 


​ကီၢ်​လၤ​ဝါ​ဟဲ​ဒုး​တၢ်​ဒီး​ပ​ယီၤ​အ​စီၤ​ပၤ ​အိၣ်​ဝဲ​သၢ​ဘျီ ​လၢ​က​မၤ​က​တၢၢ်​က့ၤ ​ပ​ယီၤ​အ​စီၤ​ပၤ​အ​တူၢ်​ဒီး ​ဟံး​န့ၢ်​ကွံာ် ​ကီၢ်​ပံၤ​ယီၤ​ဒီ​တ​ဘ့ၣ်​န့ၣ်​လီၤ. ​ဘၣ်​ဆၣ် ​ကိၤ​လၤ​ဒီး​ပ​ယီၤ​တၢ်​ဒုး​တၢ​တ​ဘျီ​ဒီး ​ခံ​ဘျီ​တ​ဘျီ(First Anglo-Burmese War-1824 and Second Anglo-Burmese War 1852) ​အ​ပူၤ ​ပှၤ​ဟဲ​ဒုး​တၢ်​န့ၣ် ​တ​မ့ၢ်​အဲ​က​လံး​စီၤ​ပၤ​အ​သုး​မုၢ်​ဒိၣ်​ဘၣ်, ​အိၣ်​ဒိၣ်​ခီ​ပ​နံၣ်(​East India Company – EIC)​အ​သုး​ဒီး ​ပ​ယီၤ​စီၤ​ပၤ​အ​သုး ​ဒုး​လိာ်​အ​သး​န့ၣ်​လီၤ. 

​ခီ​ပ​နံၣ်​အ​တၢ်​တိာ်​န့ၣ် ​တ​မ့ၢ်​က​ဟး​သူၣ်​ထီၣ်​ထံ​ကီၢ်(​nation building)​လၢ​က​ဂၢၤ​ဖှိၣ်​က့ၤ​ပှၤ​က​လုာ်​တ​ဖၣ်​လၢ​ထံ​ကီၢ်​အ​ပူၤ​ဘၣ်. ​မ့ၢ်​ဒၣ်​တၢ်​မၤ​လဲၢ်​အီၣ်​ကီၢ်​လၢ ​အ​တၢ်​ကူ​လဲၢ်​မၤ​ကၤ​အ​ဂီၢ်​ဒီး ​သူ​ဝဲ​ပှၤ​ထူ​လံၤ​လီၢ်​က​ဝီၤ​ဖိ​တ​ဖၣ်​လၢ ​က​ဒီ​တ​ဒၢ​န့ၢ် ​အ​တၢ်​လၢ​တၢ်​မၤ​လဲၢ်​အီၣ်​ကီၢ် (colonialism )​အ​တၢ်​ကဲ​ဘျုး​အ​ဂီၢ်​န့ၣ်​လီၤ. 


​ပှၤ​မၤ​လဲၢ်​အီၣ်​ကီၢ်​တ​ဖၣ်​ပၢ​ဝဲ​ကီၢ်​လၤ​သူ​ကီၢ်​ဒီး ​ကီၢ်​ပံၤ​ယီၤ ​ဒ်​ထံ​ကီၢ်​တ​ဘ့ၣ်​ဃီ​အ​သိး ​တုၤ၁၉၃၇​နံၣ်​အ​ပူၤ ​အ​ဃိ​အဲ​က​လံး​ပၢ​လီၤ​ဆီ​ကီၢ်​ပံၤ​ယီၤ​န့ၣ် ​အိၣ်​ဒၣ်​စှၤ​နံၣ်​န့ၣ်​လီၤ. ​အ​သုး​ဖိ​တ​ဖၣ်​န့ၣ် ​တ​မ့ၢ်​ကိၤ​လၤ​ဝါ​ဖိ​ခဲ​လၢာ်​ဘၣ်. ​အါ​တ​က့ၢ် ​မ့ၢ်​ဒၣ်​က​လုာ်​ဒူၣ်​တ​နီၤ​လၢ ​ကီၤ​လၤ​သူ​ကီၢ်​အ​ပူၤ​န့ၣ်​လီၤ. ​ဖဲ​န့ၣ်​အ​စိၤ​န့ၣ် ​အံ​အၣ်​စံၣ်(​EIC)​ကဲ​ထီၣ်​ခီ​ပ​နံၣ်​လၢ​အ​စိ​က​မီၤ​ဒိၣ်​က​တၢၢ်​လၢ ​ဟီၣ်​ခိၣ်​ချၢ​ဒီ​တ​ဘ့ၣ်​ဒီး ​အ​သုး​ဖိ​အ​နီၣ်​ဂံၢ်​အိၣ်​အါ​တုၤ​လၢ ​ခံ​က​လီၢ်​ဃု​က​လး   (၂၆၀,၀၀​ဝ) လၢ​အ​အါ​န့ၣ် ​ကီၢ်​အဲ​က​လံး​ထံ​ကီၢ်​စီၤ​ပၤ​အ​သုး ​ခံ​ဘျီ​ဒၣ်​လဲာ်​န့ၣ်​လီၤ. ​ဖဲ(၁၈၇၄)​နံၣ်​န့ၣ် ​ခီ​ပ​နံၣ်​အ​ဝဲ​အံၤ ​တၢ်​ပာ်​ပ​တုာ်​ကွံာ်​အီၤ​ဒီး ​အဲ​က​လံး​ပ​ဒိၣ် ​ပၢ​ဆှၢ​ရဲၣ်​ကျဲၤ​က့ၤ​အီၤ ​လၢာ်​လၢာ်​ဆ့​ဆ့​န့ၣ်​လီၤ. ​လၢ​သ​နူ​အ​ဝဲ​အံၤ​အ​ပူၤ​ကျဲ​အိး​ထီၣ်​အ​သး​လၢ ​က​ညီ​ဖိ​တ​ဖၣ် ​က​စိာ်​က​ဖီ​ထီၣ်​အ​သး​လၢ​ကျဲ​အါ​ဘိ ​ဒီး​ကူၣ်​သ့​ပီ​ညါ​န့ၣ် ​မ့ၢ်​တၢ်​ဆီ​တ​လဲ​မိၢ်​ပှၢ်​လၢ ​က​ညီ​က​လုာ်​ကျါ ​န့ၣ်​လီၤ. 


​က​လုာ်​ထံ​ရူၢ်​ကီၢ်​သဲး​အ​တၢ်​ဘိၣ်​ထီၣ်​ဖး​ထီၣ်


​က​ညီ​က​လုာ်​တၢ်​က​ရၢ​က​ရိ​အ​ဆိ​က​တၢၢ်​န့ၣ် ​မ့ၢ်​ဝဲ​က​ညီ​ဒီ​က​လုာ်​က​ရၢ(Karen National Association – KNA)​လၢ ​ဘၣ်​တၢ်​က​ရဲၣ်​က​ရီၣ်​ဒုး​အိၣ်​ထီၣ်​အီၤ​လၢ ​သ​ရၣ်​ထံၣ်​သၣ်​ပၠၣ် ​လၢ​အ​ဖျိ​ထီၣ်​ဖၠၣ်​စိ​မိၤ​ကၠိ​လၢ ​အ​မဲ​ရ​ကၤ​ဝံၤ​အ​လီၢ်​ခံ​စှၤ​နံၣ်​န့ၣ်​လီၤ. ​တ​ချုး​ဖဲ​ခ့ၣ်​အဲၣ်​န်​အ့ၣ်​အိၣ်​ထီၣ်​ဒံး​အ​ခါ​က​ညီ​ဖိ​တ​ဖၣ်​အိၣ်​မူ​ဒ် ​က​လုာ်​ဒူၣ်​ဖိ​လၢ​အ​လီၤ​ပြံ​လီၤ​ပြါ ​ထံ​တ​အိၣ်​ကီၢ်​တ​အိၣ်​အ​သိး​ဒီး ​တ​သ့ၣ်​ညါ​လီၤ ​အ​သး​ဒ်​အ​မ့ၢ် ​က​လုာ်​ဖး​ဒိၣ်​တ​က​လုာ်​ဘၣ်. ​တ​နီၤ​အိၣ်​က​ဒံၣ်​က​ဒၢ​အ​သး​လၢ ​ဒူ​သ​ဝီ​က​စၢၢ်​ကျါ, ​ဒီး​တ​နီၤ​အိၣ်​မူ​ဒၣ်​လၢ​ပှၤ​ဂၤ​တၢ်​ပၢ​အ​ဖီ​လၣ်​ဒ် ​စိၤ​ဆၢ​က​တီၢ်​ခဲ​အံၤ ​ဒ်​က​လုာ်​ဒူၣ်​ဖိ​အ​တၢ်​ပာ်​သး(minority mindset) ​လၢ ​တ​ဆိ​က​မိၣ်​ဝဲ​လၢ ​က​ဘၣ်​အိၣ်​သ​ဘျ့, ​ပၢ​လီၤ​ဆှၢ​လီၤ​အ​သး​သ့​ဘၣ်​ဒီး ​ဝံ​ဃာ်​က​လုာ်​ဖုၣ် ​အ​တၢ်​ဆိ​က​မိၣ်​ဒီး ​အ​သး​ဆံး​အ​သး​ပျံၤ​တၢ် ​ဒီး​ပှၤ​ဒီ​တ​က​လုာ်​တၢ်​ထူၣ်​ဖျဲး​ဒီး​အ​တၢ်​လဲၤ​ထီၣ်​လဲၤ​ထီ​န့ၣ် ​တ​ဆိ​က​မိၣ်​ဝဲ​လၢ ​တၢ်​လၢ​က​ဘၣ်​မၤ​ဝဲ​စ့ၢ်​ကီး​န့ၣ်​ဘၣ်. 


​ခဲၣ်​အဲၣ်​န်​အ့ၣ်(KNA)​လၢ​တၢ်​ဒုး​အိၣ်​ထီၣ်​အီၤ ​ဖဲ ၁၈၈၁ ​ဒ်​ပှၤ​တ​ဝၢ​အ​တၢ်​က​ရၢ​က​ရိ​အ​သိး ​ဒီး​လၢ​ခံ​န့ၣ်​မူ​ထီၣ်​ဂဲၤ​ထီၣ် ​လၢ​ထံ​ရူၢ်​ကီၢ်​သဲး​အ​ဃိ ​ကဲ​ထီၣ်​တၢ်​က​ရၢ​က​ရိ​အ​ဆိ​က​တၢၢ်​လၢ ​က​လုာ်​ထံ​ရူၢ်​ကီၢ်​သဲး​တၢ်​မူ​ထီၣ်​ဂဲၤ​ထီၣ် ​လၢ​အဲ​က​လံး​အ​ဘီ​အ​မုၢ်​အ​ပူၤ​န့ၣ်​လီၤ. 


​ကိၤ​လၤ​သူ​ကီၢ် ​လၢ​အ​အိၣ်​လၢ​ကိၤ​လၤ​ဝါ​အ​တၢ်​ပၢ​ဖီ​လာ်​န့ၣ် ​ကိၤ​လၤ​သူ​ဖိ​တ​ဖၣ်(​ပှၤ​အ့​ဒံ​ယါ​ဖိ​တ​ဖၣ်)​ဒုး​အိၣ်​ထီၣ်(Indian National Congress - INC)​ဖဲ ၁၈၈၅ ​လၢ​က​ဂၢၤ​ဖိှၣ်​က့ၤ ​ပှၤ​ကိၤ​လၤ​သူ​ဖိ​တ​ဖၣ်​ခဲ​လၢာ် (​Pan-Indian)​န့ၣ်​လီၤ. ​ကိၤ​လၤ​သူ​ဖိ​တ​ဖၣ် ​မူ​ထီၣ်​ဂဲၤ​ထီၣ်​လၢ ​ထံ​ရူၢ်​ကီၢ်​သဲး​တုၤ​လၢ ​မ​ဟး​တ​မး​ကၢ်​တံၢ် (​Mahatma Gandhi)​တီ​ခိၣ်​ရိၣ်​မဲ​ဝဲ ​ကိၤ​လၤ​သူ​ထံ​ဖိ​ကီၢ်​ဖိ​ခဲ​လၢာ်​လၢ ​ထံ​ကီၢ်​တၢ်​သ​ဘျ့​အ​ဂီၢ် ​စး​ထီၣ်​ဖဲ ၁၉၂၀​နံၣ်​န့ၣ်​လီၤ. ​မ့​မ့ၢ်​ပ​ယီၤ​က​လုာ် ​ထံ​ရူၢ်​ကီၢ်​သဲး​အ​တၢ်​က​ရၢ​က​ရိ​တ​ဖၣ်​စး​ထီၣ်​အ​သး​လၢ ​ခ့ၣ်​အဲၣ်​န်​အ့ၣ်(KNA)​အိၣ်​ထီၣ်​ဝံၤ ​လၢ​ခံ​တ​စိၤ​မး ​န့ၣ်​လီၤ. ​ပ​ယီၤ​ဖိ​ဒုး​အိၣ်​ထီၣ် (Y​MBA)​ဖဲ ၁၉၀၀​နံၣ်​ဒီး ​တိး​ပ​မၢ်​အ​စံ​အ​ယိ(Dobama Asiayone -Thakin)​ဖဲ ၁၉၃၀​အ​ဃိ ​လၢ​ထံ​ရူၢ်​ကီၢ်​သဲး ​န့ၣ် ​က​ညီ​ဖိ​လဲၤ​လၢ​ညါ​လၢ​ကိၤ​လၤ​သူ​ဒီး ​ပ​ယီၤ​ဖိ​တ​ဖၣ်​အ​မဲာ်​ညါ ​တ​စိၤ​ဒီး​ခံ​စိၤ​ညါ​န့ၣ်​လီၤ. 


​ဖဲ(၁၉၀၀)​အ​ဆၢ​က​တီၢ်​န့ၣ် ​ကီၢ်​လၤ​သူ​ကီၢ်​အ​ပှၤ​နီၣ်​ဂံၢ်​အိၣ် ​အ​က​ကွဲၢ်​ခံ​က​ယၤ​ဘျဲၣ် ​အ​ခါ ​ပှၤ​က​ညီ​ဖိ​တၢ်​ဂံၢ်​အ​ပှၤ​နီၣ်​ဂံၢ်​အိၣ်​ဒၣ် ​ခံ​က​ကွဲၢ်​လီၤ. ​ဘၣ်​ဆၣ်​လၢ​ထံ​ရူၢ်​ကီၢ်​သဲး​တၢ်​က​ရၢ​က​ရိ​လီၤ​သး​န့ၣ် ​က​ညီ​က​လုာ် ​လဲၤ​လၢ​ညါ​လၢ ​ပှၤ​လၢ​အ​နီၣ်​ဂံၢ်​အါ​န့ၣ်​အီၤ​အ​ဘျီ​လၢ​အ​က​ယၤ​န့ၣ်​လီၤ.


​ခ့ၣ်​အဲၣ်​အ့ၣ်(KNA)​ထံ​ရူၢ်​ကီၢ်​သဲး​အ​တၢ်​မူ​ထီၣ်​ဂဲၤ​ထီၣ်​န့ၣ် ​လၢ​ခံ ​ဒုး​အိၣ်​ထီၣ်​ဖျဲၣ်​ထီၣ်​က့ၤ ​က​ညီ​ဒီ​က​လုာ်​စၢ​ဖှိၣ်​က​ရၢ (Karen National Union)​ဖဲ၁၉၄၇ ​ဖဲ​လၢ​ဟီၣ်​ခိၣ်​ထံ​ရူၢ်​ကီၢ်​သဲး ​ဒီး​ထံ​လီၢ်​ကီၢ်​ပူၤ​အ​တၢ်​အိၣ်​သး​ဂ့ၢ်​ဂီၢ်​အူ ​တၢ်​လိၣ်​ဘၣ်​အ​ဖီ​ခိၣ်​န့ၣ်​လီၤ. ​ဒီးုNွ့​တီ​ခိၣ်​ရိၣ်​မဲ​တ့ၢ်​က​ညီ​ထံ​ရူၢ်​ကီၢ်​သဲး​တ​စိၤ​ဘၣ်​တ​စိၤ,​ဒီး​က​လုာ်​တ​ဖၣ်​အ​မဲာ်​ညါ ​လဲၤ​တ့ၢ်​လၢ​ညါ​ဒ် ​ဖိ​ဝဲၢ်​ကိ​တၢ်​ပၢၢ်​ဆၢ​အ​တၢ်​က​ရၢ​က​ရိ​အ​သိး ​ဒီး​ဂၢၤ​ဖှိၣ်​က့ၤ ​က​လုာ်​ဒူၣ်​တ​ဖၣ်​အ​တၢ်​ပၢၢ်​ဆၢ ​လၢ ​ကီၢ်​ပံၤ​ယီၤ​ဒီ​တ​ဘ့ၣ်​အ​ပူၤ​န့ၣ်​လီၤ. ​ဘၣ်​ဆၣ် ​ဖိ​ဝဲၢ်​ကိ​အံၤ ​မှံၤ​တုာ်​ပှၢ်​တီၤ ​အ​က​မျိၤ​လီၤ​ဒီး ​အ​ထံ​ရူၢ်​ကီၢ်​သဲး​က​ဒု​က​ယီၣ်, ​အါ​စု​အါ​ဘျီ ​တၢ်​တီ​တၢ်​တြၢ်​န့ၣ်​နီၤ​ဝဲ​တ​ဘၣ်​ဘၣ် ​ဒီး​လၢ​ထံ​လီၢ်​ကီၢ်​ပူၤ​န့ၣ် ​အ​နၢ်​တ​လိၤ​အ​ဃိ ​ဘၣ်​က​တိၤ ​အိၣ်​ဝဲ​စ့ၢ်​ကီး​န့ၣ်​လီၤ. 


​လၢ​ညါ​တ​စိၤ​က​ညီ​ခိၣ်​နၢ်​တ​ဖၣ် ​အိၣ်​ဒီး​ဟီၣ်​ခိၣ်​ထံ​ရူၢ်​ကီၢ်​သဲး​တၢ်​သ့ၣ်​ညါ​နၢ်​ပၢၢ်, ​ဘီ​မုၢ်​တ​ဖၣ်​အ​တၢ်​သူၣ်​လီၤ​အ​သး​န့ၣ်​ဖျါ​လၢ ​အ​တၢ်​စံး​တၢ်​က​တိၤ​အ​တၢ်​ကွဲး​တ​ဖၣ် ​လၢ​ဆဲး​လၤ​အ​ပ​တီၢ်​ဂ့ၤ ​ဒ်​အ​န့ၢ်​ဘၣ် ​တၢ်​ကူၣ်​ဘၣ်​ကူၣ်​သ့​အ​ပ​တီၢ် ​အ​သိး​န့ၣ်​လီၤ. ​ခိၣ်​နၢ်​လၢ​ညါ​တ​ဖၣ် ​လဲၤ​ပူၤ​ကွံာ်​ပှၤ​လၢာ်​ဃၣ်​ဃၣ်​ဝံၤ​ပှၤ​တ​စိၤ​လဲၤ​ဒီး ​ပှၤ​တ​စိၤ​ဟဲ​မၤ​ပှဲၤ​က့ၤ ​အ​လီၢ်​တ​ပှဲၤ​လၢၤ​ဘၣ်​န့ၣ် ​က​မ့ၢ်​လၢ ​တၢ်​ဒုး​တၢ်​ယၤ​အ​ဃိ​ဧါ, ​တၢ်​ခဲွး​တၢ်​ယာ်​လၢ ​အ​က​မၤ​လိ​ဃု​သ့ၣ်​ညါ​တၢ် ​လီၤ​မၢ်​ကွံာ်​အ​ဃိ​န့ၣ်​ဧါ. ​ခိၣ်​နၢ်​လၢ​ညါ ​အိၣ်​ဒီး​ဆၢ​က​တီၢ်​လၢ​အ​က​စိာ်​က​ဖီ​ထီၣ်​အ​တၢ်​သ့ၣ်​ညါ​နၢ်​ပၢၢ်, ​သူၣ်​ထီၣ်​အ​သး​ခီၣ်​ၡ့ၣ်, ​တၢ်​သူၣ်​တီ​သး​ရၤ​အိၣ်​ဒီး​က​လုာ်​အ​သး​ခီၣ်​ၡ့ၣ်, ​အိၣ်​ဒီး​တၢ်​မုၢ်​လၢ်​ကွၢ်​စိ ​လၢ​က​လုာ်​အ​ဂီၢ် ​ဒ်​ပှၤ​က​လုာ်​က​ဆၢ​ထၢၣ်​လၢ​အ​ခီၣ် ​လဲၤ​ထီၣ်​လဲၤ​ထီ ​လၢ​ဟီၣ်​ခိၣ်​အ​မဲာ်​ညါ, ​တုၤ​လၢ​အ​သူၣ်​လီၤ ​အ​ထံ​အ​ကီၢ်​တၢ်​စံၣ်​ညီၣ်​ပၢ​လီၤ​သး ​လၢ​အ​ပူၤ​ဖျဲး​ဒီး ​က​လုာ်​ဂၤ​အ​တၢ်​မၤ​တံာ်​တာ် ​အ​တၢ်​လုၢ်​ဘၢ​ဒိၣ်​စိ​တ​ဖၣ်​န့ၣ်​လီၤ.


​ဖဲ​လၢ ၁၉၃၇​နံၣ်​အ​ပူၤ ​က​ညီ​ခိၣ်​နၢ်​တ​ဖၣ် ​အ​ထံ​ရူၢ်​ကီၢ်​သဲး​ပၣ်​တံၣ်​က​ရူၢ်​က​ရၢ​တ​ဒံး​သိး​ဘၣ်. ​ဘၣ်​ဆၣ် ​လၢ​အ​ပှၤ​က​လုာ်​အ​ဂီၢ် ​ထိၣ်​ဃူ​အ​သး​ဒီး ​သ့​ရဲၣ်​ကျဲၤ​တၢ်​ဒီး​ပှၤ​က​လုာ်​ဂၤ​ခိၣ်​နၢ်​လၢ ​ကီၢ်​ပံၤ​ယီၤ​ဒီ​တ​ဘ့ၣ်​အ​ပူၤ​အ​ဃိ ​အဲ​က​လံး​ကီၢ်​ပံၤ​ယီၤ​ဘျီၣ်​ဒိၣ် ​ပာ်​ပ​နီၣ်​က​ညီ​နံၣ်​ထီၣ်​သီ ​ဒ်​နံၤ​သ​ဘျ့​အ​သိး​န့ၣ်​လီၤ.  ​က​ညီ​နီၣ်​တ​ယၢ်​လၢ ​တၢ်​သူ​အီၤ​တုၤ​ဖိ​စိၤ​လံၤ​စိၤ​လၢ ​က​ညီ​ဒီ​တ​က​လုာ်​အ​ကျါ ​တုၤ​ခဲ​က​နံၣ်​အံၤ​န့ၣ် ​မ့ၢ်​ခ့ၣ်​အဲၣ်​န်​အ့ၣ်​အ​တၢ်​ရဲၣ်​ကျဲၤ​တီ​ခိၣ်​ရိၣ်​မဲ​ဒီး​အ​တၢ်​ဟ့ၣ်​သါ ​လၢ​အ​ဂၢၤ​ဖှိၣ်​က့ၤ​က​ညီ​က​လုာ်​န့ၣ်​လီၤ. ​နံၤ​သ​ဘျ့ ​လၢ​ကီၢ်​ပံၤ​ယီၤ​ဒီ​တ​ဘ့ၣ်​အ​ပူၤ ​ဒ်​သိး​က​ညီ​နံၣ်​ထီၣ်​သီ​န့ၣ် ​ထဲ​ဒၣ်​က​ညီ​တ​က​လုာ်​မၤ​န့ၢ်​ဝဲ​ဒၣ်​န့ၣ် ​မ့ၢ်​က​ညီ​ခိၣ်​နၢ်​လၢ​ညါ​တ​ဖၣ် ​အ​တၤ​လၣ်​ဒီး​တၢ်​ထိၣ်​ဖှိၣ်​ဃူး​ဖိး​အ​သး ​အ​တၤ​သၣ်​န့ၣ်​လီၤ.


၇၅​နံၣ်​အ​တၢ်​ကိၢ်​တၢ်​ဂီၤ​ဒီး ​တၢ်​လီၤ​တ​သြူး



​လၢ​ဖံ​ဖု​အ​စိၤ ​က​ညီ​ဖိ​တ​ဖၣ်​လဲၤ​လၢ​ညါ​လၢ​က​လုာ်​ဂၤ​မဲာ်​ညါ​လီၤ. ​လၢ​အဲး​က​လံး​အ​ဘီ​မုၢ်​အ​ပူၤ ​က​ညီ​ဖိ​လဲၤ​လၢ​ညါ​လၢ​ပ​ယီၤ​ဖိ ​ကီၤ​လၤ​သူ​ဖိ​တ​ဖၣ်​အ​မဲာ်​ညါ ​လၢ​ထံ​ရူၢ်​ကီၢ်​သဲး, ​လၢ​ကူၣ်​သ့​ပီ​ညါ, ​လၢ​တၢ်​ဖံး​အီၣ်​မၤ​အီၣ်​မုၢ်​ကျိၤ​ဝဲၤ​ကွာ်​န့ၣ်​လီၤ. 

​တၢ်​လၢ ​ပ​မၤ​လိ​န့ၢ်​ဘၣ်​န့ၣ် ​လၢ​အ​ပူၤ​ကွံာ်​မ့ၢ်​ဂ့ၤ​ဒီး​တုၤ​လၢ​ပ​စိၤ​မ့ၢ်​ဂ့ၤ ​ဟီၣ်​ခိၣ်​အ​မဲာ်​ဖံး​ခိၣ်​န့ၣ် ​ပှၤ​က​လုာ်​ဂၤ ​တ​ဖၠဲး​လီၤ​ဆီ​န့ၢ် ​က​ညီ​ဖိ​ဘၣ်. ​ယ​မၤ​လိ​သ​ကိး​ဘၣ်​တၢ်, ​ဖံး​မၤ​သ​ကိး​ဘၣ်​တၢ် ​ဖံ​ဘၣ်​ခိၣ်​တုၤ​သိး​သိး ​ဒီး ​ကိၤ​လၤ​ဝါ​ဖံး​ဖိ, ​ပှၤ​သူ​ဖံး​ဖိ, ​ပှၤ​ယူၤ​ဒၣ်​ဖိ(​ပှၤ​ကၠူ​ဖိ), ​ပှၤ​တ​ရူး​ဖိ, ​ပှၤ​ယ​ပၣ်​ဖိ, ​ပှၤ​ခိ​ရံ​ယါ​ဖိ, ​ပှၤ​အၣ်​ကၠံၢ်​တံ​နါ​ဖိ(Argentinians), ​ပှၤ​မဲး​က​ဆံၣ်​ကၣ်​ဖိ,​ပှၤ​ကိၤ​လၤ​သူ(​ပှၤ​လီၤ​ဟဲ​စၢၤ​လၢ ​အံၣ်​ဒံ​ယၤ ​ဟ့ၣ်​တူၢ်, ​စံး​ခ်(Sikhs ပၣ်​ခၠၣ်​ပံၣ်​ဖိ),​မူး​စ​လ့ၣ်) ​ပှၤ​အါ​က​လုာ် ​တၢ်​ပာ်​သူၣ်​ပာ်​သး​တၢ်​ဆဲး​တၢ်​လၤ​အါ​မံၤ, ​ဘၣ်​ဆၣ် ​ပှၤ​က​လုာ်​လၢ ​က​ဖၠဲး​လီၤ​ဆီ​ဆီ​န့ၢ်​က​ညီ​ဖိ​န့ၣ်​ယ​တ​ထံၣ်​ဘၣ်​ဒံး​ဘၣ်. 


​ပှၤ​က​လုာ်​အ​တၢ်​လဲၤ​ထီၣ်​လဲၤ​ထီ​န့ၣ် ​ဒိး​သ​န့ၤ​ထီၣ်​အ​သး​လၢ ​ပှၤ​တ​ဂၤ​စုာ်​စုာ် ​အ​တၢ်​အိၣ်​မူ​လီၤ. ​ပှၤ​တ​က​လုာ်​အ​တၢ်​လီၤ​ဃိ​လီၤ​ဃီၢ်​န့ၣ်​တ​လီၤ​တ​သြူး​ထဲ​အ​သ​နၢၣ်​တ​ခါ​စ့ၢ်​ကီး​ဘၣ်. ​တၢ်​ကူၣ်​ဘၣ်​ကူၣ်​သ့​မ့ၢ်​လီၤ​တိၢ် ​တၢ်​သ့ၣ်​ညါ​နၢ်​ပၢၢ်​လီၤ​တိၢ် ​တၢ်​ဖှီၣ်​တၢ်​ယာ်​စ့ၢ်​ကီး​ဟဲ​သ​ဃဲၤ​ဃုာ်​လီၤ. ​တၢ်​ပာ်​ကဲ​တၢ်​သိၣ်​တၢ်​သီ​မ့ၢ်​လီၤ​ဃီၢ်​ဒီး ​လုၢ်​လၢ်​သ​ကဲာ်​ပ​ဝး​အ​တၢ်​လီၤ​ဃီၢ် ​ပိာ်​ထွဲ​ထီၣ်​အ​ခံ ​စ့ၢ်​ကီး​န့ၣ်​လီၤ. ​ပှၤ​သး​စၢ်​တ​စိၤ​လၢ ​အိၣ်​မူ​​လံ​လူၤကျူ​ဆှါ, ​ဒိၣ်​တုာ်​ဒီး​ကဲ​ထီၣ်​မိၢ်​ပၢ် ​မ့ၢ်​တ​ဘှီ​လီၤ​အ​သး​ဘၣ်​န့ၣ် ​က​ဒုး​အိၣ်​ဖျဲၣ်​ထီၣ်​က​ဒီး ​ပှၤ​​လံ​လူၤကျူ​ဆှါ ​အ​သီ​တ​စိၤ​က​ဒီး​န့ၣ်​လီၤ.


​တုၤ​လီၤ​ဖဲ၁၉၆၂​နံၣ် ​သုး​မီၤ​စိ​ရိၤ​ဟံး​န့ၢ်​ဆူၣ်​တၢ်​စိ​တၢ်​က​မီၤ​လၢ ​ကီၢ်​ပံၤ​ယီၤ​ဒီး ​မီၤ​စိ​ရိၤ​န့ၢ်​ဝ့ ​နီ​ဟး​ထီၣ်​ကွံာ်​တ​ရူး, ​ကိၤ​လၤ​သူ, ​ကိၤ​လၤ​ဝါ​မ့​ၡၢၣ်​န​ရံၣ်​ခဲ​လၢာ်​ခဲ​ဆ့​ဒီး ​ပှၤ​က​လုာ်​တ​ဖၣ် ​ဘၣ်​မၤ​လိ​က့ၤ​ဒၣ်​ပ​ဒိၣ်​အ​ကၠိ​လၢ ​အ​သိၣ်​လိ​က့ၤ ​သုး​ကုၢ်​တၢ်​ကူၣ်​သ့(​စစ်ကျွန်ပညာရေး) ​လၢ​အ​ဆီၣ်​လီၤ​အုး​ကွံာ်​ဝဲ​က​လုာ်​တ​ဖၣ်​အ​တၢ်​ဆိ​က​မိၣ် ​က​ဖီ​လီ​ဒ်​သိး​က​ကဲ​သုး​ကုၢ်​လီၤ​စိၤ​လီၤ​ဃာ် ​အ​ဂီၢ်​န့ၣ်​လီၤ. ​ပှၤ​ကိး​က​လုာ်​ဘၣ်​မၤ​လိ​က့ၤ​ဒၣ် ​က​လုာ်​ဒိၣ်​အ​စိၤ​အ​ပီၢ်​ဒီး​အ​လိာ်​အ​ပၤ​တ​ဖၣ် ​ဒ်​သိး​အ​တၢ်​ဆိ​က​မိၣ်​အ​ပူၤ​က​ထံၣ်​ဒိၣ် ​က​လုာ်​ဒိၣ်​စိ​တ​ဖၣ်​ဒီး ​အ​က​ဒၣ်​ဝဲ​အ​ပှၤ​က​လုာ် ​အ​သး​သ​ဟီၣ်​က​လီၤ​မၢ်​ဒီး ​သူၣ်​ဆံး​သး​ဆံး​ထံၣ်​ဆံး​လီၤ​က့ၤ​အ​သး​န့ၣ်​လီၤ.


​မိၢ်​ပၢ်​အ​တၢ်​ဆိၣ်​ဂ့ၤ​န့ၣ် ​ပိာ်​ထွဲ​တုၤ​ဖိ​စိၤ​လံၤ​စိၤ​န့ၣ်​လီၤ. ​က​ညီ​ဖိ​အိၣ်​လၢ ​စု​က​ဝဲၤ​တၢ်​ပၢၢ်​ဆၢ(၇၅)​နံၣ်​အ​ပူၤ​ဒၣ်​လဲာ် ​တၢ်​လဲၤ​ထီၣ်​လဲၤ​ထီၣ်​လၢ ​ဖံ​စိၤ​ဖု​စိၤ​ဒိး​န့ၢ်​ဘၣ်​န့ၣ် ​ပိာ်​ထွဲ​တ့ၢ်​အ​ခံ​အါ​မး​လီၤ. ​ဘၣ်​ဆၣ်​တၢ်​ဒုး​တၢ်​ယၤ ​အ​တၢ်​ကွၢ်​ဆၢၣ်​မဲာ်, ​ဒီး​တၢ်​ဆီၣ်​တံၢ်​မၤ​နၢၤ​အ​ဃိ​ဧါ, ​ပ​ပှၤ​က​လုာ်​ဝံၢ်​ထီၣ်​အ​ခိၣ်​တ​န့ၢ်​လၢၤ​ဘၣ်. ​တၢ်​လီၤ​တ​သြူး​န့ၣ် ​တ​မ့ၢ်​ထဲ ​တၢ်​ဖှီၣ်​တၢ်​ယာ်​တၢ်​ကိၢ်​တၢ်​ဂီၤ​ဘၣ်. ​က​လုာ်​သး​သ​ဟီၣ်, ​တၢ်​သူၣ်​တီ​သး​ရၤ, ​က​လုာ်​တၢ်​သး​ဒူ ​တၢ်​ပာ်​ကဲ​လီၤ​က့ၤ​ပ​သး ​လၢ​က​လုာ်​ဂၤ​မဲၣ်​ညါ ​လီၤ​သံး​လီၤ​ညွံး​ကွံာ်​ဝဲ. ​လၢ ​ခူ​ပူၤ​ဝ့ၢ်​ပူၤ​တၢ်​ပၢၤ​ခိၣ် ​က​လုာ်​ဒိၣ်​စိ​နုာ်​လီၤ​အီၣ်​ဂီၤ ​ပ​ပှၤ​က​လုာ်​လၢ​အါ​နံၣ်​အါ​လါ​ဒီး ​က​ညီ​ဖိ​အိၣ်​ဝဲ​တ​နီၤ​လၢ ​အ​သး​ခု​လၢ ​က​လုာ်​ဒိၣ်​စိ​လုၢ်​ဘၢ​အီၣ်​ဂီၤ​ကွံာ်​အီၤ​န့ၢ်​လံ ​အ​ဃိ​န့ၣ်​လီၤ. 


​က​လုာ်​အ​သူး​အ​သ့ၣ်​ဒီး ​က​လုာ်​သ​ကဲာ်​ပ​ဝး​န့ၣ်​ပိာ်​ထွဲ​လိာ်​အ​ခံ​န့ၣ်​လီၤ. ​ပ​ပှၤ​က​လုာ်​ကူၣ်​သ့​ပီ​ညါ ​တၢ်​သူၣ်​လီၤ​ဆီ​လီၤ​တ​ဖၣ် ​လီၤ​တိၢ်​ကွံာ်​အ​သိး​န့ၣ် ​တၢ်​မုၢ်​လၢ်​ကွၢ်​စိ​တၢ်​ဆိ​က​မိၣ်​လၢ​က​လုာ်​ဂီၢ် ​လီၤ​တိၢ်​ကွံာ်​ဝဲ​လီၤ.​က​ညီ​ဖိ​လၢ ​မၤ​လိ​န့ၢ်​ဘၣ် ​ပ​တီၢ်​ထီ​ပီ​ညါ​တ​ဖၣ်​မၤ​လိ​ဘၣ်​ဒၣ်​က​လုာ်​ဂၤ​အ​တၢ်​ဆိ​က​မိၣ်​ပီ​ညါ(​philosophy of the foreign)​လၢ ​အ​သူၣ်​လီၤ​အ​သး​လၢ ​က​လုာ်​ဂၤ​အ​လံာ်​အ​လဲၢ်(alien customs and literature), ​အ​တၢ်​ဆဲး​တၢ်​လၤ​သ​ကဲာ်​ပ​ဝး (​imported values)​ တ​ဖၣ်​အ​ဖီ​ခိၣ် ​လၢ​အါ​စု​အါ​ဘျီ​တ​ဘၣ်​လိာ်​ဖိး​မံ​ဒီး ​ပှၤ​ထူ​လံၤ​အ​လုၢ်​အ​ပှ့ၤ, ​ခိၣ်​ဃၢၤ​တၢ်​မဲ​တၢ်​မါ, ​မူ​ခိၣ်​က​လံၤ​သီၣ်​ဂီၤ​တ​ဖၣ်​ဘၣ်. ​တၢ်​အိၣ်​သး​ဒ်​သိး​အံၤ​အ​ဃိ ​ဖဲ​က​ညီ​ဖိ​မ့ၢ်​န့ၢ်​ဘၣ် ​ပီ​ညါ​ဒိၣ်​ထီ​တၢ်​မၤ​လိ​အ​ခါ​န့ၣ် ​တ​မၤ​လိ​ဘၣ်​က့ၤ​တၢ်​လၢ ​အ​က​စၢ်​အ​ကျိာ်, ​အ​ဂ့ၢ်​အ​ကျိၤ​ထူ​ထံး​ဆဲး​လၤ ​လုၢ်​ပှ့ၤ​ထူ​လံၤ​တ​ဖၣ်​လၢၤ​ဘၣ်. ​ဒ်​ထံ​ဖိ​ကျိ​လၢ​က​နၢ​ထံး ​လိာ်​ယံၤ​ကွံာ်​ဒီး ​က​စၢၢ်​က​လိ​အ​သိး ​က​ညီ​ဖိ​လၢ​ဃု​န့ၢ်​ပီ​ညါ​ယံၤ​ထီ​တ​ဖၣ် ​လိာ်​ယံၤ​ကွံာ်​ဒီး​ထူး​ထံး​တၢ်​ဆိ​က​မိၣ်​ပီ​ညါ ​ဆဲး​လၤ​သ​ကဲာ်​ပ​ဝး​တ​ဖၣ်​န့ၣ်​လီၤ. 


​က​ညီ​က​လုာ် ​ဃိး​ဆံ​မျး​က​ယၤ​ဃၣ်​ဃၣ်​န့ၣ် ​သူ​က့ၤ​ဒၣ်​က​လုာ်​ဂၤ​အ​ကျိာ် ​ဒ်​အ​မိၢ်​ကျိာ်​ပၢ်​ကျိာ်​အ​ဃိ​တၢ်​လီၤ​မၢ်​ကွံာ်​န့ၣ် ​တ​မ့ၢ်​ထဲ​တၢ်​သ့ၣ်​ညါ​နၢ်​ပၢၢ်​မိၢ်​လုၢ်​ပၢ်​ပှ့ၤ​ဘၣ်. ​လုၢ်​ဖိ​ထါ​ဖိ, ​တၢ်​တဲ​မုၢ်​နၤ, ​တၢ်​တဲ​မုာ်​နၢ်,​က​လုာ်​အ​စိၤ​အ​ပီၢ်, ​တၢ်​ပှိၤ​ပှံ​ပှိၤ​ပှီၢ်, ​တၢ်​တဲ​ခီ,​တၢ်​တဲ​လၢ​ပျၢၤ, ​တၢ်​သိၣ်​ဃီၣ်​လၢ​ပျၢၤ, ​တၢ်​က​တိၤ​ဒိ,​ဝံ​အ​တၢ်​စံး​ပာ် ​လၢ​အ​မ့ၢ်​က​လုာ်​အ​လံာ်​ဧိၤ​လဲၤ​ဧိၤ​လၢ (indigenous literature)​အ​ဒုး​နဲၣ်​ဖျါ​က​လုာ်​အ​တၢ်​အိၣ်​မူ, ​က​လုာ်​အ​တၢ်​အဲၣ်​တၢ်​ကွံ, ​တၢ်​ရ့​လိာ်​ဘၣ်​ထွဲ, ​က​လုာ်​တၢ်​သ​ကဲး​ပ​ဝး​ဖၣ် ​လီၤ​ဘံၣ်​လီၤ​ဘၢ​လီၤ​မၢ်​ကွံာ်​လၢ ​စၢၤ​သွဲၣ်​သီ​တ​ဖၣ်​အ​ကျါ​န့ၣ်​လီၤ. 

​သူၣ်​ဘီၣ်​သး​စၢ်​အ​ကျါ ​ပှၤ​လၢ​အ​သူၣ်​ဆူၣ်​အ​သး​ဆး​အိၣ်​အါ​ဒံး​က​စီၤ​ဒီ. ​ဘၣ်​ဆၣ်​မ့ၢ်​ထိၣ်​သ​တြီၤ​လၢ​ပှၤ​အါ​ဂၤ​လၢ​အ​သး​စဲ​လၢ ​တၢ်​ထူ​ဖျၢၣ်​ထူ​ဃုာ်​ဒီး​တၢ်​တ​မဲး​ခိၣ်, ​တၢ်​လိာ်​ခိၣ်​လိာ်​ကွဲ ​တၢ်​နံၤ​က​ဝဲၢ်​ပျီၢ်​က​ဒီ, ​တၢ်​ကိာ်​ပူၤ​ဝံၣ်, ​တၢ်​ဘ့ၣ်​ဖံး​ဃံ​တ​ဖၣ်​အ​တၢ်​အိၣ်​မူ​န့ၣ် ​ပ​ပှၤ​က​လုာ်​သး​စၢ် ​လူၤ​ထီၣ်​ထံ​ဂုၤ​ကီၢ်​ဂၤ​ပှၤ​သး​စၢ်​တ​ဖၣ် ​အ​တၢ်​သး​ဖး ​အ​တၢ်​ဂုာ်​ကျဲး​စၢး​တ​ချုး​ထီၣ်​ဘၣ်. ​ပှၤ​အိၣ်​ဒီး​ပှၤ​ထံ​ပှၤ​ကီၢ် ​ပှၤ​လဲၤ​ထီၣ်​လဲၤ​ထီ​န့ၣ် ​သူၣ်​ဘီၣ်​သး​စၢ်​တ​ဖၣ် ​တ​အိၣ်​မူ​ဒ်​ပ​အိၣ်​မူ​အ​သိး​ဘၣ်. ​အ​မဲ​ရ​ကၤ​တီၤ​ထီ​ကၠိ​ဖိ ​တ​ဆံ​တ​တီၤ ​ဘၣ်​မၤ​လိ​ကီၤ​မံ​ကီၤ​ဂဲၤ ​ဒီ​တ​နံၣ်​ဘၣ်​ဂုာ်​ကျဲး​စၢး ​က​တီၤ​အ​သး​လၢ​က​နုာ်​လီၤ​ဘၣ်​ဖၠၣ်​စိ​မိၤ​န့ၣ်​လီၤ. ​လၢ​တီၤ​ကၠိ​အ​ပူၤ ​ကၠိ​ဖိ​အ​သး​တ​အိၣ်​ဒံး​အ​နံၣ်​တ​ဆံ​ဒၣ်​လဲာ် ​မၤ​လိ​တ့​လိ​လ့ၣ်​က​ဟၣ် ​လၢ​လဲၤ​တၢ်​လၢ ​ခိၣ်​ဖၠူၣ်​ထၢၣ်(​ရိ​ဘီး​တ်)​တ​ဖၣ်​လံ​န့ၣ်​လီၤ.


​ပှၤ​ဂၤ​မ့ၢ်​အိၣ်​မူ ​က​ဖီ​က​ယီၢ် ​အိၣ်​ယူၤ​အီ​ခၣ် ​သူ​လၢာ်​က​လီ​ဆၢ​ဂ့ၤ​က​တီၢ်​ဘၣ်​န့ၣ် ​တ​မ့ၢ်​လၢ ​အ​ထံ​အ​ကီၢ်​က​လဲၤ​ထီၣ်​လဲၤ​ထီ​စ့ၢ်​ကီး​ဘၣ်. ​ကွၢ်​အ​ဒိ​လၢ ​တၢ်​လီၤ​ဆီ​လၢ ​ပှၤ​အၣ်​ဖ​ရံး​ကၣ်​ဖိ​အ​တၢ်​အိၣ်​မူ​ဒီး ​ပှၤ​တ​ရူး​သူၣ်​ဘီၣ်​သး​စၢ်​တ​ဖၣ်​အ​တၢ်​အိၣ်​မူ​လီၤ​ဆီ​ဒ်​လဲၣ်​န့ၣ် ​ပ​က​ထံၣ်​ဘၣ်​ထံ​ကီၢ်​တ​ဖၣ်​အ​တၢ်​အိၣ်​သး​စ့ၢ်​ကီး​န့ၣ်​လီၤ. 


​ပ​မ့ၢ်​ကွၢ်​စိ ​ဆူ​ညါ​အ​နံၣ်​ယဲၢ်​ဆံ​န့ၣ် ​ပ​မ့ၢ်​အိၣ်​မူ​ဒ်​ပ​အိၣ်​ခဲ​အံၤ​အ​သိး,  ​ပ​မ့ၢ်​လဲၤ​ကျဲ​ဒ်​ပ​လဲၤ​ညီ​နုၢ်, ​ပ​မ့ၢ်​ဖီၣ်​ဟံး​ကျၢၤ​ဃာ်​ထံ​ရူၢ်​ကီၢ်​သဲး ​တၢ်​အိၣ်​သး(​retaining status quo),​ဒီး ​ပ​ဆိ​က​မိၣ်​ဒၣ်​တၢ်​ဆိ​က​မိၣ်​လၢ​အ​က​တာ်​ထီ​လၢ​န့ၣ် ​ပှၤ​က​လုာ်​အ​ခိၣ်​က​လိၤ ​ဆူ​တၢ်​ဟး​ဂီၤ, ​က​လီၤ​သ​ဘှံး​ကွံာ်​က​ဒိ​က​ဒိ​အုၣ်​လီၤ​ကျၣ်​လီၤ​က​ဒု​က​ယီၢ်​လီၤ​မၢ်​ကွံာ်​န့ၣ်​လီၤ. ​ပ​ဝဲ ​ပ​က​မ့ၢ်​ပှၤ​လၢ​ခံ​က​တၢၢ်​တ​စိၤ​န့ၣ်​လီၤ.


​အ​ဃိ, ၂၀၂၄​နံၣ် ​က​မ့ၢ်​နံၣ်​လၢ​တၢ်​ဆီ​တ​လဲ​ဖး​ဒိၣ်​မၤ​အ​သး​တ​မ့ၢ်​ထဲ​လၢ ​ဒုး​ယၤ​ဂ့ၢ်​ဝီ ​ထံ​ရူၢ်​ကီၢ်​သဲး​ဘၣ်, ​က​ပိာ်​ထွဲ​စ့ၢ်​ကီး​အ​ခံ​လၢ ​က​လုာ်​တၢ်​မူ​ထီၣ်​ဂဲၤ​ထီၣ်, ​တၢ်​ဆီ​တ​လဲ​တၢ်​ပိၢ်​ထီၣ်​ဖး​ထီၣ်​လၢ ​တၢ်​ဆဲး​တၢ်​လၤ, ​တၢ်​ဖုး​သံ​နီၣ်​ထီၣ်​က့ၤ​လၢ​တၢ်​လီၤ​ထု​တ​ရုၤ ​တၢ်​ဆီ​တ​လဲ​ဖး​ဒိၣ်​လၢ ​တၢ်​ဆိ​က​မိၣ်​ဆိ​က​မး ​ဆဲး​လၤ​သ​ကဲာ်​ပ​ဝး​အ​တၢ်​ဆီ​တ​လဲ (​culture revolution) ​လၢ​အ​မၤ​သ​ပှၢ်​ကွံာ်​တၢ်​ပာ်​သး​လၢ​အ​က​တာ်​ထီ ​လၢ​အ​တြီ​ဃာ်​တၢ်​လဲၤ​ထီၣ်​လဲၤ​ထီ​တ​ဖၣ် ​က​ဘၣ်​အိၣ်​ထီၣ် ​န့ၣ်​လီၤ.

​

ကီၢ်​သူ​လ့ၤ​အ​တၢ်​မုၢ်​လၢ်​ကွၢ်​စိ


တၢ်​သူၣ်​ထီၣ်​က့ၤ​ကီၢ်​သူ​လ့ၤ​န့ၣ် ​ပ​တၢ်​မုၢ်​လၢ်​ကွၢ်​စိ​အ​ခိၣ်​သ့ၣ်​က​အိၣ်​ဝဲ ​သၢ​မံၤ​သၢ​နၢၣ်​လၢ ​အ​ကၢၤ​ဃာ်​လိာ်​အ​သး​ယၢ်​ခီ​ယၢ်​ခီ, ​လၢ​အ​မ့ၢ်​ဝဲ ​က​လုာ်​တၢ်​သ​ဘျ့, ​တၢ်​စီ​တၢ်​ဆှံ, ​ဒီး​က​လုာ်​အ​တၢ်​လဲၤ​ထီၣ်​လဲၤ​ထီ ​ဒ်​သိး​က​မ့ၢ်​တၢ်​သူၣ်​ထီၣ်​က့ၤ​ကီၢ်​သူ​လ့ၤ ​အ​လၢ​အ​ပှဲၤ​အ​ဂီၢ်​န့ၣ်​လီၤ (Liberty, Virtue, and Progress of the Nation). 

​ထဲ​တၢ်​သ​ဘျ့​န့ၣ် ​ကီၢ်​သူ​လ့ၤ​တ​လၢ​ပှဲၤ​ဘၣ်. ​ပှၤ​တ​က​လုာ်​န့ၢ်​တၢ်​သ​ဘျ့​တၢ​ဒီး ​အ​ထံ​ကီၢ်​တ​လဲၤ​ထီၣ်​လဲၤ​ထီ​ဘၣ်. ​ပ​ထံၣ်​ဘၣ်​တ့ၢ်​လံ​လၢ​အ​ပူၤ​ကွံာ်​လံ, ​ဖဲ​ပှၤ​မၤ​လဲၢ်​အီၣ်​ကီၢ်​တ​ဖၣ်​က့ၤ​ဒီး​ပှၤ​က​လုာ်​လၢ​အ​န့ၢ်​တၢ်​သ​ဘျ့​ဝံၤ​သူၣ်​ထီၣ်​ထံ​ကီၢ် ​န့ၣ် ​ပှၤ​လၢ​အ​ထံ​ကီၢ်​လီၤ​တ​သြူး​ကွံာ်​န့ၣ်​အါ​န့ၢ်​ဒံး ​ထံ​ကီၢ်​လၢ ​အ​လဲၤ​ထီၣ်​လဲၤ​ထီ​တ​ဖၣ်​န့ၣ်​လီၤ. ​ထံ​ကီၢ်​တၢ်​သ​ဘျ့​န့ၢ်​ဝံၤ ​တၢ်​စီ​တၢ်​ဆှံ​တၢ်​ဂ့ၤ​တၢ်​ဝါ​မ့ၢ်​လီၤ​မၢ် ​ဒီး​တၢ်​မၤ​နၢၤ​အီၣ်​ဃီၣ် ​တၢ်​ဖှီၣ်​တၢ်​ယာ်​အိၣ်​လုၢ်​ဘၢ​သ့​စ့ၢ်​ကီး​န့ၣ်​လီၤ. ​ပ​က​ဆိ​က​မိၣ်​အါ​ထီၣ်​တၢ်​သၢ​မံၤ​သၢ​နၢၣ်​အံၤ ​ဒ်​လာ်​အ​သိး. 

​တၢ​တ​မံၤ​န့ၣ် ​က​လုာ်​တၢ်​သ​ဘျ့


က​လုာ်​တၢ်​သ​ဘျ့​န့ၣ် ​မ့ၢ်​တၢ်​အ​ဂ့ၢ်​ခီၣ်​ထံး​က​တၢၢ်​တ​ခါ​လၢ ​ပှၤ​တ​က​လုာ် ​က​အိၣ်​ဒီး​အ​သူး​အ​သ့ၣ်​အ​ဂီၢ်​န့ၣ်​လီၤ. ​တၢ်​သ​ဘျ့​စံး​တၢ်​န့ၣ် ​တ​မ့ၢ်​ထဲ ​တၢ်​ပူၤ​ဖျဲး​လၢ ​တၢ်​ဆီၣ်​တံၢ်​မၤ​နၢၤ​ဒီး​ပှၤ​ဂၤ​အ​တၢ်​ဒိၣ်​စိ ​အ​ဖီ​လာ်​ဘၣ်. ​တၢ်​သ​ဘျ့​လၢ​အ​ဂ့ၤ​န့ၣ်  ​တ​မ့ၢ်​သ​ဘျ့​လၢ ​အ​တ​ကွီၣ်​တ​အိၣ်, ​တၢ်​ဂၢၤ​ဃာ်​ကၢၤ​ဃာ်​အီၤ​တ​အိၣ်​ဘၣ် ​တ​မ့ၢ်​ဘၣ်. ​ပှၤ​က​လုာ်​ဂီၢ်​မုၢ် ​အိၣ်​မူ​ဘၣ်​ထွဲ​လိာ်​သး ​လၢ​တၢ်​သ​ဘျ့​အ​ပူၤ​န့ၣ် ​သ့​ဒၣ်​ထဲ​လၢ ​သဲ​စး​တၢ်​သိၣ်​တၢ်​သီ​တၢ်​ပာ်​လီၤ​ကျဲ​ဧိၤ​က​ပူၤ​ဧိၤ​အ​ပူၤ​န့ၣ်​လီၤ. ​ပ​မှံၤ​ပ​ပှၢ်​စံး "​ထံ​ခုၣ်​လၢ​သ့ၣ်​ပှၢ်​က​ဒု, ​ကီၢ်​မုာ်​လၢ​သဲ​စး​က​လုၢ်”. ​ထံ​ကီၢ်​လၢ ​တၢ်​သ​ဘျ့​အိၣ်​အါ​တ​ဖၣ်​န့ၣ် ​မ့ၢ်​စ့ၢ်​ကီး​ထံ​ကီၢ်​လၢ ​သဲ​စး​တၢ်​သိၣ်​တၢ်​သီ ​သူၣ်​လီၤ​ဒါ​လီၤ​အ​သး ​အါ​က​တၢၢ်​တ​ဖၣ်​န့ၣ်​လီၤ. ​အ​မဲ​ရ​ကၤ​ကီၢ်​စၢ​ဖှိၣ်​န့ၣ် ​တၢ်​သ့ၣ်​ညါ​အီၤ​ဒ်​ထံ​ဖိ​ကီၢ်​ဖိ​တၢ်​သ​ဘျ့​အိၣ်​အါ​အ​သိး ​မ့ၢ်​စ့ၢ်​ကီး​ထံ​ကီၢ်​လၢ ​တၢ်​သိၣ်​တၢ်​သီ​အါ​ဒီး​ထံ​ကီၢ်​ဘျီၣ်​ဒိၣ် ​တ့​ထီၣ်​တၢ်​သိၣ်​တၢ်​သီ​ကိး​မုၢ်​နံၤ​ဒဲး ​အိၣ်​ဘှံး​အိၣ်​သါ​တ​ချုး​ဘၣ်. ​ထံ​ကီၢ်​လၢ ​တၢ်​မၤ​နၢၤ​အီၣ်​ဃီၣ်​အိၣ်​အါ​တ​ဖၣ်​န့ၣ် ​ပှၤ​လၢ​အ​အိၣ်​ဒီး​စိ​က​မီၤ​တ​ဖၣ် ​ထုး​ထီၣ်​သူ​အ​စိ​က​မီၤ​ဖဲ​ဒၣ်​အ​သး ​လၢ​အ​တ​မ့ၢ်​တၢ်​သိၣ်​တၢ်​သီ​လၢ ​ထံ​ဖိ​ကီၢ်​ဖိ​ခၢၣ်​စး​ပ​ဒိၣ်​ပ​ပှၢ်​တ့​လီၤ​ပာ်​လီၤ​ဝဲ​ဒၣ်​န့ၣ်​ဘၣ်. ​တၢ်​သိၣ်​တၢ်​သီ​ဟ့ၣ်​ပှၤ​တၢ်​သ​ဘျ့ ​လၢ​အိၣ်​ဒီး​အ​သ​ကွီၣ်​ဒီး ​တၢ်​သိၣ်​တၢ်​သီ​လၢ ​အ​ဒုး​အိၣ်​ထီၣ်​က​လုာ်​တၢ်​သ​ဘျ့​န့ၣ် ​မ့ၢ်​က​လုာ်​အ​သူး​အ​သ့ၣ်​န့ၣ်​လီၤ. ​ထဲ​ဒၣ်​လၢ ​က​လုာ်​တၢ်​သ​ဘျ့​အ​ပူၤ ​ပ​က​ဖံး​မၤ​ပၢ​ဆှၢ​ရဲၣ်​လီၤ​ပ​သး​လၢ ​က​လုာ်​တၢ်​လဲၤ​ထီၣ်​လဲၤ​ထီ​အ​ဂီၢ်​က​န့ၢ်​က​သ့​လီၤ. 

​

တၢ်​သ​ဘျ့​လၢ​အ​တ​လၢ်​ထီၣ်​က​လုာ်​အ​သူး​အ​သ့ၣ်​န့ၣ်​မ့ၢ်​ပ​အိၣ်​ဒီး​တၢ်​သ​ဘျ့​လၢ ​ပ​က​စံၣ်​ညီ​ပၢ​လီၤ​ရဲၣ်​လီၤ​ကျဲၤ​လီၤ​ပ​သး​ဒ် ​ပ​တၢ်​တိာ်​ပ​တၢ်​မံ​မိၢ်​အိၣ်​ဝဲ​လၢ ​ပ​ပှၤ​က​လုာ်​အ​ဂီၢ်​အ​သိး ​ဒီး​တၢ်​သ​ဘျ့​လၢ ​နီၢ်​ခိ​နီၢ်​သး ​လၢ​တၢ်​ဆိ​က​မိၣ်​ဆိ​က​မး​တ​ဖၣ်​န့ၣ်​လီၤ.


​ခံ​မံၤ​တ​မံၤ​န့ၣ် ​တၢ်​စီ​တၢ်​ဆှံ


ထံ​ကီၢ်​တ​ဘ့ၣ်​လၢ​အ​န့ၢ်​တၢ်​သ​ဘျ့​ဒီး ​တၢ်​စီ​တၢ်​ဆှံ​လီၤ​မၢ်​ကွံာ်​န့ၣ် ​က​ကဲ​တၢ်​မုၢ်​လၢ်​လၢ​ဆီ​ဒံၣ်​ဆီ​ဖိ​ဒီး​လၢ​အ​နီၢ်​ကီၢ်​ကဲ​ဆီ​ဒံၣ်​က​အိ​န့ၣ်​လီၤ. ​တၢ်​စီ​တၢ်​ဆှံ​န့ၣ် ​တ​မ့ၢ်​ထဲ ​သ​ကဲာ်​ပ​ဝး​တၢ်​စီ​တၢ်​ဆှံ, ​မုာ်​ခွါ​တၢ်​စီ​တၢ်​ဆှံ, ​တၢ်​ဆဲး​တၢ်​လၤ​တၢ်​စီ​တၢ်​ဆှံ​ဘၣ်. ​တၢ်​စီ​တၢ်​ဆှံ​လၢ​အ​ဝး​က​ဝီၤ​ပှဲၤ​န့ၣ် ​က​မ့ၢ်​ဝဲ​ဟီၣ်​ခိၣ်​ဖိ​ဃုာ်​ဒီး ​ခိၣ်​ဃၢၤ​န့​ဆၢၣ်​တၢ်​စီ​တၢ်​ဆှံ ​ခဲ​လၢာ်​ပာ်​ဖှိၣ်​န့ၣ်​လီၤ. ​ထံ​ကီၢ်​လၢ ​အ​လဲၤ​ထီၣ်​လဲၤ​ထီ​တ​ဖၣ် ​အါ​တ​က့ၢ်​န့ၣ်​တ​ဘျီ​အ​ခါ​မၤ​ဘၣ်​အၢ​ဘၣ် ​အ​ခိၣ်​ဃၢၤ​န့​ဆၢၣ် ​လၢ ​ဂာ်​သ​လီ​အ​စုၣ်​အ​ပျၢ်(​chemicals)​တ​ဖၣ်​အ​ဃိ ​ဟီၣ်​ခိၣ်​ညၣ်​ထ့ၣ် ​တၢ်​စီ​တၢ်​ဆှံ​လီၤ​မၢ်​တုၤ​ဖိ​စိၤ​လံၤ​စိၤ, ​ထံ​ဖိ​ကျိ​တၢ်​စီ​တၢ်​ဆှံ​လီၤ​မၢ်​ဒီး ​တၢ်​မဲ​တၢ်​မါ, ​တၢ်​အီၣ်​တၢ်​အီ​အ​တၢ်​စီ​တၢ်​ဆှံ​လီၤ​မၢ်​ကွံာ်​န့ၣ်​လီၤ. ​ကီၢ်​အ​မဲ​ရ​ကၤ​အ​ပူၤ ​ခဲ​အံၤ​တ​စိၤ ​ထံ​ကျိ​ထံ​ကွာ် ​က​စၢၢ်​က​လိ​တ​ဖၣ် ​တၢ်​ပာ်​က​ဆှဲ​က​ဆီှ​က​တီၤ​အီၤ​လၢ​တၢ်​သိၣ်​တၢ်​သီ​ဃံး​ဃံး, ​န​လဲၤ​ထိး​ဘူး​မး​တ​န့ၢ်​ဘၣ်. ​ဘၣ်​ဆၣ်, ​ထံ​ကျိ​ဖိ​တ​နီၤ​လၢ ​ကီၢ်​စဲၣ်​ခဲၣ်​လံၣ်​ဖိ​နံ​ယါ​အ​ပူၤ​န့ၣ်​ပှၤ​အီ​တ​ဘူၣ်​ပှၤ​အီ​တ​ကြၢး​လၢၤ​ဘၣ်. ​လၢ​ညါ​တ​စိၤ​တၢ်​ခူၣ်​လၢၢ်​ခူၣ်​ထူ​စၢၢ်​ထး​တ​ဖၣ် ​အ​ခါ​တၢ်​သူ​တ့ၢ်​ဂာ်​သ​လီ​ထး​ကိၤ(heavy metals)​တ​ဖၣ်​လၢ​တၢ်​တ​ဂၢၤ​အီၤ​လၢ​တၢ်​သိၣ်​တၢ်​သီ​ဒံး​ဘၣ်​ဒီး ​တုၤ​လၢ​ဖိ​စိၤ​လံၤ​စိၤ​န့ၣ် ​တၢ်​မၤ​က​ဆှီ​က့ၤ​အီၤ ​တ​ပျီ​လၢၤ​ဘၣ်. 


​အ​ခဲ​အံၤ ​ကီၢ်​သူ​လ့ၤ​အ​ပူၤ ​က​စၢၢ်​ကျါ​စံာ်​ခိၣ်​ပျီ​ပူၤ​တ​ဖၣ် ​ဟီၣ်​ခိၣ်​ညၣ်​ထ့ၣ်​စီ​ဆှံ​ဒံး, ​တၢ်​တ​သူ​ဟီၣ်​ခိၣ်​ညၣ်​ထ့ၣ်​ယီၤ​ဂာ်​သ​လီ(​chemical fertilizers)​လၢ​စံာ်​ပျီ​ပူၤ, ​လၢ​ဃုး​ပူၤ​သံၣ်​ပူၤ​ဒံး​ဘၣ်.  ​ထံ​ကျိ​ထံ​ကွာ်​ထံ​မူ​ခံ​တ​ဖၣ် ​စီ​ဆှံ​ဒံး. ​ပှၤ​အီ​ဘူၣ်​ဒံး. ​ဘၣ်​ဆၣ်, ​လၢ​က​စၢၢ်​ဂံၢ်​ထံး ​တၢ်​ခူၣ်​လၢၢ်​ခူၣ်​ထူ, ​တၢ်​ဖီၣ်​ထူ​ဖီၣ်​စ့, ​တၢ်​မ့ၢ်​လူ​လီၤ​ဂၢ်​လီၤ​စၢၢ်​ထး​က​ပံာ်​ထံ​လၢ​ထံ​ကျိ​ပူၤ​န့ၣ်  ​ဘှ့ၣ်​ခိၣ်​ပျီ​ပူၤ ​ထံ​ကျိ​ဒီး​နိၣ်​အီ​ကွံ​တ​ဖၣ် ​အ​ထံ​က​က​ဆှီ​ဒံး​ဧါ, ​ပှၤ​အီ​အီၤ​က​ဘူၣ်​ဒံး​ဧါ. ​ဂာ်​သ​လီ​အ​တၢ်​သိၣ်​တၢ်​သီ​တ​အိၣ်​သူၣ်​လီၤ​အ​သး​ဒံး​ဘၣ် ​ဒီး ​ခိၣ်​ဃၢၤ​န့​ဆၢၣ်​တၢ်​မဲ​တၢ်​မါ​တၢ်​က​သါ​တ​ဖၣ် ​အ​တၢ်​ဘၣ်​ထွဲ​လိာ်​သး, ​တၢ်​သူ​ဂာ်​သ​လီ ​အ​တၢ်​ပိာ်​ထွဲ​ထီၣ်​အ​ခံ​တ​ဖၣ် ​တၢ်​တ​ဃိ​ထံ​အီၤ​စ့ၢ်​ကီး​ဒံး​ဘၣ်​န့ၣ် ​တ​မ့ၢ်​ဆၢ​က​တီၢ်​လၢ​တၢ်​ကြၢး​ခူၣ်​စၢၢ်​ထး ​သူ​ဂာ်​သ​လီ​တ​ဖၣ်​ဒံး​ဘၣ်. 

​ဟီၣ်​ခိၣ်​ဖိ​ကိး​ဂၤ​ဆၢ​အိၣ်​ဘၣ်​လၢ​ထံ​ကီၢ်​လၢ ​အ​အိၣ်​ဒီး​ထံ​ဖိ​ကီၢ်​ဖိ​လၢ​အ​သူၣ်​တီ​သး​ရၤ, ​တ​မၤ​အီၣ်​က​ဘျံး​က​ဘျၣ်, ​တ​ဂၤ​ဒီး​တ​ဂၤ​ပာ်​ကဲ​လိာ်​သး, ​တၢ်​ပာ်​ကဲ​ပှၤ​ဂၤ​အ​တၢ်​စု​လီၢ်​ခီၣ်​ခိၣ်​အ​တၢ်​ဖိ​တၢ်​လံၤ, ​လၢ​အ​တ​မ့ၢ်​ပ​တၢ်​န့ၣ်​ပ​တ​ဟး​ဟံး​န့ၢ်​ကြီ​အီၤ​ဘၣ် ​န့ၣ်​လီၤ.  ​က​လုာ်​သ​ကဲာ်​ပ​ဝး​က​ဆှဲ​က​ဆှီ​, ​က​လုာ်​သး​ခီၣ်​ၡ့ၣ် ​မ့ၢ်​ကျၢၤ​မ့ၢ်​ထီ​န့ၣ် ​ပှၤ​တ​က​လုာ်​ပာ်​ကဲ​လီၤ​အ​သး​ဂ့ၤ​စ့ၢ်​ကီး​န့ၣ်​လီၤ. ​ထံ​ဖိ​ကီၢ်​ဖိ​အ​သ​ကဲာ်​ပ​ဝး ​အ​တၢ်​ဆဲး​တၢ်​လၤ ​မ့ၢ်​လီၤ​တ​သြူး​န့ၣ်​ဒီး​ထံ​ကီၢ်​န့ၣ်​အိၣ်​တ​မုာ်​စ့ၢ်​ဘၣ်. ​ထံ​ကီၢ်​လၢ ​အ​တၢ်​သ​ကဲာ်​ပ​ဝး​လီၤ​ဃီၢ်, ​တၢ်​အီၣ်​ဟုၣ်​အီၣ်​ဘျၣ်, ​တၢ်​က​ဘျံး​က​ဘျၣ်​အါ​န့ၣ် ​ထံ​ကီၢ်​လီၤ​ဃိ​လီၤ​ဃီၢ် ​လီၤ​ပှီၢ်​ကွံာ်​ဝဲ​န့ၣ် ​ပ​ထံၣ်​ဘၣ်​တၢ်​အ​ဒိ​လၢ​အ​ဘူး​က​တၢၢ်​ဒီး​ပှၤ​လီၤ. ​အ​ခဲ​အံၤ ​ကီၢ်​ပံၤ​ယီၤ​ဖိ​တ​ဖၣ် ​ရၤ​လီၤ​အ​သး ​လၢ​ကၠီၣ်​တဲၣ်​အ​ပူၤ​ဒီး​ဟီၣ်​ခိၣ်​ဒီ​တ​ဘ့ၣ်​အ​သိး, ​အ​သ​ကဲာ်​ပ​ဝး​တ​ဖၣ်​စ့ၢ်​ကီး ​ရၤ​လီၤ​ပိာ်​ထွဲ​အ​ခံ ​ဆူ​ထံ​ကီၢ်​တ​ဖၣ်​န့ၣ်​လီၤ. 


​ကၠီၣ်​တဲၣ်​ပူၤ ​လၢ​ကီၢ်​ပံၤ​ယီၤ​ဖိ​အိၣ်​အါ​အ​လီၢ်​န့ၣ် ​ကၠီၣ်​တဲၣ်​ဖိ​က​အု​က​စွါ​လၢ ​တၢ်​အီၣ်​ဃုာ်(​ဟုၣ်)​အီၣ်​ဘျၣ်, ​တၢ်​မၤ​ဂီၤ​တၢ်​တၢ်​အါ​ထီၣ်​လီၤ. ​လၢ​မဲ​ဆိး​မဲၢ်​ပး​အ​ပူၤ ​ဒ်​သိး​သိ​လ့ၣ်​တ​ဖၣ်​အ​တၢ်​လဲၤ​တၢ်​ဘၣ်​ဒိ​ဘၣ်​ထံး​က​စှၤ​အ​ဂီၢ် ​လၢ​ကျဲ​ခိၣ်​ကျဲ​ဃၢၤ​န့ၣ် ​တၢ်​ဆီ​လီၤ​ဃာ်​မဲာ်​ထံ​က​လၤ​တ​ဖၣ် ​ဒီး​တၢ်​မၤ​သ့ၣ်​ဖး​မၤ​ဟး​ဂီၤ​အီၤ​န့ၣ် ​တ​မ့ၢ်​ပှၤ​ကၠီၣ်​တဲ​ဖိ​တ​ဖၣ်​အ​လုၢ်​အ​လၢ်​ဘၣ်. ​လၢ​အ​မဲ​ရ​ကၤ​အ​ပူၤ​ကီၢ်​ပံၤ​ယီၤ​ဖိ ​လၢ​အ​မၤ​ကၤ​ဆါ​အီၣ်​စူၣ်​ၡံၣ်​ဒီး ​ဆိ​က​မိၣ်​ဝဲ​လၢ ​က​ဘၣ်​သ​ဘျံး​တၢ်​သိၣ်​တၢ်​သီ​ဒ်​လဲၣ်​အ​ဂ့ၢ်​န့ၣ် ​မ့ၢ်​အ​ဒိ​လၢ ​တၢ်​သ​ကဲာ်​ပ​ဝး​န့ၣ် ​တၢ်​စိာ်​ခီ​အီၤ ​ခီ​ထံ​ခီ​ကီၢ်​သ့​န့ၣ်​လီၤ.


​ထံ​ကီၢ်​တ​ဘ့ၣ်​အ​ပူၤ ​ထံ​ဖိ​ကီၢ်​ဖိ ​က​ဘျံး​က​ဘျၣ်​တၢ်​အီၣ်​ဃုုာ်​အီၣ်​ဝာ် ​မ့ၢ်​အါ​န့ၣ်​ထံ​ကီၢ်​ဟး​ဂီၤ​လီၤ. ​ကီၢ်​ပံၤ​ယီၤ​အ​တၢ်​ဂ့ၢ်​ကီ​န့ၣ် ​တ​မ့ၢ်​ထံ​ရူၢ်​ကီၢ်​သဲး​အ​တၢ်​ဂ့ၢ်​ကီ​ဘၣ်. ​ကီၢ်​ပံၤ​ယီၤ​အ​တၢ်​လီၤ​ပှီၢ်​န့ၣ် ​တ​မ့ၢ်​ထဲ​ထံ​ရူၢ်​ကီၢ်​သဲး​အ​တၢ်​လီၤ​ပှီၢ်​ဘၣ်.


​တၢ်​ဂ့ၢ်​ကီ​လၢ ​တၢ်​ဘှီ​က့ၤ​အီၤ​တ​န့ၢ်​ညီ​ညီ ​လၢ​ပိာ်​ထွဲ​အ​ခံ​တ​စိၤ​ဝံၤ​တ​စိၤ​န့ၣ် ​တၢ်​သ​ကဲာ်​ပ​ဝး​တၢ်​ဆိ​က​မိၣ်​ဆိ​က​မး ​တၢ်​အ​လု​အ​လၢ်​တ​ဖၣ်​န့ၣ်​လီၤ. ​ကီၢ်​ပံၤ​ယီၤ​မ့ၢ်​လီၤ​ပှီၢ်​ကွံာ်​လၢ ​တၢ်​သ​ကဲာ်​ပ​ဝး​ဒီး ​က​ထုး​လီၤ​စ့ၢ်​ကီး​တၢ်​လၢ​အ​ဃၢၤ​လီၤ. ​လုၢ်​လၢ်​သ​ကဲာ်​ပ​ဝး ​အ​တၢ်​ဘၣ်​ကူ​ဘၣ်​ဂာ် ​ဆူ​ပ​ပှၤ​က​လုာ်​ကျါ​န့ၣ် ​ပ​မၤ​က​ဆှီ​က့ၤ​အီၤ​က​န့ၢ် ​ဒ်​လဲၣ်.


​ကီၢ်​သူ​လ့ၤ​အ​တၢ်​မုၢ်​လၢ်​ကွၢ်​စိ​အ​ခိၣ်​သ့ၣ်​န့ၣ် ​တၢ်​စီ​တၢ်​ဆှံ​န့ၣ်​လီၤ. ​တၢ်​စီ​တၢ်​ဆှံ​တၢ်​တီ​တၢ်​လိၤ​န့ၣ် ​တၢ်​ကၢၤ​ဃာ်​အီၤ​က​အိၣ်​ဝဲ​သၢ​နၢၣ်​လၢ​အ​မ့ၢ်​ဝဲ ​လၢ​တၢ်​အီၣ်​ကုး​အီၤ​ပှဲၤ, ​လၢ​သဲ​စး​တၢ်​သိၣ်​တၢ်​သီ​လၢ​တၢ်​ကွဲး​လီၤ​ပာ်​လီၤ​မၤ​မူ​အီၤ, ​ဒီး​လၢ​တၢ်​ဆဲး​တၢ်​လၤ​အ​ပ​တီၢ်​ဂ့ၤ​ထီ​တ​ဖၣ်(​prosperity, laws, high culture)​န့ၣ်​လီၤ. ​ထဲ​တ​သ​နၢၣ်​န့ၣ်​တၢ်​ကၢၤ​အီၤ​တ​န့ၢ်​ဘၣ်. ​တၢ်​ဆဲး​တၢ်​လၤ​လၢ​အ​ဂ့ၤ​တ​ဖၣ် ​က​ဘၣ်​ပိာ်​ထွဲ​အ​ခံ​ဒီး ​တၢ်​အီၣ်​ကုး​အီၤ​ပှဲၤ​န့ၣ်​လီၤ. ​ဒူ​သ​ဝီ​ပှၤ​တ​ဝၢ​အ​ပူၤ​န့ၣ် ​ပှၤ​အါ​ဂၤ​အိၣ်​မူ​အိၣ်​ဂ့ၤ​အိၣ်​ဝါ ​က​လုၢ်​တီ​တီ​သး​တီ​တီ ​ပာ်​ကဲ​ပှၤ​ဂၤ​ပှၤ​ဂၤ​အ​သံၣ်​အ​​ကျိး, ​ဘၣ်​ဆၣ်​ညီ​နုၢ်​န့ၣ် ​ဒူ​သ​ဝီ​ပူၤ​န့ၣ် ​ပှၤ​နါ​လံ​အိၣ်​ပူၤ​ဂၤ​ပူၤ​ဂၤ​အ​ဃိ ​တၢ်​သိၣ်​တၢ်​သီ​က​ဘၣ်​ကၢၤ​အီၤ​န့ၣ်​လီၤ. ​တၢ်​သိၣ်​တၢ်​သီ​တ​ဖၣ် ​မ့ၢ်​စ့ၢ်​ကီး​တၢ်​မၤ​လိာ်​လၢ​အ​မၤ​ကျၢၤ​ထီၣ် ​သး​အ​ခီၣ်​ၡ့ၣ်​တၢ်​ဆဲး​တၢ်​လၤ ​ဒီး​ကၢၤ​လိာ်​အ​သး​ယာ်​ခီ​ယာ်​ခီ​န့ၣ်​လီၤ. 


​ထံ​ကျိ​ထံ​ကွာ်​တၢ်​က​ဆှဲ​က​ဆှီ​, ​ဒူ​သ​ဝီ​ဟံၣ်​ဃီ​ခိၣ်​ဃၢၤ​တၢ်​က​ဆှဲ​က​ဆီှ, ​တၢ်​က​မှံၤ​က​မှီၣ် ​တၢ်​ကွံာ်​အီၤ​လၢ​ဘၣ်​လီၢ်​ဘၣ်​ကျဲ, ​ထံ​လူ​လီၢ် ​ယွၤ​လီၤ​လၢ​အ​ကျိၤ​အ​ကျဲ​အ​ထံ​တိၤ​တ​ဖၣ်(​waste management)​န့ၣ် ​မ့ၢ်​စ့ၢ်​ကီး​တၢ်​အ​ခိၣ်​သ့ၣ်​လၢ ​တၢ်​က​တီၤ​ခိၣ်​ဃၢၤ​န့​ဆၢၣ်​တၢ်​စီ​တၢ်​ဆှံ​န့ၣ်​လီၤ. ​ခဲ​အံၤ​ဆၢ​က​တီၢ် ​ကီၢ်​သူ​လ့ၤ​အ​ပူၤ ​တၢ်​တ​သူ​စဲး​ဖီ​က​ဟၣ် ​အါ​လၢ်​ကဲာ်​ဆိး​ဒံး​ဘၣ်. ​ဘၣ်​ဆၣ်​စဲး​သိ​ထံ​တ​ဖၣ်​တၢ်​ဂၢ်​လီၤ​အီၤ​ဆူ ​ထံ​ကျိ​ပူၤ​န့ၣ် ​တၢ်​တ​ဆိ​က​မိၣ်​ထွဲ​အ​ဂ့ၢ်​ကဲာ်​ဆိး​ဘၣ်. ​ဟီၣ်​ခိၣ်​ဖး​လဲၢ်​ဖး​ထီ​န့ၣ် ​ပ​မၤ​ဘၣ်​အၢ​အီၤ​ညီ​လီၤ, ​ဘၣ်​ဆၣ် ​မုၢ်​က​အိၣ်​ဝဲ​တ​နံၤ​လၢ​ပ​ဘၣ်​မ့ၢ်​မၤ​က​ဆှီ​က့ၤ​အီၤ​န့ၣ် ​ကီ​ဒိၣ်​မး. 


​တၢ်​ပာ်​ကဲ​မုၣ်​ခွါ​တၢ်​စီ​တၢ်​ဆှံ​မ့ၢ်​တ​အိၣ်, ​တၢ်​လူၤ​ပိာ်​ထွဲ ​တၢ်​မုာ်​ဖံး​မုာ်​ညၣ်, ​ခ့​ခါ​တၢ်​လီၤ​ထွံ​လီၤ​ယွၤ​န့ၣ် ​က​ဒုး​အိၣ်​ထီၣ်​တၢ်​က​ဆွံ​က​ဆွဲ​လၢ ​ပှၤ​ဂ့ၢ်​ဝီ​ဒီး ​ဟံၣ်​ဖိ​ဃီ​ဖိ​တၢ်​တ​ဂၢၢ်​တ​ကျၢၤ​န့ၣ်​လီၤ.  ​ဖိ​မုာ်​ဖိ​ခွါ​တ​ဖၣ်​က​ဟး​လုၢ်​အီၣ်​သး​သ​မူ​လၢ ​အ​နီၣ်​ခိ ​လၢ​ကီၢ်​ဆၢ ​တၢ်​တၤ​ကျိၣ်​တၤ​စ့​အ​ဝဲၤ​လီၢ်​တ​ဖၣ် ​ဒီး​တၢ်​လုၢ်​အီၣ်​သး​သ​မူ​လၢ​တ​ဘၣ်​ကျဲ​ဘၣ်​က​ပိၤ, ​ဒီး​တၢ်​မၤ​အီၣ်​ညီ​တၢ်​န့ၣ် ​ထုး​လီၤ​တ​သြူး​စ့ၢ်​ကီး ​ပှၤ​တ​ဝၢ​က​လုာ်​အ​သး​ခိၣ်​ၡ့ၣ်​န့ၣ်​လီၤ.


​ထံ​လီၢ်​ကီၢ်​ပူၤ​တၢ်​သ​ဘျ့​မ့ၢ်​အိၣ်​ထီၣ်​န့ၣ် ​တ​မှံၤ​တ​ပျီၤ ​ဟဲ​ဟး​က​သုၣ်​က​သီ(​tourism) ​အ​ဃိ​တၢ်​ဖံး​အီၣ်​မၤ​အီၣ်​လၢ ​ကျဲ​အ​ဂၤ​တ​ဖၣ် ​က​ဘၣ်​ဘၣ်​လိာ်​ဘၣ်​စး​ဒ်​သိး​ပှၤ​သု​တ​မၤ​ညီ​အီၣ်​ညီ​အ​ဆၣ် ​လၢ​က​မၤ​ဘၣ်​ဒိ​ထံ​ကီၢ်​တၢ်​စီ​တၢ်​ဆှံ​တ​ဖၣ်​ဘၣ်​န့ၣ်​လီၤ.  ​နီၢ်​တ​ဂၤ​တၢ်​သ​ဘျ့​န့ၣ် ​တၢ်​မ့ၢ်​ဟံး​န့ၢ်​သူ​အီၤ​တ​ကူၣ်​တ​ကျီ​ဒီး ​ကဲ​ထီၣ်​က့ၤ​တၢ်​လီၤ​ဃိ​လီၤ​ဃီၢ်​လၢ ​ဟံၣ်​ဖိ​ဃီ​ဖိ​ဒီး ​ထံ​ကီၢ်​အ​တၢ်​လီၤ​ဃိ​လီၤ​ဃီၢ်​န့ၣ်​လီၤ. ​ပှၤ​နီၢ်​တ​ဂၤ​အ​တၢ်​ဂ့ၢ်​ကီ​တ​ဖၣ် ​မ့ၢ်​အိၣ်​အါ​ထီၣ်​လၢ​ထံ​လီၢ်​ကီၢ်​ပူၤ​န့ၣ် ​ကဲ​ထီၣ်​ထံ​ကီၢ်​အ​တၢ်​ဂ့ၢ်​ကီ​န့ၣ်​လီၤ. 


​ဒ်​သိး​ထံ​ကီၢ်​ဒူ​သ​ဝီ​ခူ​ဝ့ၢ်​က​မ့ၢ်​တၢ်​လၢ ​ပှၤ​အိၣ်​အီၤ​မုာ်​အ​ဂီၢ် ​ပှၤ​က​လုာ်​က​ဘၣ်​မၤ​လိ​အ​သး ​ခူ​ဖိ​ဝ့ၢ်​ဖိ​အ​တၢ်​ဆဲး​တၢ်​လၤ(​civic culture and common courtesy)​န့ၣ်​လီၤ. ​ကျဲ​မုၢ်​ကျဲ​ဘိ ​အိၣ်​ဒီး​အ​တၢ်​သိၣ်​တၢ်​သီ​အိၣ်​လၢ  ​တၢ်​က​ဘၣ်​ပိာ်​ကျဲ​လၢ​စု​စ့ၣ်​စု​ထွဲ, ​ပှၤ​ရဲၣ်​လီၤ​သး​လၢ​အ​ကျိၤ​အ​ကျဲ(​orderly citizen)​တ​ဖၣ်​န့ၣ်​လီၤ. ​ကွၢ်​အ​ဒိ​လၢ ​ပှၤ​ယ​ပၣ်​ဖိ​တ​ဖၣ် ​ပိာ်​ကျဲ​တၢ်​သိၣ်​တၢ်​သီ​ဒ်​လဲၣ်, ​လၢ​ကၠိ​လၢ​ကီၣ် ​ကိၠ​ဖိ​ဆံး​ဖိ​တ​ဖၣ် ​အိၣ်​ရဲၣ်​လီၤ​သး, ​သ့ၣ်​ညါ​ပာ်​ကဲ​မူ​ဒါ​ဒ်​လဲၣ်​န့ၣ် ​မ့ၢ်​တၢ်​လီၤ​ကွၢ်​လိ​အ​ဂ့ၢ်​တ​ဖၣ်​န့ၣ်​လီၤ. ပ​က​သူ​သ​ကိး​ကျဲ​မုၢ်​ကျဲ​ဘိ, ​တၢ်​သူၣ်​ထီၣ်, ​တၢ်​လဲၤ​ဟး​လီၢ်​တ​ဖၣ်​န့ၣ် ​ပှၤ​တ​ဂၤ​သူ​ဝံၤ ​သု​တ​ကဲ​ထီၣ်​တၢ်​သး​ဘၣ်​တံာ်​တာ် ​လၢ​ပှၤ​ခံ​တ​ဂၤ​အ​ဂီၢ်​န့ၣ် ​လိၣ်​ဘၣ်​ဝဲ ​ခူ​ဖိ​ဝ့ၢ်​ဖိ​အ​တၢ်​ဆဲး​တၢ်​လၤ​အ​ဃိ​ဒီး ​သး​ခီၣ်​ၡ့ၣ်​ပ​တီၢ်​မ့ၢ်​ထီ​မး ​ထံ​ကီၢ်​က​က​ဆီှ​န့ၣ်​လီၤ.


​တၢ်​လဲၤ​ထီၣ်​လဲၤ​ထီ​ဒီး ​တၢ်​စီ​တၢ်​ဆှံ​န့ၣ် ​တၢ်​စီ​တၢ်​ဆှံ​က​ဘၣ်​ဟဲ​လၢ​ညါ​လီၤ. ​တၢ်​ဃု​တၢ်​လဲၤ​ထီၣ်​လဲၤ​ထီ​လၢ​အ​လိၣ်​လု(greed -​တၢ်​သူၣ်​လီ​သး​ကွံ​အါ​တ​လၢ)​လၢ​အ​တ​ပာ်​ကဲ​ခိၣ်​ဃၢၤ​န့​ဆၢၣ်​ဒီး ​က​လုာ်​တၢ်​စီ​တၢ်​ဆှံ​ဘၣ်​န့ၣ် ​တ​မ့ၢ်​တၢ်​လဲၤ​ထီၣ်​လဲၤ​ထီၣ်​ဘၣ်.

Photo Source: Knyaw Curious Mind Group of Kawthoolei

​သၢ​မံ​တ​မံၤ​န့ၣ် ​တၢ်​လဲၤ​ထီၣ်​လဲၤ​ထီ


တၢ်​လဲၤ​ထီၣ်​လဲၤ​ထီ​လၢ​အ​ဝး​က​ဝီၤ​ပှဲၤ​န့ၣ် ​က​မ့ၢ်​ဝဲ ​တၢ်​လဲၤ​ထီၣ်​လဲၤ​ထီ​လၢ ​နီၢ်​ခိ​ဒီး​နီၢ်​သး​န့ၣ်​လီၤ. ​လၢ​နီၢ်​ခီ​န့ၣ် ​တၢ်​လဲၤ​ထီၣ်​လဲၤ​ထီ​လၢ​စဲး​ဖီ​က​ဟၣ်, ​စဲ​အ့ၣ်​ပီ​ညါ​ကူၣ်​သ့, ​တၢ်​သူၣ်​ထီၣ်​ဆီ​လီၤ​ကျဲ​မုၢ်​ကျဲ​ဘိ, ​တၢ်​ဆဲး​ကျိး​သ​န့​တ​ဖၣ်(​infrastructure)​န့ၣ်​လီၤ. ​ဒီး​လၢ​နီၣ်​သး​တ​က​ပၤ ​ပှၤ​က​လုာ်​တၢ်​ဆိ​က​မိၣ်​ဆိ​က​မး, ​ပှၤ​က​လုာ်​အ​တၢ်​တူၢ်​ခိၣ်​ပာ်​သး​အ​တီ​ပ​တီၢ်​ဂ့ၤ​ဒီး​ထံ​ဖိ​ကီၢ်​ဖိ ​ပှၤ​တ​ဝၢ​အံး​ထွဲ​ကွၢ်​ထွဲ​လိာ်​အ​သး, ​တၢ်​ဘၣ်​လိာ်​ဖိး​မံ​လၢ​က​လုာ်​တ​ဖၣ်​အ​ကျါ (social harmony)​က​ဘၣ်​အိၣ်​ဝဲ ​ဒ်​သိး​က​မ့ၢ်​တၢ်​လဲၤ​ထီၣ်​လဲၤ​အ​လၢ​အ​ပှဲၤ​အ​ဂီၢ်​န့ၣ်​လီၤ. 


​ထံ​ကီၢ်​မ့ၢ်​လဲၤ​ထီၣ်​လဲၤ​ထီ, ​က​လုာ်​မ့ၢ်​အိၣ်​ဒီး​အ​သူး​အ​သ့ၣ်​န့ၣ် ​ပှၤ​က​ဟဲ​ဆီၣ်​တံၢ်​မၤ​နၢၤ​ပှၤ​အ​ဂီၢ်​အ​လီၢ်​တ​အိၣ်​စ့ၢ်​ဘၣ်. ​ပ​မ့ၢ်​ကွၢ်​အ​ဒိ​လၢ​ထံ​ကီၢ်​ပံ​တံ​နံ​ဖိ​စ့​က​ဖီ​န့ၣ်, ​မ​ဟါ​တ​နွံ ​ပှၤ​စ့​က​ဖီ​ဖိ (TikToks CEO Shou Zi Chew)​ လဲၤ​စံး​ဆၢ​တၢ်​လၢ ​အ​မဲ​ရ​ကၣ်​ခီ​က​ရဲး​ဘျီၣ်​ဒိၣ်​အ​ပူၤ​အ​ခါ​န့ၣ် ​ပာ်​ဖျါ​ထီၣ်​အ​တၢ်​ပာ်​ကဲ​အ​ထံ​အ​ကီၢ်, ​စံး​ဆၢ​တၢ်​ပှဲၤ​ဒီး ​တၢ်​နာ်​န့ၢ်​ပာ်​ကဲ​လီၤ​အ​သး​အ​ဃိ ​ယူၣ်​အဲး​စ်​အ​ဘျီၣ်​ဒိၣ်​ပှၤ​သံ​ကွၢ်​တၢ်​တ​ဖၣ်​ဒၣ်​လဲာ် ​ဘၣ်​ပာ်​ကဲ​က့ၤ​အီၤ​န့ၣ်​လီၤ. 


​ဃိၣ်​လိာ်​တၢ်​မုာ်​တၢ်​ခုၣ်​က​ရၢၢ် ​အ​လဲၢ်​အ​ထီ​န့ၣ် ​အါ​န့ၢ်​ဒံး ​ကီၢ်​စ့​က​ဖီ​အ​လဲၢ်​အ​ထီ ​နွံ(၇)​ဘျီ​ဘျဲၣ်​န့ၣ်​လီၤ (Salween Peace Park 5484 km2, Singapore 734.3 km2 ). ​ထံ​ကီၢ်​ဒ်​သိး ​ထဲၣ်​ဝၣ်, ​စိး​ခိၣ်​ရံ​ယၤ, ​စွံး​စ​လဲၢ်​တ​ဖၣ်​လဲၤ​ထီၣ်​လဲၤ​ထီ​ကဲ​ဒိၣ်​ကဲ​ပှၢ် ​ဘၣ်​ဆၣ်​အ​ထံ​အ​ကီၢ်​အိၣ်​အါ​ဒၣ်​က​စၢၢ်​က​လိ​တ​ဖၣ်​န့ၣ်​လီၤ. ​မ့​မ့ၢ်​စ့​က​ဖီ​န့ၣ် ​ထံ​အီ​ဒီး​ဟီၣ်​ခိၣ်​က​မုာ်​ဒၣ်​လဲာ်​န့ၣ် ​ဘၣ်​ပှ့ၤ​န့ၣ်​လၢ​ပှၤ​ဂၤ​အ​အိၣ်​ဒံး.


​ပ​မ့​မ့ၢ်​ပှၤ​က​လုာ်​လၢ​အ​ထီၣ်​ဖီ​ဒီး ​ပ​မၤ​စၢၤ​က့ၤ​ပှၤ​က​လုာ်​လၢ ​ပ​ခိၣ်​ဃၢၤ​က​သ့​စ့ၢ်​လီၤ. ​ကီၢ်​ပံၤ​ယီၤ​ပူၤ​က​လုာ်​ဒူၣ်​အါ​မး ​လၢ​အ​တ​ပူၤ​ဒီး ​ပ​က​ညီ​က​လုာ်​ဘၣ်. ​ပ​မ့ၢ်​အိၣ်​ဒီး ​တၢ်​ဂံၢ်​တၢ်​ဘါ​ပ​သူး​ပ​သ့ၣ်​န့ၣ် ​ပှၤ​ကိး​က​လုာ်​က​အဲၣ်​ဒိး​ဒီ​သိၣ်​မှံၤ​ဒီး​ပှၤ​လီၤ. ​ပ​မ့ၢ်​ကွၢ်​ပ​စု​က​ဝဲၤ​တၢ်​ပၢၢ်​ဆၢ ​ကဲ​တ့ၢ်​တၢ်​ဂံၢ်​ဘါ​လၢ ​က​လုာ်​ဒူၣ်​တ​ဖၣ်​အ​ဂီၢ် ​လၢ​ပ​ဟ့ၣ်​ခီ​ဟ့ၣ်​နီၤ​ဒုး​ယၤ​အ​ပီ​ညါ ​ဒီး​ပှၤ​က​လုာ်​တ​ဖၣ်​ဟဲ​ကွၢ်​ထီၣ်​တ့ၢ်​ပှၤ​လၢ ​ဒုး​ယၤ​တၢ်​မၤ​လိ​တ​ဖၣ်​န့ၣ်​လီၤ. 


​ပ​မ့ၢ်​ကဲ​က​လုာ် ​လၢ​ဒိ​ဂ့ၤ​တဲာ်​ဘၣ်, ​ဖျိး​စိ​လၢ​ကူၣ်​သ့​ပီ​ညါ, ​စဲ​အ့ၣ်​က​ဟၣ်​ပီ​ညါ, ​ထဲး​က​နီ​လီၢ်​ကၠံၢ်​ပီ​ညါ​န့ၣ် ​က​လုာ်​ထံ​ကီၢ်​ဃာ်​ဃၢၤ​တ​ဖၣ် ​က​ကွၢ်​ထီၣ်​ပှၤ​လၢ ​တၢ်​မၤ​သ​ကိး​ဒီး​အီၤ​လၢ ​အ​ဝဲ​သ့ၣ်​အ​တၢ်​လဲၤ​ထီၣ်​လဲၤ​ထီ​အ​ဂီၢ်​စ့ၢ်​ကီး​န့ၣ်​လီၤ. ​ကွၢ်​အ​ဒိ​လၢ​ကီၢ်​ထဲၣ်​ဝၣ်, ​သူၣ်​ထီၣ်​အ​သး​အ​ခီၣ်​ထံး​လၢ ​တၢ်​ကိၢ်​တၢ်​ဂီၤ ​က​ပံာ်​ဖၣ်​ဆါ​ကျါ, ​ဘၣ်​ဆၣ်​ခဲ​အံၤ ​ဟီၣ်​ခိၣ်​ဒီ​တ​ဘ့ၣ် ​ဘၣ်​ဒိး​သ​န့ၤ​အ​သး​လၢ​အီၤ ​လၢ ​ခိၣ်​ဖၠူၣ်​ထၢၣ်​အ​ခိၣ်​နူာ်​သ​လီ (microchip)​အ​ဂီၢ်​န့ၣ်​လီၤ.


​လၢ​နီၢ်​ခိ​စဲး​ဖီ​က​ဟၣ် ​တၢ်​လဲၤ​ထီၣ်​လဲၤ​ထီ​တ​အိၣ်​ဘၣ်​န့ၣ် ​ပ​ဒီ​တ​ဒၢ​လီၤ​ပ​သး​တ​န့ၢ်​ဘၣ်. ​ပ​ကီၢ်​က​အိၣ်​လၢ​အိၣ်​ပှဲၤ​ဒီး​ဃု​ဆၣ်​မ့ၤ​ဆွံ ​ဝံၤ​ဒီး​ပ​က​သူၣ်​မံ​သး​မုာ်​န့ၣ်​တ​လၢ​ပှဲၤ​ဒံး​ဘၣ်. ​တၢ်​လၢ​ထံ​ကီၢ်​အ​တၢ်​လိၣ်​ဘၣ် ​လၢ​တၢ်​ဒီ​သ​ဒၢ​အ​ဂီၢ်​န့ၣ် ​အါ​ဒီး​စှၤ​ပ​တ့​လိ​ဘှီ​လိ​က​ဘၣ်​သ့. ​ထဲ​ပ​က​ပှ့ၤ​လၢ​ပှၤ​တ့​ပာ်​စၢၤ​ဒီး ​ပ​တ​နၢ်​ပၢၢ်​ဘီှ​အီၤ ​လၢ​ပ​က​စၢ်​ဘၣ်​န့ၣ် ​ပ​ပှ့ၤ​ဝံၤ​ပ​စ့​က​လၢာ်​ကွံာ်, ​ဒီး ​မ့ၢ်​ဟး​ဂီၤ​ပ​ဘှီ​တ​ဘၣ်​ဘၣ်. ​စု​က​ဝဲၤ​လၢ​ပှၤ​ဂၤ​တ့​ပာ်​န့ၣ် ​ပ​တၢ်​ခူ​သူၣ်​တ​အိၣ်​စ့ၢ်​ဘၣ်. ​ပ​တ့​ပ​က​စၢ်​မ့ၢ်​တ​ဘၣ် ​ပှၤ​မ့ၢ်​သး​က​ညီ​ပှၤ, ​ပှၤ​မ့ၢ်​သး​အိၣ်​ဆါ​န့ၢ်​ပှၤ​မး ​ပ​ပှ့ၤ​န့ၢ်​အီၤ​သ့​လီၤ. ​ကွၢ်​အ​ဒိ​လၢ​ကျိ​ခး​က​ဘီ​ယူၤ​န့ၣ်, ​ပ​စ့​မ့ၢ်​အိၣ်​ဒၣ်​လဲာ် ​ပ​ဟး​ပှ့ၤ​တ​န့ၢ်​ဘၣ်. ​တၢ်​လၢ ​ဒုး​ယၤ​ပီး​လီ​စု​က​ဝဲၤ​တ​ဖၣ်​န့ၣ် ​ထံ​ကီၢ်​တ​ဖၣ်​တ​ဆါ​ကြီ​လိာ်​အ​သး​ဘၣ်. ​ဘီ​မုၢ်​ထံ​ကီၢ်​တ​ဖၣ်​သူၣ်​လီၤ​ဆီ​လီၤ​အ​သး ​လၢ​သိၣ်​မှံၤ​တၢ်​ရ့​လိာ်​ဘျး​စဲ​ဒီး ​ပှ့ၤ​န့ၢ်​ဆါ​န့ၢ်​လိာ်​သး​က​ဒဲ​က​ဒဲ ​ထဲ​ဒၣ်​လၢ ​သိၣ်​မှံၤ​တံၢ်​နီၢ်​တ​ဖၣ်​အ​ကျါ​န့ၣ်​လီၤ. 


​တၢ်​အိၣ်​မူ​လၢ​က​ဒု​လီၤ​တံၢ်​န့ၣ် ​မ့ၢ်​တၢ်​အိၣ်​မူ​လၢ​အိၣ်​ဒီး​အ​သူး​အ​သ့ၣ်​လီၤ. ​ဘၣ်​ဆၣ် ​ပ​က​အိၣ်​မူ​ဒ်​လၢ​ခံ​လၢ​ပျၢၤ ​မၤ​က​စု​အီၣ်​က​စၢ်​ဝံၤ ​ပ​တ​ညီ​နုၢ်​လၢ​တ့​တၢ်​ဘှီ​တၢ်​အ​သီ​ဘၣ်, ​တၢ်​နၢ်​ပၢၢ်​လၢ​စဲး​ဖီ​က​ဟၣ်​ပီ​ညါ​တ​အိၣ်​ဘၣ်​ဒီး ​ပ​ဒီ​တ​ဒၢ​လီၤ​ပ​သး ​တ​န့ၢ်​ဘၣ်​န့ၣ် ​ပှၤ​က​ဟဲ​မၤ​နၢၤ​အီၣ်​ဃီၣ်​ပှၤ ​ဖဲ​ပှၤ​အဲၣ်​ဒိး​ဟဲ​မၤ​အ​ခါ​န့ၣ် ​ပ​တၢ်​သ​ဘျ့​လီၤ​မၢ်​ကွံာ်​ညီ​က​ဒၣ်​လီၤ. ​တၢ်​ဒီ​သ​ဒၢ​လီၤ​ပ​သး​န့ၣ် ​အ​ပှ့ၤ​က​လံၤ​စှၤ​န့ၣ်​ဒံး ​တၢ်​ဒုး​ဖျိး​ပၢၢ်​ဆၢ​ကွံာ်​တၢ်​န့ၣ်​လီၤ. ​ပှၤ​ဟဲ​ဟံး​န့ၢ်​ပ​လီၢ်​ပ​ကျဲ​အါ​နံၣ်​အါ​လါ​ဝံၤ ​ပ​က​ဘၣ်​ဒုး​ဖျိး​က့ၤ​အီၤ ​ကီ​ကီ​ခဲ​ခဲ, ​လၢာ်​ဘူၣ်​လၢာ်​စ့ၤ, ​လၢာ်​သိၣ်​ဒူ​လုၢ်​ပှ့ၤ​ဒိၣ်​တ​ဖၣ် ​အ​သး​သ​မူ​န့ၣ်​လီၤ. ​ကွၢ်​အ​ဒိ​လၢ "​မိၣ်​လိာ်​ဒ့​ဖဲ​ထၣ်” ​တၢ်​ဒုး​တ​ခါ​အံၤ​န့ၣ် ​ဒုၣ်​ဒါ​ဟဲ​စဲၤ​လီၤ​အ​ဂံၢ်​န့ၢ်​ဒီး ​ပ​ဘၣ်​ထီၣ်​ဒုး​ဖျိး​ကွံာ်​အီၤ​ကီ​ကီ​ခဲ​ခဲ, ​တုၤ​သုး​ခိၣ်​ဖိ​အ​သး​သ​မူ ​အ​ဖျၢၣ်​လၢ​အ​ဆံ​ဘၣ်​လီၤ​ဆှူ. ​ပ​ဒီ​တ​ဒၢ​တ့ၢ်​အီၤ​မ့ၢ်​န့ၢ်​လၢ ​အ​ခီၣ်​ထံး​လံၤ​လံၤ​န့ၣ် ​တ​ကြၢး ​သး​သ​မူ​လီၤ​မၢ်​နီ​တ​ဖျၢၣ်​ဘၣ်. 


​တၢ်​လဲၤ​ထီၣ်​လဲၤ​ထီ​က​အိၣ်​ထီၣ်​အ​ဂီၢ်​န့ၣ် ​တၢ်​ဆီ​တ​လဲ​လၢ ​တၢ်​ဆိ​က​မိၣ်​ဆိ​က​မး​အ​ပ​တီၢ်, ​တၢ်​သ​ကဲာ်​ပ​ဝး ​အ​တၢ်​ပာ်​သူၣ်​ပာ်​သး​အ​ပ​တီၢ်, ​တၢ်​ပျိာ်​လဲ​အိး​သ​လၢ်​ထီၣ်​အ​သး​လၢ​ပှၤ​က​လုာ်​ကျါ ​က​ဘၣ်​မၤ​အ​သး​န့ၣ်​လီၤ. ​ပ​ပှၤ​က​လုာ်​မ့ၢ်​အိၣ်​မူ ​ဒ်​အ​အိၣ်​မူ​ညီ​နုၢ်​ဒီး ​ပ​တ​အိး​က​ပီၤ​ထီၣ် ​ပ​တၢ်​ဆိ​က​မိၣ်​ဘၣ်​န့ၣ် ​တၢ်​က​ဂုၤ​ထီၣ်​ပ​သီ​ထီၣ်​အ​ဂီၢ် ​အ​ကျဲ​တ​ဖျါ​ဘၣ်. ​ပှၤ​စှၤ​ဒံ​စှၤ​ဂၤ ​ကီၤ​ပ​အုး​တူၢ်​ဆါ​တိ​ဖျိ​တၢ်​က​စီ​ဒီ. ​ဘၣ်​ဆၣ်​တၢ်​မူ​ထီၣ်​ဂဲၤ​ထီၣ်​ဂုၤ​သီ​ပ​သီ​ထီၣ်​က​အိၣ်​အ​ဂီၢ်​န့ၣ် ​ပှၤ​ဂီၢ်​မုၢ်​က​ဘၣ် ​မူ​ထီၣ်​ဂဲၤ​ထီၣ်​မး (​critical mass)​က​န့ၢ်​လီၤ. ​ပှၤ​က​ညီ ​အ​လုၢ်​အ​လၢ်​ညီ​လၢ ​ဆိ​က​မိၣ်​ညီ, ​မၤ​ညီ, ​မၤ​ကြီ, ​မၤ​ဝံၤ​တၢ်​အ​မံၤ​န့ၣ် ​တ​မ့ၢ်​ပှၤ​က​လုာ်​လၢ ​အ​လဲၤ​ထီၣ်​လဲၤ​ထီ​တ​ဖၣ်​အ​တၢ်​ဆိ​က​မိၣ်​ဘၣ်. ​လၢ​ပှၤ​က​လုာ်​တ​ဖၣ်​အ​ကျါ ​က​ညီ​က​လုာ်​အိၣ်​တ့ၢ်​လၢ ​တၢ်​ခံ​ဒး​လံ. ​ပ​တ​ဆီ​တ​လဲ​ပ​တၢ်​ဆိ​က​မိၣ်​ပ​က​ကဲာ်​ပ​ဝး​ဘၣ်​ဒီး ​တၢ်​လဲၤ​ထီၣ်​လဲၤ​ထီ​အိၣ်​ထီၣ်​မ့ၢ်​သ့​န့ၣ် ​က​မ့ၢ်​တၢ်​လီၤ​က​မၢ​က​မၣ်​လၢ​ဟီၣ်​ခိၣ်​ချၢ​န့ၣ်​လီၤ. 


​ပ​တၢ်​ဆၢ​က​တီၢ်​တ​အိၣ်​လၢၤ ​အ​သီ၇၅​နံၣ်​ဘၣ်. 

​ပှၤ​က​လုာ်​လၢ​က​အိၣ်​မူ​ဒ် ​ပ​အိၣ်​မူ​အ​သိး​ဒီး ​က​လဲၤ​ထီၣ်​လဲၤ​ထီ​လၢ ​ဟီၣ်​ခိၣ်​ချၢ​န့ၣ် ​တ​အိၣ်​နီ​တ​က​လုာ်​ဒံး​ဘၣ်. ​က​ညီ​သူၣ်​ဘီၣ်​သး​စၢ်​လၢ ​အ​အိၣ်​မူ​ဘၣ်​လၢ​တၢ်​ဒုး​တၢ်​ယၤ​အ​ချၢ​န့ၣ် ​အါ​န့ၢ်​ဒံး ​ပှၤ​နီၣ်​ဂံၢ်​လၢ​ဘၣ်​ကွၢ်​ဆၢၣ်​မဲာ်​တၢ်​ဒုး​တၢ်​ယၤ​တ​ဖၣ်​န့ၣ်​လီၤ. ​ပ​ပှၤ​က​လုာ်​သူၣ်​ဘီၣ်​သး​စၢ် ​အိၣ်​ဂီၢ်​မုၢ်, ​ဘၣ်​ဆၣ်​အ​တၢ်​သူၣ်​ပိၢ်​သး​ဝး ​တ​မ့ၢ်​ဒ်​သူ​ဘီၣ်​သး​စၢ်​လၢ​ထံ​ကီၢ်​အ​လဲၤ​ထီၣ်​လဲၤ​ထီ​တ​ဖၣ် ​သူၣ်​ပိၢ်​သး​ဝး​တၢ်​အ​သိး​ဘၣ်. ​တ​ရူး​ဖိ, ​ခိ​ရံ​ယါ​ဖိ ​သူၣ်​ပိၢ်​သး​ဝး​လၢ ​အံၣ်​ကၠံ​နံ​ယၢၣ်, ​က​ဟၣ်​တ​ရံး, ​ခိၣ်​ဖၠူ​ထၢၣ်​က​ဟၣ်​ခိၣ်​နူာ်​တ​ဖၣ်. ​ဖဲ၂၀၁၆ ​လါ​မး​ၡၣ် ၆​သီ​အ​ခါ​ခိၣ်​ဖၠူၣ်​ထၢၣ်​အ​ခိၣ်​နုာ် (Google DeepMind’s artificial-intelligence program AlphaGo)​ ပြၢ​လိာ်​သး​ဒီး ​ပှၤ​လိာ်​ကွဲ​ကိ​ခၠဲး​စဲၣ်​နီၤ​အ​ခါ​န့ၣ် ​ပှၤ​တ​ရူး​သး​စၢ်​ဖိ​အ​က​ကွဲၢ်(၆၀)​ဘျဲၣ် ​ခိး​ကွၢ်​ဝဲ​တၢ်​ပြၢ​တ​ဘျီ​အံၤ ​လၢ​တၢ်​သူၣ်​ပိာ်​သး​ဝး​န့ၣ်​လီၤ. ​ပှၤ​တဲ​သ​ကိး, ​ပြၢ​က​သိး, ​မၤ​လိ​သ​ကိး, ​ဒီး​တ့​သ​ကိး​ခိၣ်​ဖၠူၣ်​ထၢၣ် ​ပ​ဟၣ်​ပီး​လီၤ​တ​ဖၣ်​န့ၣ် ​ကဲ​ထီၣ်​က့ၤ​တၢ်​ကဲ​ဘျုး​လၢ ​ထံ​ကီၢ်​အ​ဂီၢ်​န့ၣ်​လီၤ. 


​တၢ်​လၢ​ပ​နၢ်​တ​ပၢၢ်, ​တၢ်​လၢ​ပ​သး​တ​စၢၢ်​ဆၢ​ဘၣ်​န့ၣ် ​ပ​ဆိ​က​မိၣ်​လၢ ​အ​ရ့​တ​ဒိၣ်​လၢ ​ပ​ဂီၢ်​ဘၣ်​န့ၣ် ​တ​ဘၣ်​ဘၣ်. ​ပ​မ့ၢ်​တ​ဆိ​က​မိၣ် ​မၤ​လိ​တ့​လိ​ဘၣ်​ဒီး ​ပ​က​ဟး​က​သါ​ဒၣ်​လၢ ​ပှၤ​နါ​စ့ၤ​န့ၣ် ​တ​သ့​ထီ​ဘိ​စ့ၢ်​ဘၣ်. ​အ​ပူၤ​ကွံာ်​ခံ​နံၣ်​သၢ​နံၣ် ​ပ​တၢ်​ပၢၢ်​ဆၢ​လီၢ်​က​ဝီၤ​အ​ပူၤ ​ပှၤ​က​လုာ်​လၢ​ခူ​ဝ့ၢ်​ပူၤ​တ​ဖၣ် ​ဟဲ​မၤ​လိ​ဒုး​စၢၤ​ပှၤ​တၢ်​လၢ ​စိး​က​ပ့ၤ​ဖိ​တ​ဖၣ်. ​ဒြိ​စိး​က​ပ့ၤ​ဖိ​တ​ဖၣ်​အ​ဃိ ​တၢ်​ဒုး​တၢ်​ယၤ​အ​မဲာ်​သၣ် ​ဆီ​တ​လဲ​အ​သး​ဖး​အါ. ​ပှၤ​က​လုာ်​ဂၤ​တ​ဖၠဲး​လီၤ​ဆီ​န့ၣ်​ပှၤ​ဘၣ်. ​ဘၣ်​ဆၣ်​ပှၤ​က​လုာ်​ဂၤ​အ​တၢ်​ဂုာ်​ကျဲး​စၢး​ဒီး ​တၢ်​သး​စၢၢ်​ဆၢ​အ​သ​ဟီၣ် ​တ​လီၤ​ဂာ်​ပှၤ​ဘၣ်. 

​ပှၤ​က​လုာ်​သူၣ်​ဘီၣ်​သး​စၢ်​ဂီၢ်​မုၢ် ​သူ​လၢာ်​ဂီၤ​တၢ်​ဆၢ​က​တီၢ်​ခွဲး​ဂ့ၤ​ယာ်​ဘၣ် ​လၢ​ပျီ​ပူၤ​တၢ်​ကိၢ်​ကျါ​သ့​သ့​နံၤ​လၢ​တၢ်​လိာ်​ကွဲ​ဖျၢၣ်​ထူ ​ဝံၤ​အ့ၣ်​လိာ်​ကျာ်​လိာ်​သး​ဒ်​ကျီၢ်​ပ​နၢ်​ဖါ​ဘျၢၣ်​လိာ်​အ​သး​ပျီ​ပူၤ​န့ၣ် ​ဆၢ​က​တီၢ်​တၢ်​ဆိၣ်​ဂ့ၤ​တ​ဖၣ် ​ပ​သူ​တ​ရီ​တ​ပါ​အီၤ​လီၤ. ​ဖဲ​ပ ​ဂဲၤ​က​လံာ်​အံၣ်​အု​သး​ဝံၣ် ​လီၤ​ထွံ​လီၤ​ယွၤ​အ​ခါ ​ထံ​ကီၢ်​လၢ​အ​ဖျိး​စိ​အ​သူၣ်​ဘီၣ်​သး​စၢ်​တ​ဖၣ် ​မုၢ်​ဆါ​မုၢ်​နၤ ​ကီၤ​မံ​ကီၤ​ဂဲၤ​မၤ​လိ​မၤ​ဒိး, ​ဒီး​သူၣ်​ပိာ်​သး​ဝး​လၢ ​တၢ်​တ့​လိ​ဘှီ​လိ ​ပြၢ​လိာ်​သး​ကိၠ​လၢ​ကီၣ်, ​လူၤ​ဃု​သ့ၣ်​ညါ​တၢ်​ထံၣ်​အ​သီ, ​တၢ်​ဆိ​က​မိၣ်​ကူၣ်​သ့​အ​သီ, ​အိၣ်​မူ​မံ​ခ့​မံ​သ​ပ့ၤ​တ​ချုး​ဘၣ်. 

​ပ​ထံ​ပ​ကီၢ်​တ​အိၣ်​ဒံး​ဘၣ်, ​ပ​အိၣ်​လၢ​ပှၤ​ထံ​ဆၢ​ကီၢ်​ဆၢ​ဒီး ​ပ​က​ဟး​မၤ​လၤ​ပ​သး​လၢ ​နီၢ်​ဂ့ၢ်​ဒွဲ​ခွါ​ဂ့ၤ​ဒွဲ​တၢ်​ပြၢ​တ​ဖၣ်​န့ၣ် ​ပ​မၤ​အါ​ထီၣ် ​ဘီၣ်​သိၣ်​အ​ဆၣ်​လၢ​တၢ်​မၤ​ကၤ​ဆါ​အီၣ်​ပှၤ​က​ညီ​တ​ဖၣ် ​အ​ဂီၢ်​လီၤ. ​သး​ပှၢ်​တ​ဂၤ​စံး​ဝဲ "​ပ​အိၣ်​လၢ​ပှၤ​ပ့ၣ်​ပီၤ​ပူၤ​ဒီး​ပ​က​ဟး​ပြၢ​လၢ​ပ​ဃံ​န့ၣ်” ​ပှၤ​က​နံၤ​ဘၣ်​ပှၤ​တ​ခီ. ​ကီၢ်​ကၠီၣ်​တဲၣ်, ​ကီၢ်​လၤ​အိၣ်, ​ကီၢ်​ခၣ်​ဘီ​ဒ့​ယါ​အ​ပူၤ ​ဘီၣ်​သိၣ်​လၢ​အ​ဃု​မၤ​ကၤ​အီၣ်​တၢ်​ဟိ​မိၢ်​ဖိ​တ​ဖၣ် ​ဒုး​အိၣ်​ထီၣ်​တၢ်​ပြၢ​နီၢ်​ဃံ​လၤ ​လၢ​အ​အီ​ပီ​က​မၤ​ညီ​အီၣ်​အ​ဆၣ်​လၢ​တ​လၢာ်​က​ပၢၤ​က​ဝါ​ဘၣ်​န့ၣ်​လီၤ. ​ပှၤ​က​လုာ်​လၢ​အ​ထံ​အ​ကီၢ်​တ​အိၣ်​ဘၣ်,​ အ​မဲာ်​ဖ့​နါ​ဖ့ ​ဒီး​ပြၢ​လိာ်​အ​သး​လၢ ​နီၢ်​ဂ့ၤ​ဒွဲ​လၤ​န့ၣ် ​မ​တၤ​က​ထံၣ်​ဒိၣ်​အီၤ​တ​ဂၤ​လဲၣ်. 


​ပှၤ​ခိ​ရံ​ယၤ​ဖိ ​လၢ​ညါ​တၢ်​အီၣ်​ကုး​အီ​ပှဲၤ ​တၢ်​လဲၤ​ထီၣ်​လဲၤ​ထီ​တ​အိၣ်​ဒံး​ဘၣ်​အ​ခါ ​ဖိ​သၣ်​တ​ဖၣ် ​အ​မဲာ်​ဖ့​ဒ်​ပ​ပှၤ​က​လုာ်​တၢ်​အိၣ်​သး​ခဲ​အံၤ​လီၤ. ​ခိ​ရံ​ယၤ​အ​ထံ​ကီၢ်​န့ၣ် ​ဟီၣ်​ခိၣ်​ဟီၣ်​လာ်​တၢ်​ထုး​တၢ်​တီၤ​တ​အိၣ်​အါ​ဒ်​သိး​ကီၢ်​သူ​လ့ၤ​ဘၣ်. ​ဘၣ်​ဆၣ်​လၢ​ထံ​ကီၢ်​တၢ်​လဲၤ​ထီၣ်​လဲၤ​ထီၣ်​အ​ဂီၢ် ​အ​ဝဲ​သ့ၣ်​ကုာ်​သ​ပှၢ်, ​ဂုာ်​သ​ပှၢ် ​လၢ​တၢ်​ဖှီၣ်​တၢ်​ယာ်, ​လၢ​တၢ်​ဒုး​တၢ်​ယၤ ​တုၤ​အ​အီၣ်​အိၣ်​ထီၣ်​မး ​သး​စၢ်​လၢ​ခံ​တ​စိၤ ​ကူ​ဂ့ၤ​ကၤ​ဝါ​မဲာ်​ဘျ့​နါ​ဆှီ​ဒီး ​ဟီၣ်​ခိၣ်​ဒီ​ဘ့ၣ်​ထံၣ်​ဒိၣ်​အီၤ, ​ကွၢ်​လိ​အီၤ, ​ကဲ​လိ​ဒိး​အီၤ ​လၢ​တၢ်​ခဲၣ်​ဃံ​သး, ​လၢ​တၢ်​ကူ​တၢ်​ကၤ, ​လၢ​အ​တၢ်​အီၣ်​အ​တၢ်​အီ. ​အ​တၢ်​ဂီၤ​မူ, ​အ​တၢ်​ဒ့​အ​တၢ်​သး​ဝံၣ်​တ​ဖၣ်​ထုး​န့ၣ်​ဟီၣ်​ခိၣ်​ဖိ​အ​သး ​လၢ​တၢ်​ကိး​အီၤ​လၢ ​ခိ​ရံ​ယၤ​ဝ့း​ဖ် (Korea Wave cultural phenomenon)​လီၤ. ​ခဲ​အံၤ ​ပ ​က​ရဲ​ဝ့း​ဖ် (Karen Wave)​န့ၣ်​အိၣ်​ဒၣ်"​ရ​ဖၠူၢ်​ကၠံၢ်" ​လၢ ​အ​ဆိ​က​မိၣ် ​က​မၤ​န့ၢ်​က​လီ​တၢ်​မၤ​စၢၤ​ဖဲ​လဲၣ်​တ​က​ပၤ​လဲၣ်​န့ၣ်, "​ကိၤ​လၤ​ဝါ ​က​ဟဲ​မၤ​စၢၤ​ပှၤ” ​အ​တၢ်​ဆိ​က​မိၣ်​န့ၣ် ​တ​မ့ၢ်​တၢ်​လၢ​ပ​က​ဘၣ်​မုၢ်​လၢ်​သး​ခု ​ဒုး​ညီ​နုာ်​ညီ​ဃာ်​အီၤ​ဘၣ်. ​မုၢ်​နံၤ​တ​နီၤ​လၢ ​ပ​ဟး​မၤ​လၤ​က​ပီၤ​အီၤ​န့ၣ်​တြီ​ဃာ်​ပ​တၢ်​ဆိ​က​မိၣ် ​လၢ​က​လုာ်​အ​တၢ်​လဲၤ​ထီၣ်​လဲၤ​ထီ​ဒီး ​က​လုာ်​အ​သူး​အ​သ့ၣ်​န့ၣ်​လီၤ. ​ပှၤ​က​လုာ်​က​ဘၣ်​သ​ဘျ့​ထီၣ်​လၢ ​တၢ်​ထံၣ်​တၢ်​ဆိ​က​မိၣ်, ​အ​မဲာ်​က​ဘၣ်​က​ပီၤ​ထီၣ်​လၢ ​တၢ်​ကူၢ်​တၢ်​ဖး, ​အ​သး​က​ဘၣ်​ကျၢၤ​ထီၣ်​လၢ​တၢ်​တူၢ်​ခီၣ်​ပာ်​သး ​ဒ်​သိး​က​ဃ့ၢ်​သ​ဘျိၣ်​တၢ်​ဆူ​ညါ ​သ​တြီၤ​တၢ်​ဒီး​ပှၤ​က​လုာ်​တ​ဖၣ်​အ​ဂီၢ်​န့ၣ်​လီၤ. 


​တၢ်​လၢ​ပ​လိၣ်​ဘၣ်​န့ၣ် ​ပ​ဘၣ်​တ့​လိ​မၤ​န့ၢ်​လိ ​လၢ​ပ​က​စၢ်​ဒၣ်​ပ​ဝဲ​လီၤ. ​ပ​တ့​ဒ်​ပ​တၢ်​လိၣ်​ဘၣ်, ​ပ​တ့​ဒ်​ပ​ထံ​ပ​ကီၢ်​ပ​လီၢ်​က​ဝီၤ ​မူ​ခိၣ်​က​လံၤ​သီၣ်​ဂီၤ​တၢ်​က​သုၣ်​က​သံး​အ​တၢ်​အိၣ်​သး. ​တ့​လိ​စု​လီၢ်​ခိၣ်​လီၢ်​တံၢ်​တံၢ်​ဒဲ​ဒဲ ​ဒီး​တ့​ဆါ​လၢ​ပ​က​န့ၢ်​စ့​ပာ်​ကီၤ​ဒီး ​တၢ်​အီၣ်​ကုး​အီ​ပှဲၤ​အ​ဂီၢ်. ​ပ​တ့​တၢ်​န့ၣ် ​ပ​တ့​လၢ ​ပ​စု​ပ​ခီၣ်​လိၤ​လိၤ​တ​န့ၢ်​အါ​ဘၣ်. ​ပ​က​ဘၣ်​တ့​လိ​လၢ ​စု​က​ဝဲၤ​ပီး​လီ​ပ​တီၢ်​ထီ, ​တ့​လၢ​စဲး​ဖီ​က​ဟၣ် (​tools and machineries)​အါ​အါ​ဂီၢ်​ဂီၢ် ​ဒ်​သိး​ပ​ထုး​ထီၣ်​တၢ်​အ​ပှ့ၤ​ဘၣ်​ဘၣ်​က​သ့ (mass-production and industrialization)​အ​ဂီၢ်​န့ၣ်​ပ​က​ဒီ​သ​ဒၢ​လီၤ​ပ​သး​အ​ဂီၢ် ​ပ​မ့ၢ်​တ့​ကျိ​လၢ​ပ​စု ​တ​နံၤ​န့ၣ် ​မ့ၢ်​န့ၢ်​ဒၣ်​တ​ခိၣ်​န့ၣ်, ​ဒီ​တ​နံၣ်​န့ၣ်​မး ​က​န့ၢ်​ဒၣ်​အ​ခိၣ်​သၢ​က​ယၤ​န့ၣ် ​တ​ယၢ​လၢ​တၢ်​ဒီ​သ​ဒၢ​က့ၤ ​က​ရူၢ်​က​ဝီၤ​တ​က့​ဖိ​အ​ဂီၢ်​ဒၣ်​လဲာ်​ဘၣ်. 


​ပ​ဘၣ်​မုၢ်​လၢ်​ကွၢ်​စိ​လၢ​ပ​ထံ​ပ​ကီၢ် ​က​ကဲ​ထီၣ်​တၢ်​တ့​ထုး​ထီၣ် ​ပ​တီၢ်​ထီ​တ​ဖၣ်​အ​လီၢ်​က​ဝီၤ (advanced manufacturing)​တ​ခီ​န့ၣ်​လီၤ. ​ပ​ခိး​ကွၢ်​လၢ်​ပှၤ​က​မၤ​ဟဲ​ဘူၣ်​က​လီ​ပှၤ​န့ၣ် ​တ​မ့ၢ်​တၢ်​ဆိ​က​မိၣ်​လၢ ​အ​စိာ်​က​ဖီ​ထီၣ်​ပှၤ​ဘၣ်, ​ဒုး​ကဲ​ထီၣ်​ပှၤ​လၢ​ပှၤ​ကၢၣ် ​လၢ​တ​ဆိ​က​မိၣ်​ကူၣ်​တၢ်​လၢ ​အ​က​စၢ်​ဒၣ်​ဝဲ ​ဘၣ်​န့ၣ်​လီၤ. ​ထံ​ကီၢ်​လၢ ​အ​ဆံး​န့ၣ်​ပှၤ​ဒၣ်​လဲာ်​အိၣ်​ဒီး​မူ​ဖျၢၣ်​ဒိ(satellite) ​လၢ​အ​တ့​ဝဲ​လၢ ​အ​က​စၢ်​ဒီး ​သူ​ဝဲ​လၢ ​ပ့ၢ်​ဆှါ​တၢ်​ဒီ​တ​ဒၢ, ​မုၢ်​ကျိၤ​ဝဲ​ကွာ်​ဒီး ​တၢ်​ဆဲး​ကျိး​တ​ဖၣ်​အ​ဂီၢ်​လံ​န့ၣ်​လီၤ.


​ပ​က​စံး​လၢ ​က​ညီ​ဖိ​တ​ဖၣ်​န့ၣ် ​ကၢၣ်, ​မၤ​ဝံၤ​တၢ်​အ​မံၤ​န့ၣ် ​တ​ဘၣ်​ဘၣ်.​ယ​ဒိၣ်​ထီၣ်​ယ​ထံၣ်​ဘၣ်​ယ​ဖု ​ပၢၢ်​ထီၣ်​လၢ​ဂီၤ​ဂီၤ, ​က​တဲာ်​တ​တီၤ​တၢ်​အီၣ်​လၢ​ပှၤ​မၤ​တၢ်​ဖိ​အ​ဂီၢ်, ​အီၣ်​အီ​ဝံၤ​လဲၤ​တၢ်​ဂီၤ, ​မၤ​တၢ်​ဒီ​တ​နံၤ, ​ဒီး​ဟဲ​က့ၤ​တုၤ​ဟံၣ် ​မုၢ်​နၤ​ခီ​အ​ခါ​လၢ​မ့ၣ်​အူ​ဒၢ​အ​တၢ်​က​ပီၤ​ကျါ ​ထ့​ကု​ဘျၣ်​ဆှါ, ​မၤ​တၢ်​တုၤ​အ​မံ​တ​စု​ဒီး ​အ​သး​ခု​လၢ​အ​စု​လီၢ်​ခီၣ်​ခိၣ်,​ အ​သး​ဖှံ​လၢ ​အ​စု​လီၢ်​ခီၣ်​အ​ပူၤ​န့ၣ်​လီၤ. ​မၤ​တၢ်​တုၤ​အ​သး​ပှၢ်​ဒီး​တုၤ​အ​သံ​တ​စု​လီၤ. က​ညီ​ဖိ​လၢ ​လဲၤ​တုၤ​လၢ​ထံ​ရူၤ​ကီၢ်​ဂၤ ​ဖံး​တၢ်​မၤ​တၢ်​ဆူၣ်​မး​ဒီး ​န​က​ထံၣ်​ဘၣ်​ထဲ ​ပှၤ​ခု​ဖံး​ခု​မၤ​လီၤ. ​တၢ်​ခုး​ဖံး​ခု​မၤ​န့ၣ် ​မ့ၢ်​တၢ်​အ​ခီၣ်​တ​ဃာ်​လၢ ​ဟံၣ်​ဖိ​ဃီ​ဖိ​အ​တၢ်​အီၣ်​ကုး​အီ​ပှဲၤ ​ဒီး​ပှၤ​က​လုာ်​လၢ​အ​ခု​ဖံး​ခု​မၤ​န့ၣ် ​မ့ၢ်​ထံ​ကီၢ်​အ​ဂံၢ်​အ​ဘါ​န့ၣ်​လီၤ.


​ပ​ပှၤ​က​လုာ်​တ​မ့ၢ်​က​လုာ်​ဒူၣ်​ဆံး​ဘၣ်. ​ပ​ကီၢ်​ပ​လီၢ်​ပ​ကျဲ​တ​အံၣ်​တ​ဆံး​ဘၣ်. ​ထံ​ကီၢ်​အ​ဆံး​ဖိ​လၢ​အ့​ၡၢၣ်​မုၢ်​ထီၣ်​ဒ်​သိး ​ကီၢ်​စ့​က​ဖီ, ​ကီၢ်​စိး​ကိ​ရံ​ယၤ, ​ကီၢ်​ထဲၣ်​ဝၣ်​တ​ဖၣ် ​ဒုၣ်​ဒါ​အိၣ်​ဝး​တ​ရံး, ​ဟီၣ်​ခိၣ်​ဟီၣ်​လာ်​န့​ဆၢၣ်​တၢ်​ထူး​တၢ်​တီၤ​ကၤ, ​ဘၣ်​ဆၣ်​က​လုာ်​အိၣ်​ဒီး​အ​သူး​အ​သ့ၣ်, ​ထံ​ကီၢ်​လဲၤ​ထီၣ်​ဖျိ​စိ​သ့​ဒ်​လဲၣ်.

​အ့​ၡၢၣ်​မုၢ်​ထီၣ်​အ​ဘီၣ်​သိၣ်


​ထံ​ကီၢ်​အ​ဆံး​ဖိ​လၢ ​လဲၤ​ထီၣ်​လဲၤ​ထီၣ်​ဖျိး​စိ, ​အ​မဲာ်​က​ပီၤ​လၢ​ဟီၣ်​ခိၣ်​အ​မဲာ်​ညါ, ​ကဲ​ဒိၣ်​ကဲ​ပှၢ်​လၢ​ပ​စိၤ​ခဲ​အံၤ​ဒီး​လီၤ​ကွၢ်​လိ​လၢ​အ​အိၣ်​ဘူး​ဒီး​ပှၤ​န့ၣ်​အိၣ်​ဝဲ ​လၢ​အ​မ့ၢ် ​စိး​ခိ​ရံ​ယါ, ​ကီၢ်​ထဲၣ်​ဝၣ်, ​ဒီး​ကီၢ်​စ့​က​ဖီ (​လၢ​အ​မ့ၢ်​အ့​​ၡၢၣ်​အ​ဘီၣ်​သိၣ် Asia Tigers)​တ​ဖၣ်​န့ၣ်​လီၤ. ​ထံ​ကီၢ်​တ​ဖၣ် ​အ​တၢ်​လဲၤ​ထီၣ်​လဲၤ​ထီ​န့ၣ်​ပှၤ​မၤ​လိ​အ​ဂ့ၢ်​အ​ကျိၤ​သ​ကုၤ​ဆး​ဒး​လၢ ​ပ​တီၢ်​ထီ​ဖၠၣ်​စိ​မိၤ​တ​ဖၣ် ​ဒီး​တၢ်​ထံၣ်​ဝဲ​အ​ဂ့ၢ်​အ​ကျိၤ​ဒ်​လၣ်​အ​သိး​န့ၣ်​လီၤ. 


၁- ​တၢ်​ခု​ဖံး​ခု​မၤ (strong work ethic)

​တၢ်​အဲၣ်​ဖံး​အဲၣ်​မၤ, ​တၢ်​ပာ်​ကဲ​တၢ်​မၤ,​ ​မၤ​တၢ်​လၢ​တၢ်​သူၣ်​အိၣ်​သး​အိၣ် ​မၤ​လ့ၤ​တုၢ်​လ့ၤ​တီၤ, ​တၢ်​အဲၣ်​စု​လီၢ်​ခီၣ်​လီၢ်​န့ၣ်​မ့ၢ်​တၢ်​အ​ရ့​ဒိၣ်​လၢ ​ပှၤ​က​လုာ်​အ​သူး​အ​သ့ၣ်​ဒီး ​တၢ်​လဲၤ​ထီၣ်​လဲၤ​ထီ​အ​ဂီၢ်​န့ၣ်​လီၤ.​တၢ်​မၤ​တၢ်​တံၢ်​တံၢ်​ဒဲ​ဒဲ​ဒီး​တၢ်​စု​သ့, ​ဒီး​တၢ်​နာ်​န့ၢ်​ပှၤ​တ​က​လုာ်​အ​တၢ်​စု​လီၢ်​ခီၣ်​လီၢ်​န့ၣ် ​ဘၣ်​ထွဲ​လိာ်​အ​သး​န့ၣ်​လီၤ. (​quality workmanship: premium in trusted brands - Made in Taiwan; Made in Korea; Made in Singapore). 


၂- ​တၢ်​ပာ်​ဒိၣ်​တၢ်​ကူၣ်​ဘၣ်​ကူၣ်​သ့ (​prioritizing education that creates educated and skilled populations)

​တၢ်​ကူၣ်​ဘၣ်​ကူၣ်​သ့​န့ၣ် ​တ​မ့ၢ်​ထဲ​ကၠိ​ဖိ​တ​ဖၣ် ​အိၣ်​ဒီး​တၢ်​ဂုာ်​ကျဲး​စၢး​ဘၣ်, ​ဘၣ်​တၢ်​ဆီၣ်​ထွဲ​စ့ၢ်​ကီး​အီၤ​လၢ ​မိၢ်​ပၢ်​ဒီး​သ​ရၣ်​သ​မါ. ​ပ​ဒိၣ်​ပ​ပှၢ်​စ့ၢ်​ကီး​ထံ​ကီၢ်​တီၤ​ကၠိ​တၢ်​ကူၣ်​ဘၣ်​ကူၣ်​သ့​န့ၣ် ​ပာ်​ဝဲ​လၢ​တၢ်​အ​ရ့​ဒိၣ် ​ဒီး​ဆီၣ်​ထွဲ​ရဲၣ်​ကျဲၤ​ခီၣ်​လၢာ်​ဘူၣ်​လၢာ်​စ့ၤ​ဝဲ​န့ၣ်​လီၤ. 


၃- ​တၢ်​တ့​တၢ်​အါ​အါ​ဂီၢ်​ဂီၢ်​လၢ​စဲး​ဖီ​က​ဟၣ်(​rapid industrialization)

​တၢ်​ဒုး​အိၣ်​ထီၣ် ​စဲး​ဖီ​က​ဟၣ်​တၢ်​သ့​တၢ်​ဘၣ်​ဒီး ​တ့​​ဝဲအါ​အါ​ဒ်​က​ဆါ​ဘၣ်​ဝဲ​ဆူ ​ထံ​ကီၢ်​အါ​ဘ့ၣ် ​ဒ်​ခ့​ခါ​ဟီၣ်​ခိၣ်​တၢ်​လိၣ်​ဘၣ်​အ​သိး. [effenciency and productivity] 


၄- ​တၢ်​စိာ်​ဆါ​မၤ​ကၤ​တၢ်​ဆူ​ထံ​ဂုၤ​ကီၢ်​ဂၤ (​export policy and free trade)

​တၢ်​သ့​ကူ​လဲၢ်​မၤ​ကၤ, ​ဆါ​တၢ်​ပှ့ၤ​တၢ်​ဒီး ​တၢ်​သ​ဘျ့​လၢ​မုၢ်​​ကျိၤ​ဝဲၤ​ကွာ်​န့ၣ် ​အိး​ထီၣ်​ကျဲ​လၢ ​တၢ်​လဲၤ​ထီၣ်​လဲၤ​ထီ ​လၢ​မုၢ်​ကျိၤ​ဝဲၤ​ကွာ်​န့ၣ်​လီၤ.


၅- ​သး​စၢ်​ပိာ်​ခွါ​ခဲ​လၢာ်​ဘၣ်​လဲၤ​ကဲ​သုး ​လၢ​တၢ်​ဒီ​တ​ဒၢ​ထံ​ကီၢ်​အ​ဂီၢ် (compulsory conscription)

​သုး​တၢ်​မၤ​လိ​ဒီး​သုး​ဖိ​အ​တၢ်​အိၣ်​မူ ​ဒုး​အိၣ်​ထီၣ်​သး​စၢ်​လၢ ​အ​ပ့ၢ်​အ​ဆှါ, ​သး​စၢ်​ဂီၢ်​မုၢ်​လၢ​အိၣ်​ဒီး​တၢ်​ပာ်​ကဲ​တၢ်, ​တၢ်​အဲၣ်​ထံ​အဲၣ်​ကီၢ် ​အိၣ်​ဒီး​တၢ်​ပာ်​ကဲ​လီၤ​အ​သး, ​အိၣ်​မူ​တ​ဝံ​ခိၣ်​ဒိၣ်​ခံ​ဃၢ​ဘၣ်, ​တ​အိၣ်​မူ​​​လံ​လူၤ​ကျူ​ဆါ​ဘၣ်​န့ၣ် ​ကဲ​ထီၣ်​ထံ​ကီၢ်​တၢ်​ဂံၢ်​တၢ်​ဘါ ​လၢ​ထံ​ကီၢ်​အ​ဂီၢ်​ဒီး ​တၢ်​ဘၣ်​လိာ်​ဖိး​မံ​လၢ ​တၢ်​ပၢ​ထံ​အီၣ်​ကီၢ်​အ​ဂီၢ် ​န့ၣ်​လီၤ.


၆-​ ခိၣ်​နၢ်​ဆူၣ်​ကိၤ​ပၢ​ဆှၢ​ထံ​ကီၢ်​မုၢ်​ကျိၤ​ဝဲၤ​ကွာ် (control economy)

​ထံ​ကီၢ်​တ​ဖၣ်​အံၤ ​ဖဲ ​သူၣ်​လီၤ​အ​သး​လီၤ​အ​သး ​အ​ဆၢ​က​တီၢ် ​ခိၣ်​နၢ်​လၢ​အ​ဆူၣ်​အ​ကိၤ ​တီ​ခိၣ်​ရိၣ်​မဲ​ဆှၢ​အ​ပှၤ​ဂီၢ်​မုၢ် ​ဒီး​ဆၢ​တဲာ်​တၢ် ​တဲာ်​တဲာ်​ဖျူ​ဖျူ​လၢ ​တၢ်​ဆီ​တ​လဲ​ တၢ်​ရဲၣ်​လီၤ​ကျဲၤ​လီၤ​ထီ​ကီၢ်​အ​ဂီၢ်, ​လီၤ​ဆီ​ဒၣ်​တၢ် ​မုၢ်​ကျိၤ​ဝဲၤ​ကွာ်​အ​တၢ်​ဂုၤ​ထီၣ်​ပ​သီ​ထီၣ်​အ​ဂီၢ်​န့ၣ်​လီၤ. 


၇- ​ထံ​ကီၢ်​တ​ဖၣ်​အံၤ​အိၣ်​ဒီး ​ဒုၣ်​ဒါ​ဂီၢ်​မုၢ်​လၢ​အ​ဃၢၤ

​ထံ​ကီၢ်​လဲၤ​ထီၣ်​လဲၤ​ထီ​တၢ​န့ၣ် ​တ​မ့ၢ်​လၢ ​အ​ဒုၣ်​အ​ဒါ​တၢ်​မၤ​ပျံၤ​မၤ​ဖုး​တ​အိၣ်​ဘၣ် ​တ​မ့ၢ်​ဘၣ်. ​ထံ​ကီၢ်​အိၣ်​ဒီး ​ဒုၣ်​ဒါ​ဂီၤ​မုၢ်​အ​ဃိ ​ထံ​ကီၢ်​ပ​ဒိၣ်​ပ​ပှၢ်​ဒီး ​ထံ​ဖိ​ကီၢ်​ဖိ​တ​ဖၣ် ​ဘၣ်​စိာ်​မဲာ်​စိာ်​နါ, ​က​တဲာ်​က​တီၤ​သး​ထီ​ဘိ​န့ၣ်​လီၤ.

​စီး​ခိ​ရံ​ယါ​အ​ဒုၣ်​အ​ဒါ​အိၣ်​ဂီၤ​မုၢ်​ မၤ​ပျံၤ​မၤ​ဖုး​အီၤ​ထီ​ဘိ. ​အ​ဒုၣ်​အ​ဒါ​နိး​ခိ​ရံ​ယါ​သုး​နီၣ်​ဂံၢ်​အိၣ်​လၢ ​အ​က​ကွဲၢ်​ဒီး ​အိၣ်​ဒီး​မျိာ်​သၣ်​ယူၤ​တ​ဖၣ် ​လၢ​အ​ထီ​ဃာ်​နူၤ​က​လံ​ယါ​အ​ခီၣ်​သၣ်​ဃံ​တ​ဖၣ်​န့ၣ်​လီၤ. ​ဒ်​န့ၣ်​အ​သိး ​ကီၢ်​ထဲၣ်​ဝၣ်​ စ့ၢ်​ကီး ​က​ဘၣ်​ပျံၤ​ကီၢ်​စံၣ်​တ​ရူး​ကီၢ်​မိၢ်​ပှၢ်​လၢ ​အ​နီၢ်​ဂံၢ်​အါ​ဒီး​အ​ဂံၢ်​ဆူၣ်​န့ၣ်​လီၤ.

​စ့​က​ဖီ​ဖဲ​အ​န့ၢ်​တၢ်​သ​ဘျ့​အ​ခါ​န့ၣ် ​အိၣ်​ဒၣ်​လၢ​က​ပံာ်​ထံ​ကျါ, ​ပ​စိၤ​အ့ၣ်. ​ထံ​ဖိ​ကီၢ်​ဖိ​အိၣ်​ဃံး​အီၣ်​စ့ၤ. ​အ​ကီၢ်​ဆံး​အ​ဃိ ​အိၣ်​က​တဲာ်​က​တီၤ​အ​သး​ထီ​ဘိ​လၢ​တၢ်​က​ဟဲ​ယူၢ်​လီၤ​ကွံာ်​အီၤ​တ​ဖၣ်​န့ၣ်​လီၤ. ​စံး​ဝဲ​လၢ ​ပီၣ်​လဲၣ်​ပူၤ​န့ၣ် ​ညၣ်​ဖး​ဒိၣ်​အီၣ်​ညါ​ဖိ, ​ညၣ်​ဖိ​အီၣ်​က့ၤ​သ​ဒီၣ်​အ​ဃိ ​အ​ဝဲ​သ့ၣ်​က​တီၤ​အ​တၢ်​ဒီ​သ​ဒၢ​ က​လီၤ​ဂာ်​ဒ် ​သ​ဒီၣ်​လၢ​အိၣ်​ဒီး​အ​စုၣ်​ကိၤ​လၢ ​တၢ်​ဟဲ​အီၣ်​အီၤ ​သု​တ​ဘုၣ်​တ​ဂ့ၤ​အ​ဂီၢ်​န့ၣ်​လီၤ.  


Sawlah Photography

​ဆူ​ညါ​တ​စိၤ​တၢ်​သ့​တၢ်​ဘၣ်


​ကီၢ်​ကၠီၣ်​တဲၣ် ​လၢ​အ​ဘုး​က​တၢၢ်​ဒီး​ပှၤ​န့ၣ်​တၢ်​လၢ​အ​ဂ့ၤ​လီၤ​ကွၢ်​လိ ​လၢ​တၢ်​စု​သ့​အ​တၢ်​သ့​တၢ်​ဘၣ်, ​တၢ်​ရဲၣ်​လီၤ​ဆီ​လီၤ​အ​သး ​အ​လု​အ​လၢ်​အိၣ်​ဝဲ​အါ​မး​န့ၣ်​လီၤ. ​​စိၤဆၢ​က​တီၢ်​ခဲ​အံၤ ​စဲ​အ့ၣ်​ပီ​ညါ(science),​စဲး​ဖီ​က​ဟၣ်​ပီ​ညါ(​technology), ​ဒီး​တၢ်​ဆိ​က​မိၣ်​ပီ​ညါ(​philosophy) ​လၢ​တၢ်​မၤ​လိ​အီၤ​လၢ ​လၢ​ပ​တီၢ်​ထီ​ဖၠၣ်​စိ​မိၤ​တ​ဖၣ် ​ပ​မၤ​လိ​န့ၣ်​ဘၣ်​အီၤ​ညီ​က​ဒၣ်, ​န့ၢ်​က​လီ​လၢ ​က​လံၤ​ကျါ​န့ၣ်​လီၤ. 


​လၢ​ကီၢ်​သူ​လ့ၤ ​အ​တၢ်​လဲၤ​ထီၣ်​လဲၤ​ထီ​အ​ဂီၢ်​တၢ်​လၢ​ပ​က​ဘၣ်​မၤ​လိ​သ့​ပ​သး​လၢ​က​တဲာ်​က​တီၤ​ဆိ​သး​တ​ဖၣ်​န့ၣ်​က​မ့ၢ်​ဝဲ ​အံၣ်​ကၠံ​နံ​ယၢၣ်​တၢ်​သ့​တၢ်​ဘၣ်,​လီ​မ့ၣ်​အူ, ​အံၣ်​လဲး​ထြီ​နံး, ​ဒီး ​ခိၣ်​ဖၠူ​ထၢၣ်​တၢ်​သ့​တၢ်​ဘၣ်​တ​ဖၣ်န့ၣ်​လီၤ. (​Engineering, Electricity, Electronic, Computing – EEEC or 3EC)​

​Engineering ​အ့ၣ်​ကၠံ​နံ​ယ​ရံ ​န့ၣ် ​က​မ့ၢ်​ဝဲ ​တၢ်​တ့​ထီၣ်​ဘှီ​ထီၣ်​တၢ်​သူၣ်​ထီၣ်, ​ကျဲ​မုၢ်​ကျဲ​ဘိ, ​တိၤ, ​တ​မၢၢ်, ​သ​န့​တ​ဖၣ်​လၢ​အ​လိၣ်​ဝဲ​ဒၣ်​အံၣ်​ကၠံ​နံ​ယ​ရံ​တၢ်​ဆိ​က​မိၣ် ​တၢ်​သ့​တၢ်​ဘၣ်​တ​ဖၣ်​န့ၣ်​လီၤ. 

​Electricity ​လီ​မ့ၣ်​အူ​အ​တၢ်​သ့​တၢ်​ဘၣ် ​တ​ဖၣ်​န့ၣ်​က​မ့ၢ်​ဝဲ ​တၢ်​ကဲ​ဘျုး​လၢ ​တၢ်​ဒုး​အိၣ်​ထီၣ်​ဂံၢ်​သ​ဟီၣ် (energy and motor)​ဒီး ​စဲး​ဖီ​က​ဟၣ်​မိ​ထၢၣ်​တ​ဖၣ် ​လဲၤ​တ​ရံး​ဖံး​တၢ်​မၤ​တၢ်​ဒ်​လဲၣ်​အ​ဂ့ၢ်​န့ၣ်​လီၤ.

​Electronic​ အံၣ်​လဲး​ထ​ရီ​နံး​န့ၣ် ​မ့ၢ်​ဝဲ​တၢ်​ပိး​တၢ်​လီ​လၢ ​ခ့​ခါ​ခဲ​အံၤ​တၢ်​သူ​အီၤ​တ​ဖၣ် ​ဘၣ်​တၢ်​တ့​အီၤ​လၢ ​အံၣ်​လဲး​ထြီ​နံး​တ​ဖၣ်​န့ၣ်​လီၤ. 

​Computing ခိၣ်​ဖၠူ​ထ့ ​တ​ခီ​က​ဘၣ်​ဃး​ဒီး ​စဲး​ဖီ​က​ဟၣ်​အ​ခိၣ်​နူာ်​တ​ဖၣ် ​တၢ်​ရဲၣ်​သဲ​က​တီၤ​ပၢ​ဆှၢ​အီၤ​လၢ ​ခိၣ်​ဖၠူ​ထၢၣ်​ပ​ရိ​ကြၢၢ်(​programs)​တၢ်​နဲၣ်​လီၤ​အ​စူၣ်​တ​ဖၣ် ​လၢ ​စဲး​ဖီ​က​ဟၣ်​က​တ​ရံး​ဒၣ်​ဝဲ​အ​က​စၢ်​က​သ့​အ​ဂီၢ်(automation)​န့ၣ်​လီၤ. 

​[value added] ​ပ​ထံ​ပ​ကီၢ်​န့​ဆၢၣ်​တၢ်​ထုး​တၢ်​တီၤ​အိၣ်​ဂီၤ​မုၢ်​လၢ ​ဟီၣ်​ခိၣ်​ဖီ​ခိၣ်​ဟီၣ်​လာ်​ဖီ​လာ်​ဘၣ်​ဆၣ်​ပ​ဘၣ်​မၤ​လိ​သ့​ပ​သး​လၢ ​တၢ်​မၤ​ဂ့ၤ​ထီၣ်​တၢ်​ဒ်​သိး​က​မၤ​အါ​ထီၣ်​တၢ်​အ​ပှ့ၤ​န့ၣ်​လီၤ. ​ပ​ထံ​ကီၢ်​န့​ဆၢၣ်​စၢၢ်​ထး​က့​ခီ​တ​ဖၣ်​မ့ၢ်​ဂ့ၤ, ​တၢ်​သူ​တၢ်​သၣ်, ​သ့ၣ်​ထူၣ်​ဝၣ်​ဘိ​တ​ဖၣ်​မ့ၢ်​ဂ့ၤ ​တၢ်​တ​ကြၢး​ဆါ​အီၤ ​အ​ဃီၤ​ဃၤ(​raw products)​ဘၣ်. ​ပ​သ့ၣ်​ပ​ဝၣ်​ပ​ကူၣ်​ပ​ဆါ​အီၤ​လၢ​အ​ဃီၤ​ဃၤ​န့ၣ် ​အ​ပှ့ၤ​တ​အိၣ်​ဘၣ်. ​ဘၣ်​ဆၣ်​ပ​မ့ၢ်​တ့​ဂ့ၤ​ထီၣ် ​က​တဲာ်​က​တီၤ​ဃံ​လၤ​ထီၣ်​အီၤ​န့ၣ် ​အ​လုၢ်​အ​ပှ့ၤ​ဂ့ၤ​ထီၣ်​သ့​ဝဲ​လီၤ. ​ပ​က​တဲ​အ​ဒိ, ​သ့ၣ်​သၣ်​တ​ဖျၢၣ်​အ​ပှ့ၤ​က​အိၣ်​တ​ဘး, ​ဘၣ်​ဆၣ်​ပ​မၤ​ဃ့, ​ဘိၣ်​အီၤ​လၢ​အ​ဒၢ​ပူၤ​ဃံ​ဃံ​လၤ​လၤ, ​အိၣ်​ဒီး​အ​ဂ့ၢ်​အ​ကျိၤ​လၢ ​တၢ်​အီၣ်​အ​သ​ဟီၣ်​တ​ဖၣ် (​packaging and nutrition label to add value)​န့ၣ် ​ပှၤ​ဟ့ၣ်​အီၤ​အ​ပှ့ၤ​အါ​ထီၣ်​တုၤ​ယဲၢ်​ဘး​သ့​န့ၣ်​လီၤ.


​[innovation, creativity, and productivity] ပ​မၤ​လိ​သ့​ပ​သး​လၢ ​ဃု​ဆိ​က​မိၣ်​တ့​လိ​တၢ်​အ​သီ​တ​ဖၣ်​လၢ​က​ကဲ​ဘျုး​မၤ​ညီ​လီၤ​တၢ်​ဖံး​တၢ်​မၤ​တ​ဖၣ်, ​ဒီး​ပ​ထုး​ထီၣ်​အီၤ​န့ၢ်​အါ​အါ​လၢ​အ​လၢာ်​ဘူၣ်​လၢာ်​စ့ၤ​စှၤ​န့ၣ်​လီၤ. ​ပှၤ​အ​မဲ​ရ​ကၤ​ဒီး ​ပှၤ​မဲး​က​ဆံၣ်​ကိၣ်​ဖိ​မၤ​တၢ်​ဆူၣ်​ဒံး​သိး​သိး​ဘၣ်​ဆၣ် ​န​မ့ၢ်​ထိၣ်​သ​တြီၤ ​အ​မဲ​ရ​ကၤ​ပှၤ​မၤ​တၢ်​ဖိ​တ​ဂၤ​န့ၣ်​ထုး​ထီၣ်​တၢ်​န့ၢ်​အါ ​မ့ၢ်​လၢ​အ​သူ ​တၢ်​ပီး​တၢ်​လီ​ဒီး ​ဆီ​လီၤ​ရဲၣ်​လီၤ​အ​သး​ဂ့ၤ​လၢ​တၢ်​မၤ​အ​ပူၤ​လီၤ​ဆီ​အ​ဃိ​န့ၣ်​လီၤ.


​[trade] ပ​ကြၢး​မၤ​ညီ​နုာ်​ပ​သး​လၢ ​တၢ်​ဆါ​တၢ်​ပှ့ၤ ​တၢ်​ကူ​လဲၢ်​မၤ​ကၤ​တၢ်​လၢ ​ပ​ပှၤ​က​လုာ်​ကျါ​ဒီး ​ဆူ​ပှၤ​အါ​က​လုာ်​ကျါ​န့ၣ်​လီၤ. ​ပ​မၤ​မ့ၢ်​တ​သ့ ​ပ​မၤ​မ့ၢ်​တ​မုာ်​ဘၣ်​ဒီး ​ပှၤ​လၢ​တၢ်​ချၢ​မ့ၢ်​ဟဲ​ကဲ ​ပှၤ​မၤ​ကၤ​တၢ်​န့ၣ် (middleman) ​ပှၤ​ဂၤ​က​ဟ့ၣ်​ပှၤ​အ​ပှ့ၤ​စှၤ​ဒီး ​က​ဟံး​န့ၢ်​တၢ်​မၤ​ကၤ​အ​လဲ​အါ​အါ​အ​ဃိ ​ပ​တၢ်​ဖိ​တၢ်​လံၤ​အ​ပှ့ၤ​တ​အိၣ်​ဒ်​သိး​အ​ကြၢး​အိၣ်​ဝဲ​ဘၣ်.  

​ပ​ထံ​ပ​ကီၢ်​ပှၤ​ဟဲ​သူၣ်​ထီၣ်​န့ၢ်​ပှၤ​တ​န့ၢ်​ဘၣ်. 


​​တၢ်​အ​ဒိ​အ​တဲာ်​လၢ​ပ​ထံၣ်​ဘၣ်​န့ၣ် ​တၢ်​သူၣ်​ထီၣ်​ထံ​ကီၢ်​န့ၣ် ​ပှၤ​ဂုာ်​ဂၤ​လၢ​တၢ်​ချၢ​ဟဲ​သူၣ်​ထီၣ်​န့ၣ်​ပှၤ​တ​န့ၢ်​ဘၣ်. ​ပှၤ​အံး​စ်​ထံၣ်​မီ(​East Timor)​ဖိ​တ​ဖၣ်​န့ၢ်​က့ၤ​တၢ်​သ​ဘျ့​ဖဲ ၂၀၀၂, ​ဘၣ်​ဆၣ်​အ​နံၣ်​ခံ​ဆံ​အ​တီၢ်​ပူၤ​န့ၣ် ​ပှၤ​ကီၢ်​မုၢ်​နုာ်​ဖိ ​အဲၣ်​န်​ကၠံၢ်​အိၣ်​တ​ဖၣ် ​ဟဲ​သူၣ်​ထီၣ်​ဘှီ​ထီၣ်​န့ၣ်​အီၤ, ​ဘၣ်​ဆၣ်​ထံ​ကီၢ်​အိၣ်​ဒၣ်​လၢ ​တၢ်​ဖှီၣ်​တၢ်​ယာ်​အ​ပူၤ​လီၤ. ​ပှၤ​လၢ​အ​ဟဲ​မၤ​စၢၤ​အီၤ​လၢ ​အီး​စ​တြ့​လျၣ်​န့ၣ် ​ဆီၣ်​တံၢ်​မၤ​နၢၤ​က့ၤ​အီၤ​လၢ ​တၢ်​ဟံး​န့ၢ်​အ​ဟီၣ်​ခိၣ်​က​ပံာ်, ​ဟီၣ်​လာ်​တၢ်​ထုး​တၢ်​တီၤ​တ​ခီ. ​တုၤ​လၢ​ခဲ​အံၤ​တ​စိၤ​ထံ​ကီၢ်​ပှၤ​သး​စၢ်​တ​ဖၣ်​ဒိၣ်​ထီၣ်​ဒီး​ကူၣ်​သ့​ကူၣ်​ဘၣ်​ထီၣ်, ​ဒီး​သူၣ်​ထီၣ်​က့ၤ​ဝဲ​လၢ ​အ​က​စၢ်​အ​ဃိ ​တၢ်​လဲၤ​ထီၣ်​လဲၤ​ထီ​အိၣ်​ထီၣ်​ဝဲ ​လၢ​အ​ပူၤ​ကွံာ်​စှၤ​နံၣ်​အ​ပူၤ​ဒံး​န့ၣ်​လီၤ. 


​ဆူ​ညါ​တ​စိၤ​တၢ်​ဒုး​တၢ်​ယၤ​န့ၣ် ​တ​ဒံး​သိး​ဒီး ​ပ​ဖံ​ပ​ဖု​ပ​မိ​ပ​ပါ​အ​စိၤ​လၢၤ​ဘၣ်.


​​

​တၢ်​ဒုး​ဆူ​ညါ​တ​စိၤ​န့ၣ်​က​ဟၣ်​တ​ရံး​တ​ဖၣ် ​က​ယူၤ​ဝ့ၤ​ဝီၤ​လၢ​က​လံၤ​ကျါ ​လူၤ​ဃု​ဒုး​လိာ်​ခး​လိာ်​အ​သး​ဒၣ်​ဝဲ​န့ၣ်​လီၤ. ​အ​ခဲ​အံၤ​ဒၣ်​လဲၤ ​ဟီၣ်​ခိၣ်​ချၢ​တၢ်​ဒုး​တ​ဖၣ် ​ဒုး​လိာ်​အ​သး​လၢ ​က​ဘီ​ယူၤ​ဖိ​လၢ ​ပှၤ​နီၣ်​စီၤ​စိ​အီၤ​န့ၣ်​လီၤ. ​ခဲ​အံၤ​ယူၣ်​ခြ့​ဒီး​ရၢး​ၡါ ​တၢ်​ဒုး​ခံ​နံၣ်​အ​တီၢ်​ပူၤ​န့ၣ် ​သုး​မုၢ်​ဒိၣ်​ခံ​က​ပၤ​လိာ် ​လူၤ​ဃု​ဒုး​လိာ်​အ​သး​လၢ ​ဒြိ​ဖိ​တ​ဖၣ်​အါ​အါ​ဂီၢ်​ဂီၢ်​လီၤ. ​ခဲ​အံၤ​တ​စိၤ​မျိာ်​သၣ်​ယူၤ​တ​ဖၣ် ​အိၣ်​ဒီး​ခိၣ်​ဖၠူ​ထၢၣ်​အ​ခိၣ်​နုာ်​ဒီး​လူၤ​ဃု​အ​တၢ်​ခး​ပ​နီၣ်​လၢ​အ​က​စၢ်​ဒၣ်​ဝဲ​လံ ​န့ၣ်​လီၤ(​အ​ဒိ, ​အံၣ်​စ​ရ့​ထး​ကု​ခိၣ် .​မ​သ​ညီ​သာ်​န). ​ဆူ​ညါ​န့ၣ်​တၢ်​က​သူ​အါ​ထီၣ် ​စု​က​ဝဲၤ​တ​ဖၣ်​လၢ ​အ​အိၣ်​ဒီး ​စဲး​နါ​မဲာ်​ချံ​အ​က​လုာ်​က​လုာ်(Iron Dome)​ဒီး ​ခိၣ်​ဖၠူၣ်​ထၢၣ်​ခိၣ်​နူာ်​အ​တၢ်​သ့ၣ်​ညါ​လၢ ​ထိၣ်​ဒွး​တၢ်​ဒီး ​ဆၢ​တဲာ်​တၢ်​လၢ​အ​က​စၢ်​ဒၣ်​ဝဲ(Artificial Intelligence - AI)​ဒီး ​လဲၤ​တၢ်​လၢ​မုၢ်​ဆါ​မုၢ်​နၤ​တၢ်​ခံး​တၢ်​နၤ​လၢ​အ​က​စၢ်​ဒၣ်​ဝဲ ​သ့​ထီ​ဘိ​န့ၣ်​လီၤ. 


​ပ​မ့ၢ်​တ​နၢ်​ပၢၢ် ​စဲး​ဖီ​က​ဟၣ်​တ​ရံး​အ​ဂ့ၢ်, ​ပ​က​သူ​အီၤ​ကၢၤ​အီၤ ​မ့ၢ်​တ​သ့​ဘၣ်​ဒီး ​ပ​က​ပျံၤ​အီၤ​သး​ဘၣ်​အၢ​အီၤ ​ဒ်​ပ​ပျံၤ​တၢ်​ဝံ​တၢ်​နါ​တ​ဖၣ် ​ဒီး​က​ဟဲ​မၤ​နၢၤ​အီၣ်​ပှၤ​န့ၣ်​လီၤ. ​ပ​က​ဘၣ်​ညီ​နုၢ်​သ့ၣ်​ညါ​နၢ်​ပၢၢ်​ပၢ​ဆှၢ​အီၤ​စီ​က​ဒီ ​လၢ​တၢ်​ကဲ​ဘျုး​လၢ​ပ​ဂီၢ် ​ဒ်​က​ဆီ​လၢ​အ​ဂံၢ်​ဆူၣ်​အိၣ်​လၢ ​က​ဆီ​ကွါ​အ​က​လုၢ်​အ​ဖီ​လာ်​အ​သိး ​န့ၣ်​လီၤ.


​ခဲ​က​နံၣ်​အံၤ ​ဘီ​မုၢ်​တ​ဖၣ်​ဘၣ်​ကိၢ်​ဘၣ်​ဂီၤ​လၢ ​ခိၣ်​ဖၠူ​ထၢၣ်​အ​တၢ်​သ့ၣ်​ညါ​လဲၤ​ထီၣ်​လဲၤ​ထီ​ဒီး ​ပ​ဒိၣ်​ပ​ပှၢ်​တ​ဖၣ် ​ဘၣ်​တ့​လီၤ​ရဲၣ်​လီၤ ​သဲး​စး​တ​ဖၣ်​လၢ ​က​ကၢၤ​ဃာ် ​စဲး​ဖီ​က​ဟၣ်​အ​တၢ်​ကူၣ်​သ့​တ​ဖၣ်​န့ၣ်​လီၤ. ​မ​ငါ​တ​နံၣ်၂၀၂၃ ​ယူ​ရ​ပၤ​ကီၢ်​စၢ​ဖှိၣ်(​European Union)​ပာ်​ဂၢၢ်​ပာ်​ကျၢၤ​ဝဲ ​တၢ်​ကၢၤ​ရဲၣ်​သဲ​ခိၣ်​ဖၠူ​ထၢၣ်​ကူၣ်​သ့​အ​သဲ​စး(AI Act) ​လၢ​အ​မ့ၢ်​ဝဲ​သဲ​စး​တၢ်​ဘျၢ​လၢ ​အ​တ​ကွီၢ်​အ​လဲၢ်​အ​ထီ​က​တၢၢ် ​လၢ​ဟီၣ်​ခိၣ်​ချၢ​လၢ​တၢ်​ကၢၤ​က့ၤ ​တၢ်​သူ​ခိၣ်​ဖၠူၣ်​ထၢၣ်​တၢ်​ကူၣ်​သ့​သ့ၣ်​ညါ​တ​ဖၣ်​အ​ဂီၢ်​န့ၣ်​လီၤ. 


​ထံ​ဘ​ဘျ့​ကီၢ်​သ​ဘျ့​န့ၢ်​ဝံၤ​န့ၣ် ​ပ​တၢ်​မၤ​တ​စှၤ​လီၤ​ဘၣ်. ​ခဲ​အံၤ​တ​စိၤ​ထံ​ကီၢ်​တ​ဖၣ် ​ဒုး​လိာ်​ပြၢ​လိာ်​အ​သး​လၢ ​မုၢ်​ကျိၤ​ဝဲၤ​ကွာ်​တၢ်​ဆီၣ်​သ​နံး​တၢ်​ဖီၣ်​ဃံး, ​အ​ဒိ​ဒ်​သိး​ကီၢ်​စံၣ်​တ​ရူး​ကီၢ်​မိၢ်​ပှၢ်​ဘၣ်​ကွၢ်​ဆၢၣ်​မဲာ်​ဝဲ​တၢ်​ကး​တံာ် (​Export Control)​ဒီး​ယူၣ်​အဲး​စ်​အ​ဘၢၣ်​စၢၤ​လၢ ​တၢ်​ဆါ​တၢ်​ပှ့ၤ ​ထဲး​က​နီ​လီၢ်​ကၠံၢ်​က​ဟၣ်​အ​က့​အ​ခီ​တ​ဖၣ်​န့ၣ်​လီၤ. ​ခိၣ်​ဖၠူ​ထၢၣ်​အ​ခိၣ်​နုာ်​သ​လီ(semi-conductor and technology minerals)​တ​ဖၣ် ​ကဲ​ထီၣ်​ထံ​ကီၢ် ​အ​သွံၣ်​ကျိၤ​ဒ် ​ဂံၢ်​သ​ဟီၣ်​သိ​ဒွဲၣ်​ရ့ၣ်​နီၣ်​တ​ဖၣ်​အ​သိး​ဒီး ​ထံ​ကီၢ်​တ​ဘ့ၣ်​ဒီး​တ​ဘ့ၣ် ​အိၣ်​ဒီး​တၢ်​ကိၢ်​တၢ်​ဂီၤ​လၢ​တၢ်​ဖီၣ်​ဃံး​ဒိၣ်​တဲာ်​လိာ်​သး ​လၢ​သွံၣ်​ကျိၤ​တ​ဖၣ်​န့ၣ်​လီၤ.


​ပ​အိၣ်​မူ​လၢ​ဟီၣ်​ခိၣ်​ဖီ​ခိၣ် ​ဟီၣ်​ခိၣ်​ဘီ​မုၢ်​အ​ထံ​ရူၢ်​ကီၢ်​သဲး​ဒီး ​မုၢ်​ကျိၤ​ဝဲၤ​ကွာ်​န့ၣ် ​အ​ဘၣ်​ထွဲ​ဘၣ်​ဃး ​ဒ်​ဒူ​သ​ဝီ​တ​ဖျၢၣ်​ဃီ​အ​ပူၤ ​မူ​ခိၣ်​က​လံၤ​သီၣ်​ဂီၤ​တ​ခါ​ဃီ​အ​ဖီ​လာ်​အ​သိး​န့ၣ်​လီၤ. ​ပ​ကြၢး​မၤ​လိ​နၢ်​ပၢၢ်​ပ​သး​လၢ ​ဘီ​မုၢ်​က​ဒွဲ​ထံ​ရူၢ်​ကီၢ်​သဲး​အ​တၢ်​သူၣ်​လီၤ​ဆီ​လီၤ(International System and global politics)​ဒ်​သိး​ပ​တၢ်​နၢ်​ပၢၢ် ​ပှၤ​က​လုာ်​အ​ထံ​ရူၢ်​ကီၢ်​သဲး ​အ​ပူၤ​က​ပှဲၤ​ဝး​က​ဝီၤ​အ​ဂီၢ်​န့ၣ်​လီၤ. ​မ့​တ​မ့ၢ်​ဘၣ်​န့ၣ် ​ပ​က​ဆိ​က​မိၣ်​လၢ “​ကီၢ်​မုၢ်​နုာ်​က​ဟဲ​မၤ​စၢၤ​ပှၤ, ​ကီၢ်​မုၢ်​ထီၣ်​က​ဟဲ​မၤ​စၢၤ​ပှၤ” ​ဒီး ​ပ​လဲၤ​မၤ​လၢာ်​တၢ်​ဆၢ​က​တီၢ်​လၢ ​မီၢ်​သီ​အ​ဟံၣ်​မဲာ်​ညါ​အိၣ်​လၢ​အ​စိၤ​တ​ဖၣ်​လံ. ​ထံ​ကီၢ်​တ​ဖၣ် ​အ​တၢ်​အၢၣ်​လီၤ​လံာ်​ဃံး​ဃာ်(​treaties)​မ့ၢ်​တ​အိၣ်​ဒီး​ပှၤ​ဘၣ်​န့ၣ် ​အ​မူ​အ​ဒါ​တ​အိၣ်​လၢ​က​ဘၣ်​ဟဲ​မၤ​စၢၤ​ပှၤ​ဘၣ်. ​ထံ​ကီၢ်​ဒိၣ်​ဒီး​ဆံး ​အိၣ်​ဒီး​အ​တၢ်​ကိၢ်​တၢ်​ဂီၤ ​အါ​လၢ​အ​က​စၢ်​ဒၣ်​ဝဲ​လံ.


​အ​ပူၤ​ကွံာ်​ဆံ​ဆဲၣ်​နံၣ် ​ပ​တၢ်​ပၢၢ်​ဆၢ​ဘၣ်​ကွၢ်​ဆၢၣ်​မဲာ်​ဒီး ​ပ​ဒုၣ်​ဒါ​မီၤ​စိ​ရိၤ ​လၢ​ဘၣ်​တၢ်​ဆီၣ်​ထွဲ​အီၤ​လၢ ​ဟီၣ်​ခိၣ်​ဒီ​တ​ဘ့ၣ်​လၢ ​ကျိ​ခံ​ဝၣ်​သၣ်​စု​က​ဝဲၤ, ​ကျိၣ်​စ့​ဒီး​မီၢ်​သီ​တၢ်​မၤ​စၢၤ ​ဒီး​ဆီၣ်​သ​နံး​က့ၤ​ပ​တၢ်​ပၢၢ်​ဆၢ​လၢ ​ပ​က​အိၣ်​မုာ်​အိၣ်​ခုၣ်​ဒီး​ပ​ဒုၣ်​ပ​ဒါ​န့ၣ် ​ပ​ထံၣ်​ဘၣ်​တ့ၢ်​လံ. ​ပ​တၢ်​နၢ်​ပၢၢ်​ထံ​ရူၢ်​ကီၢ်​သဲး ​အ​တ​ကွီၢ်​က​ဝး​အ​ဂီၢ်​ပ​ဘၣ်​စိာ်​မဲာ်​စိာ်​နါ​စ့ၢ်​ကီး​လၢ ​ဟီၣ်​ခိၣ်​အ​ထံ​ရူၢ်​ကီၢ်​သဲး, ​ဟီၣ်​ခိၣ်​အ​တၢ်​ဆီ​တ​လဲ, ​ထံ​ကီၢ်​တ​ဖၣ်​အ​ဘၢၣ်​စၢၤ​တၢ်​ဖ့ၣ်​ဆၢ, ​အ​တၢ်​ကိၢ်​တၢ်​ဂီၤ​ဒီး ​ဘီ​မုၢ်​သိၣ်​မှံၤ ​အ​တၢ်​သူၣ်​လီၤ​ဘျး​စဲ ​တ​ဖၣ်​စ့ၢ်​ကီး​န့ၣ်​လီၤ. 


​ဟီၣ်​ခိၣ် ​တၢ်​ဆီ​တ​လဲ​လၢ​အ​ပူၤ​ကွံာ်(၇၅)​နံၣ်​န့ၣ် ​ပျိၣ်​လဲ​ကွံာ်​တၢ်​လၢာ်​လံ. ​တၢ်​သ့ၣ်​ညါ​ထဲ​ပ​တၢ်​ပၢၢ်​ဆၢ​အ​တၢ်​စံၣ်​စိၤ​န့ၣ် ​တ​လၢ​ပှဲၤ​လၢ ​တၢ်​နၢ်​ပၢၢ်​ဟီၣ်​ခိၣ်​အ​ထံ​ရူၢ်​ကီၢ်​သဲး​ဒီး ​ကီၢ်​သူ​လ့ၤ​အ​တၢ်​အိၣ်​ဂဲၤ​ဆၢ​ထၢၣ်​အ​ဂီၢ်​လၢၤ​ဘၣ်.


​ကီၢ်​လၢ​အ​မုာ်​က​ဘၣ်​တုၤ​အိၣ်​ပှၤ.


​ပ​မ့ၢ်​အိၣ်​မူ​ကွၢ်​လိ​ဒိ​ဂ့ၤ​တဲာ်​ဘၣ်​လၢ ​ပှၤ​က​လုာ်​လၢ​အ​လဲၤ​ထီၣ်​လဲၤ​ထီ​တ​ဖၣ်​န့ၣ် ​ပ​က​လဲၤ​ထီၣ်​လဲၤ​ထီ​လီၤ.​အ​လၢ​အ​ပှဲၤ​မ့​တ​န့ၢ်​ဒၣ်​လဲာ် ၇၅​မျး​က​ယၤ​န့ၣ် ​အ​သူ​အ​သၣ်​က​ဘၣ်​ဖျါ. ​ပ​ခိၣ်​ဒိၣ်​စီၤ​ဘး​အူ​ကၠံ​အ​တၢ်​စံး​ပာ်​လၢ ​က​ညီ​ကီၢ်​က​န့ၢ်​အ​ဂီၢ်​ကျဲ​သၢ​ဘိ ​လၢ​အ​မ့ၢ်​ဝဲ 

- (၁)​ဒုၣ်​ဒါ​ပျၢ်​စု​ပျၢ်​ခီၣ်​အၢၣ်​လီၤ​ဟ့ၣ်​ထွဲ​ဝဲဲ(​voluntary gift), 

- (၂)​ပ​ဒုး​န့ၢ်​လၢ ​ပ​သုး​ဂံၢ်​ဘါ(military conquest), ​ဒီး

- (၃)​တၢ်​အိၣ်​သး​ဆီ​တ​လဲ​တၢ်​ဆီၣ်​သ​နံး​အ​သး​ဝး​ဝး(force of circumstances)​န့ၣ် ​အ​ခဲ​အံၤ​က​ဟဲ​တုၤ​အိၣ်​ပှၤ​လၢ ​ကျဲ​သၢ​ဘိ​လၢာ်​ပာ်​ဖှိၣ်​ထီၣ်​သး​အ​ပူၤ​န့ၣ်​လီၤ. 


​ဆၢ​က​တီၢ်​ခဲ​အံၤ ​ပ​က​မၤ​စၢၤ ​က​လုာ်​ဒူၣ်​တ​ဖၣ် ​လၢ​အ​ဘၣ်​ကွၢ်​ဆၢၣ်​မဲာ်​တၢ်​ဒံး​သိး​ဒီး​ပှၤ​တ​ဖၣ် ​ဖဲ​ပ​သ့​န့ၣ်​မ့ၢ်​တၢ်​ဂ့ၤ​လီၤ. ​ပ​ကြၢး​မၤ​လီၤ. ​က​လုာ်​ဒူၣ်​ဖီၣ်​စု​က​ဝဲၤ​လၢ ​အ​ဒုး​ပ​ဒုၣ်​ပ​ဒါ​န့ၣ် ​မ့ၢ်​ပ​တၢ်​ဂံၢ်​တၢ်​ဘါ​လီၤ. ​ဘၣ်​ဆၣ် ​ပ​ဟး​စံး​လၤ​ပ​သး​လၢ ​ပ​က​အုၣ်​က့ၤ​ခီၣ်​က့ၤ​ကီၤ​ပံၤ​ယီၤ​ဒီ​တ​ဘ့ၣ်​ဒီး ​ခဲ​အံၤ​ပှၤ​လၢ​အ​နီၢ်​ဆံး​ဒီ​ပုၢ်​ဝဲၢ်​သၢ​ဖု​န့ၣ်​လဲၤ​လၢ​ပှၤ​မဲာ်​ညါ​လံ. ​ပ​က​စၢ်​ဒၣ်​ပ​ဝဲ ​ပ​ဆၢ​ထၢၣ်​က​ဘၣ်​ကျၢၤ ​ဒ်​သိး​ပ​ဝံၢ်​ဆၢ​ထၢၣ်​ပှၤ​လၢ​အ​ဂံၢ်​စၢ်​က​န့ၢ် ​အ​ဂီၢ်​န့ၣ်​လီၤ. ​ပ​ကြၢး​သူၣ်​လီၤ​ဆိ​ပ​သး ​ဒ်​သိး ​ပ​မၤ​စၢၤ​က့ၤ​ပှၤ​လၢ​ပ​ဃၢၤ​က​သ့​အ​ဂီၢ်​န့ၣ်​လီၤ. ​သူၣ်​လီၤ​ပ​သး​ဒီး ​ပာ်​လီၤ​မီၢ်​သီ​ကျဲ​သ​နူ​လၢ ​အ​ဒုး​အိၣ်​ထီၣ် ​သိၣ်​မှံၤ​တံၤ​သ​ကိး ​လၢ​အ​ဂ့ၤ ​လၢ​လီၢ်​ယံၤ​လီၢ်​ဘူး ​ကီၢ်​ယံၤ​ကီၢ်​ဘူး​လၢ​ပ​မၤ​စၢၤ​လိာ်​သး​ယာ်​ခီ​ယာ်​ခီ ​လၢ​အ​ကဲ​ထီၣ်​ပ​တၢ်​ဂံၢ်​တၢ်​ဘါ​ဒီး ​ထံ​ကီၢ်​အ​တၢ်​ဂၢၢ်​တၢ်​ကျၢၤ ​အ​ဂီၢ်​န့ၣ်​လီၤ.


​ကီၢ်​ပံၤ​ယီၤ​အ​တၢ်​ဂ့ၢ်​ကီ​န့ၣ်​မ့​မ့ၢ်​ဘၣ်​ဖုး​ထံ​ရူၢ်​ကီၢ်​သဲး​အ​တၢ်​ဂ့ၢ်​ကီ​န့ၣ် ​န​ဆ့ၣ်​နီၤ​တဲ​သ​ကိး​တၢ်​လၢ​စီၤ​နီၤ​ခိၣ်​လၢ​တၢ်​သး​အိၣ်​သး​ဘျၢ​န့ၣ် ​လၢ​တ​နံၣ်​အ​တီၢ်​ပူၤ​အ​စၢ​က​ဘျၣ်​ဖျါ. ​ဒီး​ကီၢ်​ပံၤ​ယီၤ​အ​တၢ်​ဂ့ၢ်​ကီ​မ့​မ့ၢ်​ဘၣ်​ဖုး ​ထံ​ကီၢ်​တၢ်​ဘျၢ​သဲ​စး​ခိၣ်​သ့ၣ် ​အ​တၢ်​ဂ့ၢ်​ကီ​န့ၣ် ​န​ဂၢၤ​ဖှိၣ်​န​သး​ဒီး​ကွဲး​အီၤ​န့ၣ် ​လၢ ​တ​လါ​အ​တီၢ်​ပူၤ​န့ၣ် ​က​ဘၣ်​ဝံၤ​ဝဲ​လီၤ. ​ဘၣ်​ဆၣ်, ​မ့​မ့ၢ်​တၢ်​သ​ကဲာ်​ပ​ဝး​လုၢ်​လၢ်​အ​တၢ်​ဂ့ၢ်​ကီ​န့ၣ် ​ပိာ်​ထွဲ​အ​ခံ​အ​စိၤ​တ​ဖၣ်​အ​စိၤ ​န့ၣ်​လီၤ.

​ပှၤ​တ​နီၤ​အိၣ်​ဒီး ​မုၢ်​ထူၣ်​ခါ​အ​တၢ်​မံ​မီၢ်​လၢ ​က​သူၣ်​ထီၣ်​က့ၤ ​ကီၢ်​ပံၤ​ယီၤ​ဒီ​တ​ဘ့ၣ်​ဒီး ​က​နုာ်​လီၤ​ပၢ​ဝဲ​န့ၣ်​လီၤ. ​အိၣ်​လံ​အ​နံၣ်​နွံ​ဆံ​ဘျဲၣ်​လံ, ​တၢ်​သူၣ်​ထီၣ်​ကီၢ်​စၢ​ဖှိၣ် ​တ​န့ၢ်​ဒံး​ဘၣ်.  ​ကီၢ်​ပံၤ​ယီၤ​အ​ပူၤ ​က​လုာ်​ဒူၣ်​အိၣ်​ပှဲၤ​ပှဲၤ​အံၤ ​လၢ​အ​အိၣ်​ဒီး​အ​တၢ်​မံ​မိၣ်​ဒၣ်​ဝဲ​စုာ်​စုာ်​န့ၣ် ​န​က​လဲၤ ​စၢ​ဖှိၣ်​အီၤ​လၢ​တၢ်​လံာ်​တၢ်​လီ ​တၢ်​က​ဘျံး​က​ဘျၣ် ​တၢ်​မၤ​ဆူၣ်​မၤ​စိး ​အ​ပူၤ​န့ၣ် ​န​သူၣ်​ထီၣ် ​က​န့ၢ်​ဒၣ် ​ကီၢ်​လၢ​ဘၣ်​ဆိၣ်​အၢ ​လၢ​ဟီၣ်​ခိၣ်​ချၢ​န့ၣ်​လီၤ. ​န​က​စၢ​ဖှိၣ်​န​သး​ဒီး​ပှၤ​ဂၤ​န့ၣ်​ပှၤ​ဂၤ​က​ဘၣ် ​အဲၣ်​တီ​အဲၣ်​လိၤ​နၤ​န့ၣ်​လီၤ. ​ခဲ​အံၤ​န​မ့ၢ်​လဲၤ​စၢ​ဖှိၣ်​န​သး​ဒီး ​တၢ်​လၢ​အ​သး​ကံၢ်​က​လီၤ​ပှီၢ်​န့ၣ် ​အိၣ်​ဒၣ်​န​က​လီၤ​ပှီၢ် ​ပိာ်​ထွဲ ​အ​ခံ​န့ၣ်​လီၤ.

​ဒ်​ပ​ဟီၣ်​ခိၣ်​ဖိ​တ​ဂၤ​အ​သိး​ပ​ကြၢး ​သူၣ်​ထီၣ်​က့ၤ​ပှၤ​လၢ​ပ​ဃၢၤ​ဖဲ​ပ​သ့​န့ၣ် ​မ့ၢ်​ထံ​ရူၢ်​ကီၢ်​သဲး​လၢ ​အ​ဂ့ၤ​လီၤ. ​ဖဲ​ပ​အိၣ်​က့ၤ​ဒီး​ပ​သူး​ပ​သ့ၣ်​ဒ်​ပှၤ​တ​က​လုာ်​အ​သိး, ​ဒီး​ပ​အိၣ်​ဒီး​ပ​ဂံၢ်​ပ​ဘါ ​ဒ်​ထံ​ကီၢ်​တ​ဘ့ၣ်​အ​သိး​အ​ဆၢ​က​တီၢ်​န့ၣ် ​ပ​တၢ်​သ့​တၢ်​ဘၣ် ​ပ​တၢ်​ဃု​သ့ၣ်​ညါ ​ဃုာ်​ဒီး ​ပ​တၢ်​ဆဲး​တၢ်​လၤ​သ​ကဲာ်​ပ​ဝး ​ဆိ​က​မိၣ်​ပီ​ညါ​န့ၣ် ​က​မ့ၢ်​က​စိာ်​က​ဖီ​ထီၣ်​က့ၤ​က​လုာ်​တ​ဖၣ် ​ဒ်​ပ​မ့ၢ်​က့ၤ​ဖိ​ဝဲၢ်​ကိ​လၢ​ဘၣ်​ဆိၣ်​ဂ့ၤ​လၢ​ပှၤ​ဂၤ​အ​ဂီၢ် ​အ​ခါ​န့ၣ်​လီၤ.



​ကီၢ်​သူ​လ့ၤ ​က​ဘၣ်​တုၤ​အိၣ်​ပှၤ ​ဖဲ​ပ​စိၤ​အံၤ​လီၤ. ​လၢ​ဟီၣ်​ခိၣ်​ချၢ​န့ၣ် ​ပှၤ​လၢ​အ​သး​ဒ့​ဒီ​တ​ဖၣ် ​အိၣ်​ဝဲ​ထီ​ဘိ ​လၢ​ပျၢၤ​လၢ​က​စၢၤ ​ဒီး​တုၤ​ခဲ​က​နံၣ်​အံၤ​လီၤ. ​ဟီၣ်​ခိၣ်​တၢ်​ဆီ​တ​လဲ​တ​ဖၣ်​န့ၣ် ​တ​ဟဲ​အိၣ်​ထီၣ်​အ​သး​လၢ ​ပှၤ​သး​ဒ့​ဒီ​တ​ဖၣ်​ဘၣ်. ​ပ​တၢ်​နာ်​တၢ်​မုၢ်​လၢ်​ဒီး ၂၀၂၄​နံၣ်​ဒုး​ယၤ​ထံ​ရူၢ်​ကီၢ်​သဲး​အ​တၢ်​ဆီ​တ​လဲ ​ဃုာ်​ဒီး​က​လုာ်​တၢ်​အိၣ်​က​တီၤ​သး​န့ၣ် ​က​အိး​ထီၣ်​န့ၢ်​ပှၤ​ကျဲ​လၢ​ပ​က​တုၤ​အိၣ်​ဖံ​ဖု​အ​တၢ်​မံ​မီၢ် ​ကီၢ်​သူ​လ့ၤ ​လၢ​အ​လၢ​ပှဲၤ​ဝး​က​ဝီၤ ​လၢ​အ​အိၣ်​ဒီး​က​လုာ်​တၢ်​သ​ဘျ့ ​လၢ​အ​က​တီၤ​ဃာ်​တၢ်​စီ​တၢ်​ဆှံ​ဒီး​အ​စိာ်​က​ဖီ​ထီၣ် ​က​လုာ်​တၢ်​လဲၤ​ထီၣ်​လဲၤ​ထီ ​လၢ​က​မ့ၢ် ​ထံ​ကီၢ်​လၢ​ပ​ဆၢ​ထံၣ် ​ပ​ဆၢ​အိၣ်​ဘၣ်​အ​ပူၤ​န့ၣ်​လီၤ.

​လၢ​တၢ်​မုၢ်​လၢ်​တၢ်​ဆိ​က​မိၣ်​အါ


​စီၤ​လါ​က​ပီၤ


February 2024



Print Friendly View PDF

200 year experiences and looking forward.pdf

​လံာ်​ဒိး​သ​န့ၤ​တ​နီၤ

• ​သ​ရၣ်​ဒိၣ်​စိ ​အဲး​ဒ​ဝၢး​အိၣ်​ဝဲ​လ်​စၢၣ်, ​တၢ်​ဃူ​လီၤ​ပ​လိာ် ​လၢ​တၢ်​သ့ၣ်​ညါ​ပာ်​ဖှိၣ် (​အဲ​က​လံး​ကျိာ်)

Wilson, E. O. (1999). Consilience: The Unity of Knowledge. National Geographic Books.


• ​သ​ရၣ်​မုၣ်​ဒိၣ်​စိ ​အ​လံၢ်​စ​လံ​မ်, ​ဟီၣ်​ခိၣ်​အ​တၢ်​ရဲၣ်​လီၤ​ကျဲၤ​လီၤ (​အဲ​က​လံး​ကျိာ်)

Ali, S. H. (2022). Earthly Order: How Natural Laws Define Human Life. Oxford University Press.


• ​သ​ရၣ်​မုၣ်​ဒိၣ်​စိ ​မဲ​ရံၢ်​ခီ​လၣ်​ဟဲ, ​တၢ်​ဒုး​တၢ်​ယၤ​ဒီး​တၢ်​သူၣ်​ထီၣ်​ထံ​ကီၢ် (​အဲ​က​လံး​ကျိာ်)

Callahan, M. P. (2003). Making enemies: War and State Building in Burma. Cornell University Press.


• ​သ​ရၣ်​ဒိၣ်​စိ ​ကၠံ​မ်​စ်​ခၢး​လဲ​စံၢ်, ​တၢ်​ထုး​ဖး​သး​လၢ​ကီၢ်​မိၢ်​ပှၢ်​ဒီး ​တၢ်​သူၣ်​ထီၣ်​ထံ​ကီၢ် (​အဲ​က​လံး​ကျိာ်)

Ker-Lindsay, J., & Fabry, M. (2022). Secession and state creation: What Everyone Needs to Know®. Oxford University Press.


• ​သ​ရၣ်​ဒိၣ်​စိ ​သဲး​မၠံး​အူ, ​ကီၢ်​ပံၤ​ယီၤ​အ​တၢ်​စံၣ်​စိၤ​ခူ​သူၣ် (​အဲ​က​လံး​ကျိာ်)

Myint-U, T. (2019). The Hidden History of Burma: Race, capitalism, and the crisis of democracy in the 21st century. W. W. Norton & Company.


• ​သ​ရၣ်​မုၣ်​ဒိၣ်​စိ ​အဲၣ်​ကၠ​လံ​နီ, ​က​ညီ​ဖိ​လၢ​ကီၢ်​ပံၤ​ယီၤ​အ​တၢ်​စံၣ်​စိၤ​တဲ​စိၤ (​အဲ​က​လံး​ကျိာ်)

Naw, A. (2023). The history of the Karen people of Burma.


• ​သ​ရၣ်​မုၣ်​ဒိၣ်​စိ ​အါ​တဲး​ထီ​မၢ, ​က​ညီ​တၢ်​ပၢၢ်​ဆၢ​လၢ​ကီၢ်​ပံၤ​ယီၤ (​အဲ​က​လံး​ကျိာ်)

Thawnghmung, A. M. (2008). The Karen Revolution in Burma: Diverse Voices, Uncertain Ends. Institute of Southeast Asian Studies.

 

• ​သ​ရၣ်​ဒိၣ်​စိ​ဒီ​နၢၣ်​မ​ခ့​စံၢ်​စ​မံး​တၢၣ်, ​က​ညီ​ဖိ​လၢ​ကီၢ်​ပံၤ​ယီၤ​လၢ​အ​သး​တီ (​အဲ​က​လံး​ကျိာ်)

Smeaton, D. M. (1887). The Loyal Karens of Burma


• ​သ​ရၣ်​မုၣ်​ဒိၣ်​စိ ​အါ​တဲး​ထီ​မၢ​ဒီး ​သ​ရၣ်​ဒိၣ်​စိ​တ​နီၤ, ​မၤ​နၢၤ​တၢ်​လၢ ​တၢ်​ရဲၣ်​ကူၣ်​တ​ရံး​အ​ကျဲ, ​ထံ​ကီၢ်​ပ​ဒိၣ်​ကူၣ်​ထီၣ်​တၢ်​လၢ ​က​မၤ​မုာ်​မၤ​ခုၣ်​က့ၤ ​က​လုာ်​ဒူၣ်​တ​ဖၣ် (​အဲ​က​လံး​ကျိာ်)

Bertrand, J., Pelletier, A., & Thawnghmung, A. M. (2022). Winning by process: The State and Neutralization of Ethnic Minorities in Myanmar. Southeast Asia Program Publications.


• ​သ​ရၣ်​စီၤ​ဘီၢ်​လ့, ​သီ​သံၣ်​ပှီၤ​ဂီၤ​ယွၤ​စ့​ဘီ ​ဒီး​အ​ရ့​ဒိၣ်​လံ​စၢ​ဖှိၣ်​သွံၣ်·       (2002). Nopburee Press, Chiangmai)  (​က​ညီ​ကျိာ်)